¹ Gbigbɔ tete mɔ lɔ cédécédé fan ɖe azan godo godo tɔn lɔ gbe ɔ, mɛ lohwlɛn lɛ la jo inuɖiɖi do, ma ɖoto wu gbigbɔ éxé flu emɛ gɔ gbogbɔ nyinylan e nukplɔn emɛ. ² Ela ɖoto inu enɛlɛ ɖe yɛmɛnuwatɔlɛ gɔdo adingbannɔlɛ nugbɛn, ma jo eɖe lɛ do yɛmɛnuwatɔlɛ éxé inumasɔgbe wiwa mɔ ɖo jesido ayixa etɔn lɛɛ ɖi igan zozo elo ɖo jeside wi mɔɖe lɛɛ la dɔn yɛmɛtɛtɛ yi bu. ³ Emɛ enɛlɛ edo esɛn fan nɛ ma ɖe osu e, gbe nɛ ma ɖe nyɔsi. Edo nuɖuɖu nɛhwlɛn lɛ e sɛn na emɛ; vɔɔ, Mawu bayi inu ɖuɖu enɛlɛ , na inuɖitɔ éxé mɔ kunnu jɛ xonugbolɔ go lɛ nɛ nɔ ɖu gɔdo ekpɛdido. ⁴ Ɖo inu éxé Mawu bayi lɛ tɛtɛ e jɔhun, gbɛ ego kpego wa do ti esɛn na mɛti e; tɛtɛ e ɖo wa yi gɔdo ekpɛ dido. ⁵ Ɖo Mawuxo gɔ eɖɛ xixo na inu tɛtɛ mɔ tlɔ zun inu kinkɔn. ⁶ Nɛnyifan o kplɔn inu enɛlɛ nɔnvilɛ ɔ, ola nyi Klisu Yesu e mɛsɛntɔ ɖagbɛ, ma ɖexlɛ fan inuɖiɖixo gɔdo inukplɔn emɛxo titewungbe éxé o xwedo lɛɛ ɔ, eyɛlɛ e nyi gbigbɔmɛ e nuɖuɖu nɛ. ⁷ Ma setonu na lulunɔ etan éxé nyɔxonɔ nɔ kpikpi nɛ tɔn, gbɛ ego sɔgbe gɔ inuɖiɖilɛ e, mɔ kpɔn iɖe do cicwɔ na Mawu e olɔji. ⁸ Agbazamɛ e gandido ɔ, inu mɛmɛyi nɛ; vɔɔ inu vitintin nɛhwlɛn jɛn emɔ jɔjun na; ayimɛ e hinhlɔn mɔ jɔhun na inu tɛtɛ, ɖo e do akpa na mi fan mila mɔ egbɛ tɛntɔn, gɔ éxé zwan fe. ⁹ Xojɔxo lokpo wenɛ, e mɔ sɔgbe fan emɛtɛtɛ ni yi ganjiganji. ¹⁰ Inu enɛ wutu mi lo nɔ wa idɔn, mɔ nɔ hlɔn, ɖo minɔ ɖokun wu Mawu gbɛgbɛ éxé nyi Emɛhwlɛngantɔ gbɛtɔlɛ tɛtɛ etɔn, ɖe taji ɔ, Mawu gbɛgbɛ éxé nyi Emɛhwlɛngantɔ gbɛtɔ éxé ɖinu na Klisu lɛɛ etɔn ɔ, eyɔ mi nɔ ɖokun. ¹¹ Inu éxé o ɖo wa lɔ nɛ, mɔ gɔ kplɔn lɛɛ wenɛ. ¹² Ma lwɔn na mɛti ni mɔ vikpɛvu itɔn e. Mɔda ehwɛ nɛ e. Vɔɔ, nyi kpwɛ na inuɖitɔ lɛɛ tɛtɛ, mɔ nyi kpwɛ ɖe ixo lilɔmɛ, mɔ nyi kpwɛ ɖe zinzan gɔdo wannyinyi kpo mɛ, mɔ nyi kpwɛ ɖe inuɖiɖi gɔdo egbɛ kinkɔn éxé ozan lɔ fe mɛ. ¹³ Feto walo wa ɔ, wlibo na Mawuxo xixlɛ ɖe ogunmɛ, gɔdo Mawuxo lilɔ go, mɔ gɔ kpekun do inukplɔn emɛ go. ¹⁴ Ma ɖekɔ ɖe inunina éxé ɖe isi go, Mawu mɔ nɛ ɖe gan éxé mɛ ewɛnzangun Mawutɔn lɛɛ lɔ Mawuxo, ogunmɛxo lɛɛ mɔ ɖ'olɔ takun nɛ e. ¹⁵ Kpekun do inu enelɛ go, mɔ yi iɖe yina inu enɛlɛ, na emɛtɛtɛ ni mɔ kunnu jɛ owunkɔn sisɔn itɔn go. ¹⁶ Yi ayi ɖo iɖe go, mɔ yi ayi do inu éxé onɔ kplɔn emɛ go. Wlibo na inu enɛlɛɛ tɛtɛgo; ɖo nɛnyifan onɔ wanu etɔnɛ ɔ, ola hwɛn iɖe gan, ma hwlɛn emɛ éxé nɔ ɖoto wi lɛɛ tɛtɛ gan.