¹ Pɔlu wa Dɛɛbe,mɔ lɛ de xinnɛ lo waLisitli,ahwanvu Yesu etɔn nɛhwlɛn mɔ ɖe xinnɛ,keun e mɔ ylɔ ɛ fan Timɔtee,nyɔsi Jwifu e xe ɖinu na Yesu ɔ nɛhwlɛn e vi nɛ,keun etɔ mɔ wa Glɛsinu. ² Nɔviɖe Klisu mɛ e xe ɖe Lisitli gɔdo Ikoniyɔmu lɛ mɔ ɖe klu dagbɛ na Timɔtee. ³ Keun Pɔlu mɔ din fan ni xwedo eyɛ,mɔ kplɛn,e gbo ada ni,ɖo Jwifu exo ɖe gbe enɛ ji lɛ wutu,ɖo mɛtɛtɛ nyɔ fan Timɔtee e to ɔ,Glɛsinu nɛ. ⁴ Ɖe ito exe Pɔlu gɔdo Timɔtee zɔn lɛ mɛ ɔ,e lɔ ihabibɔ oxo omɛɖo lohlan lɛ gɔdo ogunnukɔntɔ Jeluzalɛmu etɔn lɛ na mɛlɛ,mɔ byɛ fan e nɛ se tonu na ihabibɔ e nɛ lɛ. ⁵ Keun ogun nuɖitɔ lɛ etɔn lɛ mɔ nɔ doli tɔn ɖe nuɖiɖimɛ,mɔ nɔ e ji jɛtɔn okunkɛngbe okunkɛngbe. ⁶ Yɛsinsɛn go lɔn nɛ Pɔlu gɔdo Silasi ni jla Mawuxo ɖe Azii gbe ji e,e nɛ ɔ,e nya zɔn Flijii gbe ji,mɔ nya zɔn Galati gbe ji. ⁷ E gogo Mizii gbe ji,mɔ hlɔn a sɔn to exo lɔ fan Bitimi ɔ mɛ,vɔ e yɛ Yesu etɔn go lɔn nɛ e. ⁸ Keun e mɔ nyan zɔn Mizii mɔ sɔn to exe e ylɔ fan Tlowasi ɔ mɛ. ⁹ Ozan mɛ ɔ,Mawu ɖenu xlɛ Pɔlu e mɔ Masedwaninu lokpo ɖe te,mɔ nɔ ɖe kuku ni fan kɛnklɛn wa Masedwani,mɔ we do olɔ wu mi. ¹⁰ E xe Pɔlu mɔ inu e nɛ godo ɔ,mi sɔ nu,Jlokpwe,ma sɔn Masedwani,ɖo mi mɔ gaan fan Mawu eyi oylɔ mi,na mi la jla ewɛn ɖagbe ɔ,ito enɛ ɔ mɛnu lɛ. ¹¹ Mi do tɔjihun ɖe Tlowasi,mɔ zɔn etɔnɛ tlɔlɔ losɔn tɔcɛncɛn eto exe e ylɔ fan Samɔtlasi ɔ mɛ,okunkɛngbe ɔ,mi sin Nɛyapolisi. ¹² Mi lɛ ɖe xinnɛ mɔ sɔn ito gbo exe e ylɔ fan Filipu ɔ mɛ,ito enɛ ɖe ito owunkɔntɔn Masedwani etɔn mɛ,ɖe Hlɔmanu lɛ e acɛ mɛ,mi ito enɛ mɛ na azan nɛmule. ¹³ Gbɔjwɛzangbe Jwifu vlɛ etɔn ɔ,mi tɔn ɖo to ɔ mɛ,mɔ sɔn tɔ kpa,mɔ mɔlemɔ fan mi la mɔ Jwifu lɛ e ɖɛxotɛn xwe nɛ sin,mi sinnɔ awan mɔ lɔ xogɔ nyɔsi exe kpli ɖe xinnɛ lɛ. ¹⁴ Nyɔsi e nɛ lɛ nɛhwlɛn nyi Lididi,mɔ lɛ de Tiatii,mɔ sa exwanu vɔn ƒɛƒɛyi nɛhwlɛn lɛ ; é si mawu ; é ɖoto ɖo miyɛ lɛ nɛ , keun Aklunɔ mɔ hun é ayi , kéun é mɔ wli ito éxé Pɔlu nɔ lɔ ɔ go . ¹⁵ Éyɔ gɔdo emɛlɛ lɛ yɛhwesin ; ěnɛɔ godo ɔ , é ɖe kuku na mi ƒan : nɛ mi mɔ ƒan yi ɖinu na Aklunɔ xonugbo ɔ , mi we nɔ un xwɛ . É zin do miji mi mɔ gbɔjwɛ yigbe , mɔ la nɔ é xwɛ . ¹⁶ Mi mɔ we sɔn ɖɛxotɛnxwe gbelokpo , mɔ kpe nyiɔsi mɛsɛntɔ nɛhwlɛn , keun yɛ nyinylan mɔ ɖe éji , keun é mɔ kan ƒa na mɛlɛ . inu enɛ éxé́ é bay ɔ zɔn , kéun é mɔ dɔn exwá wa na égá lɛ . ¹⁷ Nyɔsi ěnɛ ɔ jɛ Pɔlu gɔdo mi godo mɔ do abobo ƒan : Emɛ éxé lɛ ɔ , Mawu Ajalɔnlɔn e mɛnsɛntɔ eyɔ e nyi ; hwlɛngan é mɔ exo eyɔ enɔ lɔ na mi . ¹⁸ Etɔnɛ eyi éɖe mi godo na azan nɛmule , keun emɔ we vɛɖe Pɔlu go gbe lokpó , keun émɔ lɛkɔ mɔ lɔ na eyɛ éxé ɖe nyɔsi ɔ ji ɔ ƒan : ɖe yesu klisu é nyikɔ mɛ ɔ , yi ɖegbe dě : lɛɖe nyɔsi éxé ji ; keun yɛ ɔ mɔ lɛɖe nyɔsi ji tlóló ɖe é tɛnxwé mɛ . ¹⁹ Exé nyɔsi ɔ e ga lɛ mɔ ƒán é gɔ nɔ dɔn ixwá lélé lowa na ayɛ e le ɔ , e wli Pɔlu gɔdo Silasi , mɔ dɔn ɛ̌n lo sɔn tokplitɛnxwé ɖe ge lɛ wunkɔn . ²⁰ E kplɛ̌n lo sɔn ehwɛlɔtɔ Hlɔmanu lɛ etɔn wunkɔn ƒan : Dahwe exelɛ nɔ hlú mi to ; jwiƒu lɛ nɛ , ²¹ E kplɔn walɔ éxé mi sɛn gbɛ lɛ kplɔn mɛlɛ tɔn ; miyɛlɛ Hlɔmanu lɛ ɔ mi go kpego a yigbe na e ; gbɛ mi go kpego a xwedo e . ²² Ahwan ɔ ƒe cite do Pɔlu gɔdo Silasi ji , hwɛlɔtɔ mɔ zɔ́n keun emɔ ɖe awu na yɛmɛ owelɛ , mɔ xoe gɔ do lanba . ²³ Exe é xoe , keun abi mɔ kpe ègo ɔ , ye kplɛ̌n do gankpámɛ , mɔ lɔ na iga exe kpa acɛ do gankpa ɔ go ɔ ƒan ni cwɛ̌ ganji . ²⁴ Exé iga lɔ se étɔ́nɛ ɔ , é́ kpɛ̌n la sú do xɔ nɛhwlɛn mɛ , ɖe gankpa ɔ cɛ̀ncɛ́n , mɔ jan e oƒɔ lɛ do sokpo mɛ , mɔ su hɔn dě . ²⁵ Ozandomɛ etɔnɛ ɔ , Pɔlu gɔdo Silasi nɔ xoɖɛ , mɔ nɔ jihan mlá Mawu , keun gantɔ lɛ mɔ nɔ ɖoto wi . ²⁶ Jlokpwe ɔ , awlango hwan gɔ hinhlɔn , mɔ hunhun gankpa ɔ é dodo lɛ tɛtɛ ; e la mɔ nu lele kpowun ɔ , i hɔn lɛ tɛtɛ hun keun gɛdɛ éxe e do gantɔ́ lɛ ɔ tɛtɛ wɛn kɔn awán . ²⁷ Iga éxé kpa acɛ do gankpa ɔ nugbɛn ɔ ƒɔn ; éxé e mɔ ihɔn lɛ tɛtɛ ɖe nuvo ɔ e mɔ lo mɔ ƒán gantɔn lɛ si lo sɔn nɛ ke , mɔ dɔ iji mɔ na hu éɖe . ²⁸ Pɔlu mɔ do abobo Sinsyɛn nɛhwlɛn ƒán : Ma wa nu iɖé go e , ɖo mi ɛmɛ tɛtɛ eyi é sɔgbe ɖe xíe . ²⁹ Gan énɛ mɛ ɔ , é byɔ zogbɛn , mɔ zrɔn byɛ ixɔ lɔ́ mɛ , mɔ bɛ sisɔ sisɔ , mɔ jɛkplo ɖe Pɔlu gɔ Silasi e owunkɔn . ³⁰ É mɔ we ɖě tɛn , ƒán : Ǔn ga lɛ ! amu i ɖo a wa kéun Mawu mɔ hwlɛn un gan ʔ ³¹ Pɔlu gɔ Silasi mɔ yigbe ni ƒan : ɖi nú na Aklunɔ yesu , ěnɛ ɔ , Mawu la hwlɛ̌n gan , oyɔ gɔdo emɛ éxé ɖe íxwɛ lɛ . ³² Emɔ lɔ Aklunɔ xo na eyɔ gɔdo emɛ éxé ɖe é xwɛ lɛ tɛtɛ . ³³ E mɔ kplɛ̌n jlokpwe ɖe ozan xoxo enɛ mɛ , mɔ klɔ aba é abi lɛ nɛ̌ , keun trolo ɖe étɛn xwe mɛ ɔ éyɔ gɔdo é mɛ lɛ tɛtɛ lɛ yɛhwesin . ³⁴ iga éxé kpa acɛ do gankpa ɔ nugbɛn ɔ kplɛ̌n lo sɔn é xɔmɛ , ɖe sanwun ji , mɔ na nuɖuɖu wǐ , kéun éyɔ gɔdo emɛ lɛ tɛtɛ mɔ jijwɛ ɖo Mawu exe é ɖinu na ɔ wútu . ³⁵ Okun mɔ we kɛn , keun ihwɛlɔtɔ lɛ mɔ ɖo sɔja lɛ lo hlán nɛ lo sɔn la lɔ na iga éxé kpa acɛ do gankpa ɔ nugbɛn ɔ ƒan : jo Pɔlu gɔdo Silasi do . ³⁶ Enɛ ɔ , iga éxé kpa acɛ do gankpa ɔ nugbɛn ɔ la lɔ na Pɔlu ƒan : hwɛlɔtɔ lɛ ɖo sɔja lɛ lohlán ƒán nɛ̌ jomido ; mi tɔ́n mɔ sɔ́n ɖe fifá mɛ . ³⁷ Vɔ̌ , Pɔlu lɔ na emɛ éxé é ɖo lohlán lɛ ƒan : Hlɔmanu eyɔ mi nyi ; emɔ xo mi ɖe agbawungba ma lo ehwɛ gɔ mi , mɔ bɛ mi we kɔn gankpamɛ ; tɛn ɔ , e na ɖe mi tɛn mɛti ma se ; gblekpɔn , yɛlɛ te lɛ ni we ɖemi tɛn . ³⁸ Sɔja lɛ mɔ kɔ ixó enɛ la lɔ na hwɛlɔtɔ lɛ ; éxé hwɛlɔtɔ lɛ se ƒan Hlɔmanu eyi enyi ɔ , cicwɔ jɛ eji . ³⁹ Keun e mɔ we mɔ Pɔlu gɔdo Silasi , mɔ ɖe ƙúƙú nɛ̌ , mɔ ɖě tɛn , mɔ lɔ nɛ ƒán nɛ̌ lɛ ɖe to ɔ mɛ . ⁴⁰ Exe Pɔlu gɔ Silasi tɔn ɖe gankpa ɔ mɛ ɔ , e we nyakpɔn Lidii xwɛ , mɔ́ mɔ nɔvi ɖe Klisu mɛ lɛ ɖe xinnɛ , mɔ do kanmɛ syɛn lanmɛ nɛ̌ , mɔ lɛ́ .