¹ Nyɔ̀, agun mɛxó, xé lé wlàn nǔɖóxlàn Gayiwúsi, ² Wannyínánɔɔ xéná un nyi owan ná le oxójɔxó mɛ. Wannyíná́́nɔɔ, un jlo ɖɔ́ɔ a na yi nukɔn le onu lɛ́ kpókpó mɛ; lanmɛ tɔwe ní nɔ́ ganjí ɖi ɖě oklá tɔwe le ganjǐ ɖó há́. ³ Xéná nɔvǐ yisénɔ́ɔ lɛ yéè wá bo wa ɖé kúnnú dó oxójɔxɔó xéni lé yɔ mɛ lɔ́, kpódó ɖě ná a nɔ zɔn dó oxójɔxó lɔ́ jí ɖó, éwɛ dò jijwɛ náwún táwun. ⁴ Jijwɛ ti má gɔ xúgǎn jijiwɛ xéná un nɔ mɔ, ná ún sé ɖɔɔ, vikpɛ́ cé lɛ yé bó lé zɔn zɔnlin gbɔnlin gbɔn oxójɔxó lɔ́ mɛ́ xɔ́ɔn. ⁵ Wannyínánɔ́ ce, a le ogbejǐ le onú xéná a nɔ blǒ ná nɔvǐ yisénɔ́ɔ lɛ yé mɛ, káká jɛ nɔvǐ jonɔ́ɔ lɛ́ɛ̀ cán ji. ⁶ Ye ɖè kúnnú ná wannyinyi tɔwe le agun nukɔn. Ni ná gɔ do nyɔ́ ɔ́, onu xéní nyí hudǒ yetɔn na ohwɛnzizɛ lɔ́ɔ̀, ná yéè, ɖi ɖé ná é jɛ̌ Mawu ɖó há. ⁷ ƉóJesu Klisi Wé nyikɔ́ wútú wɛ ye do sɔ́n, bo ma yi onutí lé kosi yè si gɛ́. ⁸ Mi ɖó na yì omɛ lemɔ́ há tɔ́n lɛ́ɛ̀ yé wé jonɔ́ɔ, énɛ́ nyí ozɔ́n mitɔ́ɔn xá yéè na oxojɔxó lɔ́. ⁹ Un wlàn oxógbe ɖe lɛ́ɛ̀ ɖóxlán agun lɔ, vɔɔ̀ Diotrɛ́ƒu xe jló ná nɔ́ nyì nukɔn nɔtɔ́ɔ̀ le ye mɛ mɔ nɔ yi mi gɛ. ¹⁰ É wɛ́ zɔ̀n, ná un wá mi de, na ɖɔ́ onu xéná é ń blò gbɔn oxó nyínyláàn ɖiɖɔ dó mí go. ¹¹ Wannyinánɔ́ ce, nɔ kpɔ́ kpɔ́ do onu nyinylán blibo go, á bó dò blò gɛ̀. Vɔ, nɔ bló onu nywɛ. Omɛ ni nɔ bló onu nywɛ ɛ, sɔn Mawu de. Omɛ xéni nɔ blo onu nyinylaan, ma mɔ Mawu kpɔn gɛ. ¹² Omɛ sésé kpó oxojɔxo lɔ kppo nɔ ɖe kúnnú ɖágbwɛ dó Demetrisi go. Miyé can gba nɔ ɖè kunnù dó é go; wɛ a nywɛ dɔ́ɔ kúnnúmitɔn lɔ̀ bo nyí oxojɔxó. ¹³ Onu susu lée wɛ un hɛn na wlan ɖoxlan we, vɔ un ma jlo na wlan kpodo onuwlansin kpodo onuwlantin kpo gɛ. ¹⁴ Un le nukun ɖiɖo mɛɛ bo na do mɔ we zaanɖě, wɛ mi ná kpè nukún mɛ á dó ɖɔ́ oxó. 15 Fífá nínɔ́ okpɔ́ xá we. Hadwé lɛ́ɛ̀ dó ógbe ná wée. Dǒ ógbe nǎ hadwé mitɔ́n lɛ̀ cán ɖokpó - ɖokpó.