¹ Pɔlu va Dɛbu kpo Listre agba, mi kpɔn onu kplanvi ke ye nɔ yɔ bio Timote can bo le blɛ bo nyi nyɔnusi jufu tɔ ke ɖo xɔse, otɔ nyi glɛku tɔ. ² Nɔnvi ke le Listre kpo Iconu ye ɖe kunnu nyɔɛn do e wu nɔ. ³ Pɔlu jro na kple yi oto bu mɛ, e kple bo gbo ada ni do jwufu ke le oto xin ye mɛ wu ɖo ye mɛ bi nyɔɛn bio otɔ mɔ nyi grɛku tɔ ⁴ Gan ke mɛ ye gbɔn oto ye mɛ nɔ, ye ɖo gbe su cɔci ye ji nɔ bio ye mɔ zɔn do gbeta ke Mawu we ɛmɛdidɔn tɔ ye kpo ɛmɛ xixo Jeluzalɛmu tɔ ye wlan ɖo nyi. ⁵ Ye do hɔnhlɔn wu cɔci le xɔse mɛ nɔ ye bo o jɛ e ji nɔ gbe zɛ tɛ gbe ⁶ Pɔlu kpo ɛmɛ etɔn ye gbɔn Fligi kpo Galasi we kan sin mɛ, yi we godo ɔ gbigbɔ ɖedovo xɛ omɔ na ye na ye hɔn na lɔ Mawu xo le ogleto Azi tɔn mɛ. ⁷ Ke ye tɛ kpɔ Misi, ye kan na ɖyɛ Bitini vɔ gbigbɔ Yesu tɔn mɔ gbɛ na ye. ⁸ Ye gbɔn Misi do ɖyɛ Traosu we oto xomɛ. ⁹ Pɔlu ku odro le ozan mɛ: maseduanutɔ ɖe le ote le blɛ, bo yɔɛ nɔ bo lɔ nɔ:« Va meseduanu a do gɔ-ɔ ɔlɔ na mi.» ¹⁰ Gan ke mɛ Pɔlu ku odro, zɔnɖokpo ɔ mi sɔ gbeta ado yi Maseduanu mi nyɔɛn bio Mawu mɔ yɔ mi a do lɔ Mawu xo na ye. ¹¹ Mi dyɛ otɔji hun mɛ sɔn Trausu mi gbɔn omɔ jijɔ na Samatracu, azan ke xo dwue mi va Neapolisu. ¹² Sɔn blɛ, mi yi Filipu ke nyi oto xo Maceduanu tɔn, toxɔ ɖe kɔn ŋkumɛ xin ɖe wɛ e nyi le rɔmawe oto gun mɛ. Mi nɔ blɛ ozan yɔywuɛ ɖe. ¹³ Mi tɔn le oto ɔ mɛ le sabatu we azan gbe, mi bo yi otɔ ɖe to ke mi buyi nɔ bio fiɖe mɔ le ye bo nɔ xo ɛɖɛ le. Mi hɔn nyɔɛn bo lɔ oxo na nyɔnusi ke bɔ le blɛ ye. ¹⁴ Nyɔnusi ɖe le ye mɛ ke ye nɔ yɔ bio Lidi, ke nɔ sa ɔvɔ le Tiati we toxo mɛ ye bo nɔ sɛn Mawu, e ɖo oto mi nɔ. Xwetɔ hun oji ni na a ɖo oto wu oxo ke Pɔlu olɔ nɔ. ¹⁵ Gan ke mɛ e wasi nyinylɔ yi kpo yi xwe, e biɔ onu wu mi bo lɔ:« Na mi kpɔn bio ko mɔ jɛ na Xwetɔ, mi va oxwe tɛ ye gbe a bo nɔ blɛ. E bo vivɛ na mi nɔ. ¹⁶ E va e mɛ, ke mi sɔ nyi fi ke ye nɔ fan okwe le ɔ, nyɔnusi vi ke ɖo gbigbɔ yɛxue tɔn va kpe mi. E nɔ hɛn oho susu va na yi we ga ye na e kpɔn onu na ɛmɛ ye. ¹⁷ Nyɔnusivi ke le ɛtɛ na mi ye kpo Pɔlu bo do aha bo lɔ nɔ:« Ɛmɛ ke ye nyi odansɔtɔ na Mawu ke le oji ŋkunsin. Ye na hlɛ omɔ hlɛn gan tɔn wu mi.» ¹⁸ E wasi e mɔ na azan susu. Vɔ ke aɖi wle Pɔlu hunu ɔ e lɔ na gbigbɔ:« Ko lɔ na we nɔ gbɔn Yesu Kliso we nyikɔ mɛ bio yi mɔ tɔn le e mɛ. ¹⁹ Gan ke mɛ yi we xwetɔ kpɔn bio gbigbɔ ke le e mɛ a bo ba oho na ye m tɔn le e mɛ ɔ, ye wle Pɔlu kpo Silasu bo dɔn ye yi gbaja ji oximɛ tɔn do ŋkɔn na oto ŋkunsin ye. ²⁰ Ke ye kplɔ ye yi ɛxɛɖɔtɔ ye we ŋkɔn, ye bo lɔ nɔ:« Jwufu tɔ wɛ nyi mɛ klɛ ye, ye bo do hunyan hunyan oto ɔ mɛ nɔ. ²¹ Ye o kplan onu ke hɔn jɛ ye nɔ. ²² Oto gun ɔ site do Pɔlu nkpo Silasu wu, kojo ɖotɔ ye bo vun onu le ye wu bo na ogbe bio ye do oha na ye. ²³ Ke ye do oha na ye li vɔ;, ye sɔ ye do ogan kpa mɛ ye bo lɔ na ogan cɔtɔ bio ni mɔ cɔ ye nyɔɛn ɖe. ²⁴ Ke ye ɖo ogbe su e ji, e sɔ ye bo sɔ ɖo dodomɛ na gankpa ɔ bo do caba ɔfɔ kpo ɔlɔ na ye. ²⁵ Ozan na ma ha, Pɔlu kpo Silasu o fan okwue bo ji ohan na Mawu nɔ. Ɛmɛ bu ke le gan kpa mɛ ye bo se nɔ. ²⁶ Ŋkunsi ɖiɖe ɖokpo mɛ ɔ ŋkundan hun hun kpo hɔnhlɔn dodwue gan kpa tɔncan bo hun hun, zɔnɖokpo ɔ ohɔn ye bo hun, caba ye bo gbo le gan tɔ ye wu. ²⁷ Ogan cɔtɔ va fɔn le ɔwlɔn mɛ bo kpɔn ohɔn ye mɔ le hunhun. E sɔ akpamɛ xi bo na hu yi ɖe ɖo e bwui nɔ bio ogantɔ ye bi mɔ tɔn ha. ²⁸ Vɔ, Pɔlu do axa ɖaxo ɖe bo lɔ:« Ka wa onu nyinylan kpo ɖi we do mi mɛ bi le bwuɛ.» ²⁹ Ogan cɔtɔbio ozo, caca e bo ɖyɛ e mɛ, vivo wi nɔ gbun e bo hunhun nɔ. E va jɛ ŋkɔn na Pɔlu kpo Silasu . ³⁰ E bo ɖe ye tɔn le blɛ bo lɔ: « Xwetɔ, ŋnyi ko na wa a do kpɔn wlɛngan.» ³¹ Ye bo lɔ ni:« Kando Xwetɔ Yesu ji, yi kpo oxwe tɔ we na kpɔn wlɛngan.» ³² Ye lɔ Mawu xo na yi kpo mɛ ke le yi xwe. ³³ Le ozan ɔ mɛ ogan cɔ tɔ kplɔ ye bo ve klɔ abi ye na ye, zɔnɖokpo ɔ e wasi nyinylɔ yi kpo yi xwe. ³⁴ E kplɔ Pɔlu kpo Silasu do yi i xwe bo wasi onu ɖuɖu na ye. Yi kpo yixwe bo kpɔn jijuɛ ɖaxo ɖe nɔ, do ye xɔse do Mawu ji. ³⁵ Ke ŋkɔnɖe, kojoɖotɔ ye dɔn ɛmɛ do dan ogan cɔ tɔ bio ni mɔ:« Jo mɛ hlɛnye do.» ³⁶ Gan cɔ tɔ va lɔ oxo ɔ na Pɔlu bo lɔ ni nɔ:« Kojoɖotɔ ye sɔ ɛmɛ ɖo dan bio ko mɔ jo mi do na mia mɔ sɔn; siɛ ɔ, mi tɔn a bo sɔn le fifa mɛ.» ³⁷ Vɔ Pɔlu bo lo na ye nɔ:« Ye xo mi le oto gun mɛ, mi ye hlɔma tɔ, mi ko wa nu ti. Ye sɔ mi do gan kpa mɛ siɔ, ye bo ɖe mitɔn nɔ ke mɛ ɖe hɔn nyɔɛn nɔ. Hoho, e mɔ xɛn! Ye ni va, ye tete mɔ jo mi do.» ³⁸ Gan cɔ tɔ ye ve lɔ oxo xin na kojoɖotɔ ye, ye va gan kpa mɛ ye se bio hlɔmatɔ ye mɛ ye Pɔlu kpo Silasu mɔ nyi. ³⁹ Kojoɖotɔ ye va bo ɖe kuku na ye bo ɖe ye tɔn le gan mɛ ye lɔ na ye Pɔlu kpo Silasu bio ye mɔ tɔn le oto ɔ mɛ. ⁴⁰ Pɔlu kpo Silasu ke ye tɔn le gankpa mɛ ye sɔn nyi Lidi xwe Pɔlu kpo Silasu bo kpɔn nɔnvi le xɔse mɛ, ye bo do kpa kpa wu ye yi we godo ɔ, ye bo lɛ le otoɔ mɛ.