¹ Tagba éxé nɔ jɛ do mi takun, mɔ nɔ jɛ do Lawodisenulɛ gɔdo emɛ éxé go nyɔ ganji etɔ tawun lɛ e takun ɔ; i jlo fan a mi nyɔ fan kɛn e siɛn ɖo ɔ; ² Nɔ fun ahwan nɛlo ɖo jiɖiɖe nujɔnutɔn, nɛlo nyi lokpo ɖe wannyinyi mɛ. Nɛ jiɖiɖe éxé nunyinyɔ titewungbe na emɛ ɔ ni jwɔ ayimɛ nɛ ganji; gan enɛmɛ ɔ, emɔ lonyi nubudo Mawu etɔn; Klisu tete eyi enyi nubudo lɔ. ³ Eyɔ mɛ emɔ dɔkun éxé ɖe nunyinyɔmɛlɛ gɔdo éxé ɖe okunnu mɔ jɛ numɛ lɛ tɛtɛ ɖe hwihwla ɖe. ⁴ I lɔxo na mi do etɔnɛ nɛ mɛti ni ma we yi ixo vivi lo we klɔmi ɖu e. ⁵ Nɛ gɔ dɛndo mi ɖe agbaza mɛ ɔ, iɖe kpwɛ gɔ mi ɖe yimɛ mɛ, kɛn i mɔ fan mi bayi nu do tito ji ɖo ganji ɖo mɔ lido ɖe nuɖiɖi éxé mi ɖo na Klisu ɔ mɛ ɖo ɔ, e vivi na. ⁶ Ɖe enɛ mɛ ɔ, éxé mi yi Yesu Klisu lo yi mi Aklunɔ ɔ, mi mɔ nɔ kpwɛ gɔdi ɖe mi egbɛzan mɛ. ⁷ Mi do oɖɔdo ɖe Klisu mɛ; mi egbɛ tɛtɛ ni nɔ olɔ ni. Mi nɔ li ɖe nuɖiɖi mɛ gan tɛtɛ mɛ kɛn e kplɔmi ɖo ɔ, mi mɔ nɔ nyɔ inu éxé Mawu wa na mi ɔ ni. ⁸ Mi cɔ miɖe nɛ mɛti nɛ ma yi emɛklɔɖuxo, xomaɖixo, nunyinyɔ gbɛtɔlɛ etɔn lo dogan mi e, nunyinyɔ enɛ ɔ, nukplɔn emɛ gbetɔlɛ etɔnji e xinɔ. Mɔ xinɔ nu ɖe yɛswimɛ gbɛmɛ xietɔn lɛ e hinhlɔn ji. E go xinɔ Yesu ji e. Mi ma ɖoto wi e. ⁹ Ɖo inu éxé Mawu nyi ɔ tɛtɛ mɔ yi agbaza ɖe Klisu mɛ, nɛ Mawu ni lo nɔ Klisumɛ tɛtɛ. ¹⁰ Mi mɔ yi inu tɛtɛ ɖe ikpwɛ éxé mi ɖe ɖe Klisu ɔ, eyɔ eɖe takun na iga lɛ tɛtɛ gɔdo acɛ kpikpa lɛ tɛtɛ. ¹¹ E mɔ gbo ada nami ɖe ikpwɛ éxé mi ɖe gɔdo Klisu ɔ mɛ; vɔɔ e go nyi ada éxé gbɛtɔ lɛ gbo na emɛ ɔ go nɛ é; vɔɔ ada éxé Klisu gbo na enɛ, e mɔ ɖemi ɖe mi agbaza éxé nyi hwɛhwutɔ e acɛmɛ. ¹² Xonugbo ɔ, éxé e lɛ Mawusin na mi ɔ, e di mi gɔ Yesu Klisu mɔ gɔ fɔn mi gɔdi ɖe ku, ɖo mi ɖinu na Mawu éxé fwɛn ɖe ku ɔ e hinhlɔn. ¹³ San ɔ, emɛ kuku mi nyi ; ɖo mi ehwɛ lɛ wutu, ɖo mi go nyi Jwifu e, migo nyi Mawusɛntɔ e; vɔɔ tɛn ɔ, Mawu bayi mi mɔ gɔ wa egbɛ gɔ Klisu; emɔ yi exwɛ éxé mi hu lɛ tɛtɛ i kɛ mi. ¹⁴ Xoma éxé ji e wlan mi exwɛ lɛ do, e mɔ nɔ do exwɛ wu mi e tito lɛ ego sɔgbe gɔ mi e le ɔ , Mawu kɛ do otin soga ji mɔ susu mi exwɛ éxé ɖeji lɛ tɛtɛ. ¹⁵ Klisu e yi hinhlɔn ɖe igalɛ gɔdo acɛkpikpa lɛ tɛtɛ si, lo zɔn ku éxé e ku ɖe otnsoga ji ɔ mɛ, e ɖu ɖe e ji, mɔ bɛ yi kɔn do togun mɛ agbawungba, e mɔ tlɔzun inu kpinkpɔn. ¹⁶ Nɛnyi etɔnɛ ɔ, mi ma luwɔn nɛ mɛti nɛ lɔna mi fan inu éxé ejɔhun mi wa ɖu alo inu etɔ ejɔhun mi wa nu, alo iwezan etɔ mi wa nyi, alo isun jɛ etɔ e azan mi wa nyi, alo gbɔjwɛzan Jwifu lɛ etɔn etɔ mi wa nyi e. ¹⁷ Inu enɛ lɛ tɛtɛ ɔ inu mɛmɛmyi exe zwan lɛ e yɛ kpowun enyi; vɔɔ, Klisu eyɔ enyi inu jɔnu. ¹⁸ Mi ma lwɔn nɛ emɛ éxé mɔ jijwɛ ɖe emɛɖe kɔsu ɖe agbawungbagbe e nu wiwa lɛ gɔdo wɛnzagun lɛ sɛnsɛn mɛ lele nima ɖo kojo na mi e. ¹⁹ E mɛ etɔnɛ kɔ ha ɔ, inu mimɔ éxé emɔ go e ɖeji do linlin gbɛtɔ etɔn éxé e ɖo ɔ mɔ zun agoyiyi vɔtɔ mɔ hugan wi. ²⁰ Myɛlɛ gɔ Klisu mɔ ku emɔ hwlɛn mi ɖe eyɛ éxé kpacɛ ɖe egbɛlɔmɛ lɛ e hinhlɔnsi éxé enyi etɔnɛ ɔ, amu wutu mi gɔ lo zan egbɛ ɖi egbɛ ɔ etɔn mi gɔ nyi mɔ ɖe; amu wutu mi gɔ yi gbe emɔ gɔ do esɛn nami fan: ²¹ Ma yi inu éxé ! Ma do inu éxé nugbɛn e ! Ma ɖo olɔ inu éxé go e ! ²² Inu éxé e zan tlolo ɔ, evwɛ; eyi esɛn enɛ lɛ kan ; gbɛtɔ lɛ e sɛn gɔdo inu éxé ekplɔn emɛ lɛ e wa inu enɛlɛ. ²³ Xonugbo ɔ, nɛ e kpɔn esɛn enɛlɛ mɛ ɔ, emɔ fan nu nyinyɔ ɖemɛ ɖo e lɔ sɛnsɛn emɛ tete etɔn, emɛɖe yihwe gɔdo tagba do na emɛ tete eyi agbaza exo; vɔɔ esɛn enɛ lɛ ɔ, ooɖo hinhlɔn ti wa dolɔ wu emɛ, e mɔ ɖuɖe emɛtete agbazaji e