¹ Inyɔn ogun mɛxo ɔ enɔwlan xoma éxé lohlan emɛ vivɛ xuntɔn Gayiwusi éxe iɖo wannyinyi xojɔxo tɔn na ɔ. ² Xun emɛ vivɛ, ijlo fan inu tɛtɛ nizɔn nɛ ganji i lanmɛ ni nɔn ganji ɖikɛn o ɖe ganji ɖe nuɖiɖimɛ ɖó ha mɔɖe . ³ Exé nɔvi lehwlɛn lɛ wa mɔwe lɔ kɛn oɖe gbeji ɖe xojɔxo lɔ mɛ ɖo ɔ, gɔdo kɛn o gbɛkpo nɔzan xi egbɛ ɖó ɖé okunkɛngbe okunkɛngbe na ɔ, e na jijwɛ wu tawun. ⁴ Nɛ ise fan xún vikpɛlɛ nɔ́ɔ̀ zan egbɛ ɖe xojɔxo mɛ ɔ, nuti gɔ́ɔ do jijwɛ na hú́gan etɔnɛ e. ⁵ Xun emɛ vivɛ, o nɔ gbeji na inu éxé o wa na nɔvi lɛ ɔ mɛ kaka mɔgɔ nɔgbeji ɖe inu éxé o bayi na nɔvi éxé enyi mɛjlo lɛ fe ɔ mɛ. ⁶ E ɖe klun na wannyinyi éxé o ɖo ɔ ɖe ogun lɔ okɔn; do olɔ wi ɖikɛn Mawu jlo ɖo ɔ, nɛ lo sɔn to éxé mɛ enɔsɔn ɔ. ⁷ Ɖó Yesu Klisu wutu ɔ, e go yi nuti ɖe mɛ éxé gonyi klisusɛntɔ lɛ si feto lo jɛmɔ e. ⁸ Mǐ emɛ Klisusɛntɔ lɛ ɔ, mi ɖo wa dolɔ wu gbɛtɔ etɔnɛkɔha lɛ, mimɔ tɛn wun kpego lo wa idɔn gɔɖe, nɛ xojɔxo ɔ nɛlo sɔn unkɔn. ⁹ I wlan xoma klewun nɛhwlɛn lohlan ogun lɔ; vɔɔ, Deotlefɛsi exe nyi wan na igaɖuɖu ɖe enugbɛn mɔ́ gbɛfán eyɛ góò kpe nuti gɔ mi e. ¹⁰ Enɛ wutu ɔ, gan éxé mɛ la wa mikɛ ɔ, la lɔ inu nyinylan éxé e dote lɛ na mi, mɔ lɔ inu éxé e hlanjan na mi ɔ gɔdo awo éxé e ɖu do migo lɛ fe na mi; enɛ lokponɔ gonɛ e; e go yí nɔvi éxé e wa lɛ ti e; nɛ mɛbúlɛ jló fan nɛ yɛ yí nɔvilɛ ɔ, egɔ lwɔn nɛ e mɔ gɔ jlo aɖeesɛ ɖe ogun lɔ́ mɛ. ¹¹ Xun emɛ vivɛ, manɔ wanu nyinylan ɖi emɛ éxé bayi ɖi eyɔ ha lɛ e; vɔɔ nɔ bayi inu ɖi emɛ éxé bayi inu mɛmɛyi lɛ mɔɖe. Emɛ éxé e bayi inu mɛmɛyi ɔ, Mawu etɔn enyi, vɔɔ emɛ éxe ewa nu nyinylan ɔ e go mɔ Mawu e. ¹² Mɛtɛtɛ elɔ Demɛtliwusi éxo mɛmɛyi; xonugbo lɔ tete ɖe klun n'i; miɛlɛ fe ɖe klun mɛmɛyi nii; omɔ nyɔ fan xojɔxo mí lɔ́. ¹³ Iɖo ixo susu alɔ nɛ; vɔɔ igo jló awlan do xoma ji lo hlɛn e. ¹⁴ Nɔ́ lin fán la we mɔ ɛn ɖé madɛn madɛn mɛ, mímɔ́ kpenugbɛn mɔ lɔxo. Fifa ninɔ kpwɛ gɔde! Xi ohwannyi lɛ edo gbe lohlɛn. Dogbe na mí hwanyi lókpo lókpoe na mí.