¹ Baana,lemvugani gwedi bi budi bi binu,nga gwedi Fwumu,mudiambu gwedi gu masonga. ² Lemvuga gwedi Dadagu ye gwedi ngudi woogu(gedi mutshigu wu tegu ye gulungisama), ³ mootsu mu gwendila pimbu ye londi di gifudi. ⁴ Ye binu,ba dada,loo gusaani baana ba binu mu gu bahega kabu haa gu gonda mundonga yi bulemvu mu gu bebisa tshigu dji Fwumu. ⁵ Bahiga,galani ye bulemvu gwedi ba Fwumu ba binu ba gifudi,mu ludjidu luvula ye gu bagidula mu masonga ma mbundu yi binu yiootsu,ba lemvugilani nga guna mbi binu ba pangi ba Kidishidu, ⁶ loo gu lemvugaga guna mbi,baa beni bedi yana mudiambu ye gu huluga mu gieshi,gu mu kiediga galani bulemvu nga bahiga ba Kidishidu,hangani mu mbundu dji binu mu luzolu lu Nzambi. ⁷ Ba sadilani mu mbundu yi binu yiootsu nga bana lu basadila ba fwumu haa loo mbi baadu. ⁸ Yabani mbi gosu mapimbu ma hangaga muudu ma galaga sandadingwadi gwedi fwumu,gu gala mu guhanga mbi wu gondi. ⁹ Ye binu,ba longi,hangagani gidesu gi moshi,gwedi ba higa ba binu,loo ga ba nwanisaga,yabani mbi longi wu binu gedi longi wu baa kega wuna wedi gu yilu,ye gu twalayandi loo gwedi ye wuna wu du fani fanigisa. ¹⁰ Gu ngoyi,waganagani mwedi Fwumu,nga mwedi mu saga ngolu. ¹¹ Vadagani mada mootsu Nzambi,gu ngoyi,mu gu gala ma kadi ga ngolu dji motsu mu gu gonda senda bigatshi bi gadiapemba. ¹² Mudiambu bidumba bi pidu loo biedi shi mu luudu,loo kega shi mu mengi,haa biedi mu gifwumu ye ba fwumu ba ngolu dji muhunga wu gedila,ba fwumu bisalu bi piba,mi hungu_muna kabu mu yilu. ¹³ Bwoona vadani bigatshi bi Nzambi,gu tsuga nga naa lu manana nga bibaga gu twala yi Nzambi mu gilumbu gina gitsuga gu ngoyi yi gu hanga bima biootsu,lu manana nga bi baga. ¹⁴ Bwoona,galani nga bibaga,hangani bwoobu gu ngoyi di gu vada mugaba;wu kiediga ye wu masonga; ¹⁵ hangani bwoobu gu ngoyi gu ngoyi gu saa gumilu mi binu binwaninu bitsambidi bi ngemba; ¹⁶ mu minigusu miootsu galani ye biladu biana bi lugwigilu,bwoona lu fani nunga bigatshi biootsu bi badumushi ye mbwaa da baadu bambi; ¹⁷ Haa vadani puu yilunungu,mbedi yi muhunga yi gu gedila,medi mandaga ma Nzambi. ¹⁸ mu manunga galani dangu diootsu ye mbundu,ye bisambu mudiambu ye ba gwigidi bootsu. ¹⁹ Ye sambani mudiambu ye mii.mu giguma mbi mapandi ma pimbu ma gumaga mu dangu di fani gangula mu ganu,sambagani mbi guleshigisa mundjila dji basambi, ²⁰ Mudiambu ye bisambu biaana yi gumi mweni mabala mengi mu kadi ga mitshigu,gu tsuga mibiaa nga gu guma gu yagula ye ngolu diootsu nga bu fani yagula. ²¹ Haa binu kega nga luyaba mapandi mami ye buni mi yidjingaga,Tishigi,pangi wu bagala wu zolaga ye musadi wu pimbu ye masonga gwedi Fwumu,ga ba lelaga mu biootsu. ²² Yi ludumishi ndi mu giguma gi moshi giana,mudiambu binu mu gu yaba mapandi pidu,haa ndi kega mu gu yaba mbundu dji binu. ²³ Bwoona ngemba,luzolu ye lugwigilu yi lu hamanina gu gabu dji Nzambi wedi Dada ye gwedi Fwumu Yesu Kidishidu! ²⁴ Bwoona ngolu dji lu hanamanina gwedi bootsu bana ba zolaga Fwumu Yesu Kidishidu mu luzolu lu gondaga tsuga!