¹ Polu thimwa wa Yesu Khidishitu kikuma Nzambi mu hulushi wetu ni Yesu Khidishitu wu twenda kushila mutshima nia sodiwa muku khala thumwa. ² Nienda nia sonika kudi ayi Timote mwana emi wa kiedika mu lukwikilu leka khenda mamboti ni ngemba ya Tata Nzambi ni Yesu Khidishitu fumu wetu yi khadi ni ayi. ³ Pila yi nia kulejidi theti tangwa di nia khedi kuhangama mu kwenda ku Macedoine usadi ha Ephese uleji athu ekha aleki kulonga malongi ma ukhubidi. ⁴ Kalongoku yingana yowu ka tangoku epi majina makulu ma akhakha jowu mambu ma kienekina menda kubuta pika mu katshi katu pila lo kisalu kia Nzambi kia lunga kwenda ku twala mukwijika mambu menda kuzola Nzambi athu afeti kukhala ni lukwikilu. ⁵ Kiki mweni nia zola kunu leza nu hangi kiene kina kikuma nu khadi ni luzolu oluna luku katukanga ku mitshima ya vedila ni mabanza ma pimbu ni lukwikilu lwa kiedika. ⁶ Athu ekha enda kulaba mambu mena mana abila njila azola kwakula kaka mambu ma konda fhunu. ⁷ Azola kukhala amalongi a jitshiku ja Nzambi kashi enda oku kubakisa kia mambu enda kwakula ni kulonga athu muki ngolongolu mambu mafeti kuhanga. ⁸ Kashi ejikenu etshi tshiku yenda kukhala ya mboti ivwa twenda twahi hangila mu njila ya kiedika. ⁹ Nwijika etshi kendoku kusha tshiku kikuma kia athu a mboti kashi kikuma kia athu enda kukonda kulaba tshiku ni athu a muthu ngolu athu aleka kwijika Nzambi ni akwa masumu athu akonda lukwikilu ni athu akonda kujitisa mambu ma tadila Nzambi athu enda kujiya atata ni amama jowu athu enda kujiya akowu. ¹⁰ Awa enda kuhanga mbongi amala awa enda kukwelangana athu awa enda kwikinisa apangi jowu ahika akwa ukhubidi awa enda kuta kithemu kia luvunu kia athu enda kuhanga mambu ma bola ma pila ni pila. ¹¹ Malongi ana menda kulaba tsangu ja mboti ja Nzambi wa lukumu ni wa kieshi wa ma pedi muku nilonga. ¹² Nienda niahwa fumu Yesu matondu kikuma mweni wa tsodidi muku khala kisadi kienji kikuma niakhedi muthu wa lemvuka. ¹³ Niakhedi muthu wakhedi kwakula mambu mabola nia mwenisanga athu pashi niakhedi kingolongolu kashi wa ngwivila khenda kikuma niahanganga mambu konda kwijika nia kwikilangoku. ¹⁴ Kashi mamboti menji mejidi kumwekana kudi ami niekhina ni lukwikilu ni luzolu lwenda kukatuka kudi fumu Yesu. ¹⁵ Malongi ama medi ma kiedika mboti athu osu ama kumbudi kikuma Yesu wejidi kuhulusa akwa masumu ami nidi muthu wa hitinginini kubola. ¹⁶ Kashi Nzambi wa ngwivididi khenda Yesu wa kashidi mutshima kikuma kiamemi niekhina mbandu kudi awa osu aku mukwikilanga. ¹⁷ He kudi fumu wa mvula jiosu wa konda kufwanga mweni kaka wudi Nzambi lujitu ni lukumu lu khadi kudi mweni mvula ni mvula amen. ¹⁸ Ivwa mulongi owu ayi Timote mwana wemi etshi nia zola kuhanga kudi ayi mutshindu wakudidi ambikudi tangwa dia thama kikuma kia yeyi makhadi kudi ayi. mudi mata ma kunwanina mijingu ya mboti ¹⁹ Khala ni lukwikilu lwa ngolu ni mabanza ma mboti athu ekha akatula kadi mabanza ma mboti mu mitshima yowu lukwikilu epi akonga. ²⁰ Bosu Hymene ni Alexandre nia wa hana ku mokhu ma Satana muku wa longa etshi ka lungidiku epi ku longa mambu ma mbi sambu dia Nzambi.