¹ Eme pholo mutwadishi wa mabundu dia Yesu Kilisto, mugutshigina gwa Nzambi, enji nu a phangi etu Timote. ² Gu athu adi mitshimi ila phe, nu anetu a mala a tshigina Yesu. Nu wanyi nji anu kita ima ya bonga nu wanyi a nu khala mudimbo dia Kolosaya, khenda nu guhima gwa Nzambi ku kale nu enwe. ³ Tudi mu zwela egi matondo a vula gudi Nzambi, yonu udi Sha yonu udi mu Yesu Kilisto, tu shi mu koza getu go ha gulomba Nzambi mukunda nu enwe. ⁴ Twa vile ndaga ya gutshigina gwenu gudi Yesu Kilisto nu gudi hana gwenu gudi anetu wanyi adi mutshima ula phe. ⁵ Kumbi mwa vile malongi a bonga nu a makielega mumbala ya thomo, mwa vile nji mutshindo mu feto haga mutshima gu ima idi gu mi menga gosa. ⁶ Wanyi adi mu katshi dienu enji nu mu membo enu a gaswe, muphila ya butile mabundu ene vula a mwanganene mu mavu a gaswe, nu gudi enwe nji mutshindo yono kita mu katshi dienu yandiga lusugu mavile malongi a bonga a Nzambi mu mbala ya thomo mwa ijile muphila idi. ⁷ Mwa i longegele mukano dia Epafas munetu yono twa tshigina mwa vula yonu twanu kita nawo midimo ya Kilisto wa jingidila sha tenyi mudimo wa Kilisto mukunda nu eme. ⁸ A tu longele gutshigina nu Pheve inyi tu feto khala nayo. ⁹ Mukunda nu nganyi nu eswe nji, yandiga mu gilumbu ginyi twa vile malongi, twa nu koza go ha gusamba Nzambi mukunda nu enwe, enji ha gulomba ha ulegi mukhale athu wanyi a jiya gu kita luzolo lwenji, mukatshi dia gingambi nu gutema gu a gaswe gwa mukipheve, ¹⁰ Mukunda nu ha gu wenda mu njila ya gubanga Nzambi enji ha gu khala athu wanyi a bonga gu twama dienji, mukunda nu ha gubuta mabundu a bonga mukatshi dia midimo ya gaswe inyi yenji, tu khalenu athu wanyi a kula gale enji a jiya malongi a Nzambi. ¹¹ Mwene mba umi hwa ji ngolo ja vula ja ngolo jienji mu phila egie enwe mukale athu enji nu kiese gia vula ha gu tatamana nu gu kanga mutshima. ¹² Vutulenu matondo a vula gudi Nzambi yonu udi Shetu, yonu wa mi vile ji khenda enji wa mi hwile mitshima ya bonga ha gu ngila mudimbo dienji dia phelegeta. ¹³ Yonu wa tu katudile mu ngolo j'athu a ima ya muphipha ya bala enji wa tu batele gudimbo dia Gifumu gia Munenji yonu wa tu tshigina, Mwene wa tu sumbile khungi etu a gaswe, ¹⁴ mwene wa tu totesele gubola gwetu gu a gaswe. ¹⁵ Mwene Kilisto udi wa fana Nzambi, yonu wa nu monega ndo, mwene Mona wa thomo wa ima ya gaswe inyi ya londeye. ¹⁶ Mukuda mukatshi dienji ima ya gaswe ya londeye inyi idi gosa, nu inyi idi hosha mavu, inyi yo nu monega enji nu inyi yono la gumonega ndo, ifumu ya gaswe, ji ngolo, nu ife ya ufumu, nu manene nu a nene a gaswe nu iyega ya gaswe ya londeye gudi mwene enji mukunda nu mwene. ¹⁷ Mwene udi gu matwama a ima ya ima ya gaswe, enji ima ya gaswe idi mu jinga mukatshi dienji. ¹⁸ Mwene udi mutwe wa mwila wa dibundu dia Kilisto, udi gisendeselo, mwene Yala wa ha thomo wa semegeye mukatshi di'athu a fwa, mukunda ha gu khala muthu wa ha thomo. ¹⁹ Mukunda Nzambi wa tshiginile gu kugisa nu gu wagenesa ima ya gaswe mukatshi dienji, i khale inyi idi hasha mavu nga ndo inyi idi mudilu, ²⁰ mwene wa hanele gu hima, mukatshi dia menga enji hadila mitshi iyadi ya gukikisa. ²¹ Enwe nji, ha thomo makalele ji nzenza enji ji mbeni mukunda nu gubola gu'enu nu mabundu a midimo enu a bola, ²² henyeha mwene wa mi wagenesele mukunda nu lufwa lwenji lwa gu mwila, ha gumi monegesa gu ma twama di'athu wanyi a phelegeta, ²³ gule athu wanyi a kweteye go ha muheto wenji enji eji go nu guba, khalenu wanyi adi a jingidila te mu gutshigina, mu tadi gumanyima go, khalenu athu wanyi a jingidila malongi a Nzambi wanyi ma vile, wanyi a tulongele muthu yonu wa katugile gosa, enji mwene wa ngu hwi eme Pholo, mudimo wenji. ²⁴ Ngu mu mona kiese mu phashi ji ngu mu mona mukunda n'enwe; mukunda nu phashi jene, ji ngu mu mona mu mwila, ngu mu tshigina ngu lungise giteso ginyi gia bega gia Kilisto a monele mukunda nu mwila wenji, udi Nzo-Nzambi. ²⁵ Nga nu di hana mukunda nu Nzo-Nzambi yene nu gu kita gisalo mu phila Nzambi a ngu lezele ha gulonga ndinga yenji, ²⁶ idi ya gudi swega mu tangwa dikima nu mvula jikima, uvi wa ji lezele tangwa didi ²⁷ gwa athu enji, mu phila a tshiginile gumonesa gimvwama gia lukumu mu katshi dia aphagano, nganyi mwa jiya gu haga mutshima egi mwa zula lukumu mu katshi dia Kilisto. ²⁸ Mwene tudi mu longa ha gulonga muthu mukima, nu gu longishila muthu mukima mu gutema gu kima ha gu leza Nzambi, muthu mukima yonu udi wa bwa mukuluphi mu gimvuga nu Kilisto. ²⁹ Nga nu kita gisalo gigi holo dia phashi, uvi ngolo ji ngu mu kitila, ji mu katuga mu ngolo ya Kilisto.