¹ La gɔ lɔ xo vile na mi do ixwa éxé e jɔ do emɛɖedovo Mawu etɔn lɛ e takunmɛ ɔ go: mi wanu ni sɔgbe gɔ kɛn ilɔ na ogun exe ɖe Galatii lɛ fan nɛ bayi ɖo ɔ. ² Azan tantɛn éxé ɖe Aklunɔ zan gblamɛ tɛgbɛ ɔ, mi mɛ lokpo lokpo ɖo wa ɖe ixwa dovo kɛn mi mɔ ixwa ɖo ɔ, mɔ kɔ ɖawanɖe mi osin lɛ mɛ nɛ ni mawe nyi gan éxé mɛ la we wa ɔ eyɔ ela we jɔ ixwa e. ³ Gan éxé mɛ la wa ɔ, la wlan xoma do asi na emɛ éxé mi wa ɖe lɛ, mɔ ɖwe loxlan Jeluzalɛmu, kewun emɔ bɛ mi nunina lɛ la na. ⁴ Nɛ e byɔ fan nyɔ fe la sɔn, ela xwedo lo sɔn. ⁵ La wa mikɛ, la zɔn Masedwani lo wa; ɖo la zɔn ito enɛmɛ lo nya. ⁶ Bɔya itɛn nɔ mikɛ vile ; tanyɔɔ itɛn nɔ hinnɛ vivɔ e ganmɛ ɔ tɛtɛ; enɛ ɔ la sɔn xilele kpokpwe ɔ mila dolɔ wu mɔ sɔn. ⁷ Ɖo i go jlo a we kpɔnmi kpowun, mɔ nya e. Nɛ ejlo Aklunɔ, nɔ bu fan la we nɔ mikɛ na ganmɛ vile. ⁸ Eɖé etɔnɛ co, inyɔ fan la nɔ efɛzi gbɔn la jɛ Pantekotu gbe. ⁹ Ɖo kɛntɔ lɛ su; Mawu mɔ hunmɔna ɖe xinnɛ, kewun mɔ wa idɔn gbo ɖehwlɛn, kewun inu ɖagbɛ mɔ tɔn ɖemɛ. ¹⁰ Nɛ timɔtée wa ɔ, mi bayi do nɛhwlɛn nɛ cicwɔ nɛ ma hwi ɖe mi cɛncɛn e; ɖo enɔ wa Aklunɔ dɔnlɔ ɖi onyɔ kɛ mɔɖe. ¹¹ Mɛti ni ma ɖekɔɖego e; hugan wu etɔnɛ ɔ, olɔ eyi mi wa dwe, kewun emɔ sɔn tomɛ gɔ fifa ma tɛn kpego lo lɛkɔ lo wa unkɛ, ɖo i ɖete kpɔn eeyɔ gɔ e nɔvi lɛɛ. ¹² Mi nɔvi Apolosu ɔ, jɔnɛmu le eyi emɔ na okɔnkpikpan eyɔ gɔ e nɔvi ɖetɔlɛ fan nɛwa mikɛ; vɔɔ, oo jlowe kwin lokpo fan ni wa tɛn e; eɖe etɔnɛ co, nɛ emɔ we mɔ emɔɔ, ela wa. ¹³ Mi nɔ aceji; mi lido ɖe inuɖiɖimɛ; mi ɖo okɔnkpinkpan; mi do hinhlɔn. ¹⁴ Mi bayi inu tɛtɛ gɔ wannyinyi ! ¹⁵ Nɔvilɛ mi, mi nyɔ sitefanasi gɔ e hɛnnu: minyɔ fan, ɖe Akayi ɔ, eyɛlɛ eyi enyi emɛ tantɛn éxé tlɔjɛ Klisu e mɔji, mɔ jo eɖe do na emɛɖedovo Mawu etɔn lɛ ɔ. Nɔ byɔ mi fan, ¹⁶ Mi ze miɖe yi hwe na emɛ etɔnɛkɔ halɛ, gɔ emɛ éxé nɔwa idɔn gɔɖe lɛ tɛtɛ. ¹⁷ Exe Sitefanasi gɔ Fɔtunatusi, gɔdo Akayikusi wa ɔ, imɔ jijwɛ, ɖo xie maɖe mitɔn edo éxé i jɛ ɔ, e we ɖwɔ mi; ¹⁸ e bayi kewun un ayi mɔ jɛdo kɛn e bayi kéwun myɛfe mi ayi mɔ jɛdo ɔ. Emɛ etɔnɛ kɔ halɛ ɔ, eɖo a nyɔ kɛn eɖo a nɔ kpɛɖo ɔ. ¹⁹ Ogun éxé ɖe ito Azi etɔn mɛ lɛ dogbe loxlan mi. Akilasi gɔ Plisilu gɔ ogun éxé bɔ ɖe e osimɛ ɔ dogbe gbo le loxlan ɖe Aklunɔ mɛ. ²⁰ Nɔvi éxé ɖe xielɛ tɛtɛ dogbe loxlan mi. Mi ki nɔvi nɔvi e si lo dogbe na miɖe. ²¹ Xogbe éxé ,éxé mi na xlɛ tɛn ɔ, inyɔ tete eyi un olɔ lo wlan: inyɔ Pɔlu dogbe loxlan mi . ²² Nɛ mɛlele go nyiwan na Aklunɔ e le ɔ, aheelu ni ! Aklunɔ mitɔn na wa! ²³ Majɛna Aklunɔ Yesu etɔn ni nɔ kpwɛ gɔmi. ²⁴ Un wannyinyi ɖe kpwɛ gɔ mimɛ tɛtɛ ɖe kpwɛ éxé mi ɖe gɔ Klisu Yesu ɔ mɛ.