¹ Vikpɛye, mi se tonu na miatɔ kpo mianɔ kpo ɖi kena Yesu jlo ɖo ha, ɖo onu ke sɔgbe ganji wɛ enyi. ² Si didawe kpo nawe kpo; (osɛn tantyɛn ke Mawu fya ajɔgbe d'eji xɛn xin), ³ * na onu a do nyɔ na we, o mɔ do dɔji a bo ɖo oxwe susu le ŋidanji keŋu gbowe a do ku.* ⁴ Miye ɛmɛjitɔye, mi ko mɔ nɔ do xomɛsin na vikpɛ miatɔnye. Amɔ mi nɔ kplan onu nywɛ ye wu ye kpo do okplan Xwetɔ lɔ tɔn kpo. ⁵ Miye ɛmɛ xixɔye, mi se tonu na cica miatɔn ke le ŋidan ji kpodo ɛmɛ sisi, a bo nɔ titɔ kpo vivɔ kpo le onu kpikpe ke sɔn oji miatɔnye mɛwiwa wu. Mi se tonu naye ɖi Klisu ha. ⁶ E hɔn nyi hwekenu na ye cɔ mi nɔ hwɛn mi na nɔ ɖo sisi naye a do nyɔkpɔn le ŋumɛ yetɔn o. Vɔ mi se tonu ɖi ɛmɛ xixɔ Klisutɔn ye ha. Mi nɔ wasi ojlo Mawutɔn kpo oji miatɔnye bisese. ⁷ E hɔn nyi gbɛtɔye hwɛn mi wa odan na nɔ, hun mi bo wa odan na cica miatɔnye ɖi Klisu wɛ mi wasi na nɔ ha. ⁸ Mi ɖo na nywɛn tun odan onywɛn ke gbɛtɔ wasi ye bisese, e na va yi axɔtu etɔn le Xwetɔ lɔ si, ɛmɛ xixɔ alo ɛmɛ vɔvɔ. ⁹ Mi mɛ xwetɔye, miye can, mi zan jijɔ exinye ha do yi ɛmɛ xixɔ miatɔnye kɔn. Mi jo adansinsin do, mi mɔ nywɛn tun, miye kpodo ɛmɛxixɔ miatɔn lɛye, Xwetɔ ɖokpo gee wɛ mi ɖo, e bo le sɛxwe, e ko nɔ ɖe ɛmɛ ɖe do ovo na ɛmɛ ɖe. ¹⁰ Do yi vivɔnu, mi do hɔnhlɔn lanmɛ na miaɖe le Xwetɔ lɔ mɛ dogbɔn hɔnhlɔn etɔn ɖaxo lɔ ji. ¹¹ Mi sɔ ahwanfunu Mawutɔn bisese sɔ kpla na mia do kpewu a nɔ ote gliŋu le ŋukɔn na omɔ ke na lɛgba nɔ ɖo na ɛmɛye. ¹² Ɖo gbɛtɔ hwɛn mi va fun ahwan kpo nɔ, vɔ, ɛcɛ kpikpaye, ogaɖuɖuye, vuvlu mɛ we hɔnhlɔnye kpo gbigbɔ nylakan kena le jiŋukunsin mɛ ye wɛ. ¹³ I wɛ dɔn mi sɔ ahwanfunnu Mawutɔn bisese a sɔ kpla na mi a do kpewu nɔ ote gliŋu le azan nyinyla lɔ gbe, na mi wa ahwan lɔ vɔ bo ɖu oji can, mi mɔ mɔ le acaji. ¹⁴ I wɛ dɔn, mi nɔ ote gliŋu! Oxojɔxo ni nyi akpakan na mi a sɔ bla alin ji, onu jijɔ wiwa mɔ nyi oganwu mi mɔ sɔ do, ¹⁵ akpakpa a do jla Ɛwɛn Nywɛ kena nɔ hɛn fifa do va lɔ, ni nyi fɔkpa na mi a sɔ do. ¹⁶ Le ogan ɖekpokpwe mɛ, xɔse ni nyi ahwanglɔnnu na mi, mi mɔ nɔ sɔ a do ci ozo na awovi lɔ we kanhwan ozonɔ etɔnye bisese. ¹⁷ Hwlɛngan ni nyi ogangba na mi a sɔ cɔn, Mawu we oxo mɔ nyi dɛnkpwe Gbigbɔ kinkwɛntɔn le alɔ mɛ na mi. ¹⁸ Dogbɔn Gbigbɔ kKinkwɛn ji, mi nɔ xo ɛɖɛ hamɛ-hamɛye a bo nɔ ɖe kuku na Mawu le ogan ɖekpokpwe mɛ. I wɛ dɔn mi nɔ ŋuzɔn a bo do vivɛnu, a bo nɔ xo ɛɖɛ do ota na xɔsetɔye bisese. ¹⁹ a bo xo do ota na bo can; e xin, na va lɔ oxo nɔ, Mawu mɔ sɔ oxo kena ko na lɔ a do ɖe Ɛwɛn Nywɛ lɔ we onumakpɔndona we gonmɛ kpodo ojiɖiɖe kpo a sɔ na. ²⁰ Do Ɛwɛn nywɛ xin lɔ wu, wɛ ko nyi afɔsɔɖotetɔ ke le gankpa mɛ. I wɛ dɔn mi xo ɖɛ na-a, na ma do ɖo ojiɖiɖe a do jla Ɛwɛn Nywɛ xin lɔ ɖi ke na e jɛ ɖo ha. ²¹ Nɔvi xɔsetɔ vɛna-vɛna Ticiki, ke nyi odanwatɔ bo le gbeji le Xwetɔ lɔ mɛ, na va lɔ oxo bisese na mi, e xin, miye can, mi mɔ do nyɔ kena ko le, a bo nyɔ onu kena ko wasi nɔ ye. ²² Onu ke na dɔn taŋu na ko do swɛɛ sɔ ɖodan mi nɔ wɛ nyi tun e na va lɔ kena mí le lɔ, na mi, a bo do fa akɔn na mi. ²³ Mawu Otɔ kpo Xwetɔ Yesu« Klisu ni na fifa, wanyiyi kpodo xɔse wu nɔvi xɔsetɔ bisese. ²⁴ Mawu we »ɛfɛnu ni nɔ kpo ɛmɛ bisese ke ɖo wanyiyi mavɔmavɔ na Xwetɔ míatɔn Yesu Klisu ye.