¹ E nɛ godo un gɔ mɔ wɛnzangun Mawutɔn hɔnhlɔn nɔ bu, wɛ e jɛ ote sɔn sɛxwe, sun wɔye bo butu-i, a nyiɖohwɛɖo bo lɛdo ota etɔn, nukun mɛ etɔn le klɛn xɔn ɖi ohwe ha. Afɔ etɔn lɛye le ɖi gundotin xeni le ji ozo xɔn ha. ² E hɛn wema ovuɖe do alɔ mɛ, wɛ wema lɔ le hunhun. E sɔ aɖusi we afɔ etɔn sɔ ɖo àxu ji, bo sɔ amyɔ fɔ etɔn sɔ ɖo anyizan ji. ³ E le axwa nu lelele ɖi kinikini ajaŋuta wɛ le ɖe ogbe xɔn ha. Xena e do axwa, jokun do ogbe hla canwe. ⁴ Xena jokun do ogbe hla canwe, un ja onu xena ye le ɖɔ xɔn lɛye winwlan gbe kpo kpoŋu, un se ogbe ɖe ɖi le sɛxwe bo ɖɔ mɔsin: "Cɔn onu do oxo xena ogbe jokun canwe tɔn lɛye ɖɔ ji a bo nɔ kpɔn wlan ye gɛ. ⁵ E wɛ wɛnzangun Mawutɔn xena un mɔ le ote le oxu kpo anyizan ji kpo lɔ dlɛn aɖusi lɔ etɔn ɖoxlan sɛxwe, ⁶ Bo xwle Mzwu xeni le ogbɛ kaka do yi mavɔ mɛ omɛ xeni da ojinukun kpo xeni le e mɛ lɛye, bo da anyizan kpo onu xeni le e ji lɛye, bo gɔ da oxu kpo onu xeni le e mɛ lɛye, e ɖɔ:"Ganmɛ ɖe ma gɔ le ba gɛ". ⁷ Vɔ, gbexegbe na wɛnzangun canwe gɔ lɔ na wa kun okpɛn, hwenɛnu wɛ tito Mawutɔn xena ye mɔ nɔ odo na gɛ, na wa ci cɛmɛ ɖi ɖena e o ɖɔ ɖo na ozɔnwatɔ etɔn ɖɔɖanyiɖɔtɔ lɛye ha. ⁸ E nɛ godo, ogbe xena un se le sɛxwe lɔ, gɔ ɖɔ oxo na-un bu ɖɔ mɔsin:" Wa yi yi wema ovu xeni le hunhun le alɔ mɛ na wɛnzangun xeni le ote gaga le oxu kpo anyizan ji lɔ si. ⁹ Wɛ un yi wɛnzangun lɔ ɖe bo ɖɔ ni-i ɖɔ ni bo sɔ wema ovu lɔ na-un. E ɖo e go na-un ɖɔ:" Yi-i, a bo ɖu-i, e na vivi le onumɛ na we di owin ha, bo na vɛ le dɔmɛ na we". ¹⁰ Un yi wema ovu lɔ le wɛnzangun lɔ si bo ɖu-i. E vivi le onumɛ ce ɖi owin ha, vɔ xena un mi-i, e vɛ kpakpa le ɖɔmɛ na-un. ¹¹ E wɛ ye ɖɔ na-un ɖɔ mɔsin: A ɖo na ɖɔ oxo xena Mawu ɖɔ do oto susu,otogun susu,ogbe susu kpodo xɔlu susu go.