¹ E se mɛlɛ mɔ ɖe lilɔ tɔn zɔn yilɛ tɛtɛ fan mi nɔ lɛ oga , oga lilɛ enɛ mɔ syɛn tawun. Gbɛ emɛ éxé go wa Klisu sɛntɔ lɛ e le ɔ go kpego wa wanu etɔnɛ fe. Xonugbo ɔ, e fan emɛ ɖe mi mɛ mɔ yi etɔ si. ² Inu ɖe etɔnɛ co mi go gbɔjwɛ e , mɔ gɔnɔ yi ogo, emɛ éxé bayi inu enɛ ɔ ɖe mi wa ɖetɛn ɖe mi cɛncɛnmɛ. ³ Inyɔ, na gɔ dɛn do mi ɖe agbazamɛ, ɖe gbigbɔmɛ ɔ, iɖe kpwɛ gɔ mi mɔ nɔ da ehwɛ na emɛ éxé donu enɛ sin ɖe Mawu mitɔn Yesu KLISU e nyikɔ mɛ; ⁴ nyɔ tete gbɛtɔ lɔ e ɖe cɛncɛnmɛ na mi. Gan éxé mɛ mi wa bɔɔ, la nɔ kpwɛ gɔ mi ɖe gbigbɔ mɛ. Gan enɛmɛ ɔ, Mawu mitɔn Yesu e hihlɔn la nɔ cɛncɛnmɛ na mi. ⁵ Enɛ ɔ, mi la jo dahwe enɛ na lɛgba na e agbaza nɛ gble, na Mawu nɛ hwlɛn e gbigbɔ gan ɖe Mawu azan gbe . ⁶ Ogo éxé mi nɔ yi ɔ go nyi inu ti e, mi nyɔ olo éxé: "amafɔnnu vitin lɛhwlɛn jɛn fɔn lofin éxé nyan ɔ tɛtɛ. ⁷ Mi ɖe ehwɛ huhu e lofin fɔnnu xoxo enɛ ɔ sɛ na mi lo tlɔzun lofin nyinya yɔyɔ. Lofin nyinya yɔyɔ exé mɛ lofin fɔnnu go ɖe e le ɔ mi nyi . Ɖo Yesu e wa xweɖuwenya e alɛnvi ɔ lo sa ovɔ. ⁸ Eɖe etɔnɛ ɔ, mi mɔ na a mi ɖu mi xwe; mi ma yi kpɔnnɔ éxé wa ehwɛ huhu e lofin fɔnnu gɔ ogalilɛ e lofin fɔnnu lo ɖu xwe ɔ e, mi yi kpɔnnɔ éxé lofin fɔnnu go ɖe ɔ e le lo ɖu. Kpɔnnɔ enɛ ɔ, kinkɔn gɔ xonugbo e kpɔnnɔ nɛ. ⁹ Nɔ byɔ mi ɖe xoma éxé i ɖo loxlan mi ɔ mɛ fan a mi ma gɔ kpe nuti gɔ ogalɔtɔ lɛ e; ¹⁰ e go wa ogalɛtɔ nujlotɔ, ajotɔ alo yɛhwesɛntɔ egbɛ éxé mɛ tɔn kpaa lɛ xo nɔ lɔ e; nɛ fan mi la cwɔ na emɛ enɛ lɛ tɛtɛ ɔ, egbɛ lɔ mɛ jɛn mi wa tɔn ɖe. ¹¹ Inu éxé nɔ lɔ na mi tɛn ɔ e wa fan a mi ma kpedo inu ti gɔ emɛ éxé lɔ fan eyɛ wa Klisusɛntɔ mɔ nɔ ogalɛtɔ, alo mɔ nɔ emɛnujlotɔn, alo mɔ nɔ yɛhwe sɛntɔn, alo mɔ nɔ adanu lɔtɔn, alo mɔ nɔ ahannumutɔn, alo mɔ nɔ ajojɛtɔn e. Mi go ɖo a ɖunu tete gɔ emɛ etɔnɛ kɔ ha lɛ e. ¹² Emɛ éxé go wa Klisu sɛntɔ lɛ e le ɔ, inyɔ go nɛ wa da ehwɛ nɛ e; Mawu e wa da ehwɛ nɛ. Vɔɔ, mi hɛn ɔ, mi la tɛn kpego lo da ehwɛ na emɛ éxé nyi mi ogunvilɛ ? ¹³ Vɔɔ , kɛn Mawuxo Xoma lɔ ɖo ɔ: " mi ɖe emɛ dida lɔ ɖe mi cɛncɛn" .