¹ Kumanima wanjo wa kitanu wa budidi pungi. Nia mweni katumbwa ka bwidihashi. Tsabi wa bukhu dia meya a muhwedi nendji. ² Wa kangudidi bukhu dia meya mwishi wa ninhinhi wa fwana mwishi wa fulu dijima; Tangwa ni muhunga dia bwitidi ku mishi ya kandukanga mu buku. ³ Mukhulu ya mishi apasu awidikidi a bwa hashi, a muhwedi kiyeka kia fwana watha wa mambuta. ⁴ A wa lejidi mu kuleka kuzanga mwangu ni kosu mbutu a ho kosu mutondu kaka kuhanga kubola kwa athu awa alekidi kukhala ni cashe dia Nzambi ku ji mbunzu jowu. ⁵ Ka wa hwediku ndjila ya kujiya athu ena awa, kashi a wa yangishi kasu a ngondi a tanu. Pashi jowu jakhedi mudi ja mwalala kasuma muthu. ⁶ Mu yilumbu yene yina athu a ka henga lufwa kashi ka kafwaku? A ka zola lufwa kashi lwa ka watshina. ⁷ Apasu afwanangananga mudi apunda ahanginini njita. Avwatidi kumitwa yowu yima ya fwanangana ni jikhunga ja wolo, ji mbunzu jowu mudi j'athu. ⁸ Akhedi ni tsuki mudi ja akhetu ni mazewu mudi ma athambu. ⁹ A vwatanga mikaba mudi ya wutadi ni mayema mahela mowu makhedi mudi mayema ma tuminio ni a punda a kunwaninanga njita. ¹⁰ Mikila yowu ya fwanangananga mudi ji thunga ja tuminimini, a khedi ni ngolu ja kuhanga kubola kudi athu a ngondi a tanu. ¹¹ A khedi ni fumu wanjo wa mukalunga. Jina dienji mu ki ebelio dia khedi abadoni, mu ki grek apoloni. ¹² Pashi ja thethi ja hitidi. Tala! Kumanima mambu menama medi makola mezanga. ¹³ Wanjo wa kisambanu wa pudidi pungi yenji, nievidi ndaka yimoshi ya widikilanga mu misengu ya kimenga kia wola kidi kudi tata Nzambi. ¹⁴ Ndaka yakula kudi wanjo wa kisambanu wa khedi ni pungi: " Tusula a wanjo ou awana edi a kukasa mu meya ma Efrate. ¹⁵ A wanjo ou awana a hangimini kikuma kia tangwa dienedina, kilumbu kienekina, ngondi mwenowuna, ni mvula yeneyina a wa tusudidi mukujiya kiatshi kiathu. ¹⁶ thalu ya suta a a punda akhedi khama jadi ja tununu twa mafunda. Nievidi thalu yowo. ¹⁷ Talenu kiehi nia mweni kimona mesu kia a punda ni athu a wa sendanga; yiwinda thulu yowu yakhedi yibenga tamu, mukubu wu bwita ni kusekuluka. Mitwa ya apunda ya fwanangana nieyi ya athambu, mu makanu mowu mwa widikanga thuya, mishi ni muhunga. ¹⁸ Kiatshi kiathu kiafidi ku jipashi eji jisatu: Thuya, mishi ni funji ya widikanga mu makanu mowu. ¹⁹ Kikuma kiyeka kia apunda kiakhedi mukanu diowu ni ku mikila yowu. Mu kutala, mikila yowu ya khedi mudi a niokha ya khedi ni mitwa, mitwayeni ni kuhanganga athu kubola (kulemikanga). ²⁰ Athu asala, awa a lekidi kufwa kupashi jeneji, a baludidiku mitshima kumambu mahangidiowu, a kalekoku kusambila satana ni yiteki ya wola, ya njimbu, ya bronze, ni mayala ni mitondu, yima ya lunga kuleka kumona, kwivwa ni kukiba. ²¹ Kabaluloku mitshima ya yijiya yowo, ya wuloji wowu, ya wunzueji wowu ni wiji wowu.