1 Hangima, watamegene alandudi enji kumi nu muyadi, wa ahanene uhinyinyi ha gukaya ivule yabola, nu gusaga misongo yagasue. 2 Tala majina a alongi kumi nu mauyadi. Wagudiangele, Simona umutamegewa egi Phetelo, nu André, phanji'enji; Yakobo, muna Zebede, nu Yone, phanji'enji; 3 Filipe, nu Bartelemi; Toma, nu Matayo, muenya piblike; Yakobo, muna Alfe, nu Tade, 4 Simona muenya gu Kananite, ju Yudasi Iskaliota wadigile Yesu. 5 Anyi adi kumi nu muyadi ago Yesu atumine, hangima dia guahana mikhuala yeyi: Muyigo gukhanda ya ago ashigo enya gutshigina, nu munginyigo mu membo a masamba a gu Samari; 6 Uvi ndienu gudi imeme yatota ya inzo ya Isalele. 7 Ndienu, longesenu, nu zuedienu egi: Ufumu wa mu dilu udi hehi. 8 Sagienu enya misongo, sugisenu enya gufua, wovenu (kolesenu) enya hute, kayenu ivule yabola. Muazangula yagituhu, hanyenu yagituhu. 9 Muzudigo nga wolo, nga falanga, nga makuta; 10 nga sagi mukunda nu njila, nga milele iyadi, nga saphatu, nga muhango; ndaga muenya mudimo wanaheta gudia guenji. 11 Mu membo ako a masamba nga membo azonda ago mba mungina, hudienu gula gudi nu muthu watagana ha gumizangula mu inzo yenji; nu mukhale mu inzo yenji unu mba mukatuga. 12 Nu gungina ngegi mu inzo, amenegienu; 13 nu, gula inzo yene yatshigina gumizangula, guhuima guenu gukhale mu inzo yene; uvi gula inzo yene yatshinyinego gumizangula, na guhuima guene gumivutugile (guvutuge gudi enue). 14 Hago mba atuna gumizangula nu mba atuna guvua mbimbi jienu, zogienu mu inzo yene nga dimbo diene nu lugumunienu heho (fuphi ya) dia malu enu. 15 Ngudi gumiwambela mu giamatshidia egi: mu lusugu lua gusambesewa, dimbo dia Sodoma nu Gomala mba akhala nu guleba gua malamba uvi dimbo diene ndo. 16 Tala, nga mituma gifua imeme mukatshi dia isupha. Khadienu nu gutema gifua nyoga, nu khalenu athu a ashigo nu lulendo gifua mayembe. 17 Khadienu nu gutema gudi athu, ndaga ya athu wawa mba amibata gu isambeselo, nu mba amiwasa (kuphula) tubama (khodi) mu ikombelelo yawo; 18 Mba mukhala ya gumonesewa malamba, mukunda nu ame, gutuama dia guvernere nu gutuama dia mafumu, mukunda nu gukhala temua gudi ene nu gudi athu ashigo enya gutshigina. 19 Uvi, hago mba muhanewa, mba mukhadigo nu gikenene nga gia luholo luago mba muzuela nga gudi mbimbi yago mba muzuela: yago mba muzuela mba imihanewa ha kumbi diene dinyi; 20 ndaga ishigo enue mba muzuela, idi Nyuma ya Shenu mba uzuela mukatshi dienu. 21 Phangi ya yala mba uhana phanjienji ya yala ha gushiyiwa, nu tata mba uhana mona; ana mba bundumuga gudi ashawo, nu mba ashiya. 22 Mba mukhala ya gutunyiwa gudi athu agasue, mukunda nu jina diami; uvi yago mba udindamana unu gu gisugishilo mba ukhala ya guhulushiwa. 23 Hago mba aminonesa malamba mu dimbo dia masamba dimoshi, lengienu gu dimbo diko. Ngudi gumiwambela mu giamatshidia, mba mumaneselago guwenda mu membo a masamba agasue a Isalela uvi Muna muthu mba ukhala weji gale. 24 Mulongeshi ashigo yagubalega longi, nga muenya mudimo yagubalega fumu yenji. 25 Idi yatagana gudi mulongeshi ha gukhala ya gutshitiwa gifua longi dienji, nu muenya mudimo gifua fumu yenji. Gula atamegene fumu ya inzo egi Belzebula, na gikhuatshi mba atamega athu a mu inzo yenji! 26 Mukhadigo nu woma wa athu, ndaga gushigo nu gima gidi gia gusuegewa mba gituna gukhala gia gumonewa, nga ndaga ya gisuegi mba ituna gukhala ya gulondoluewa. 27 Yago ngudi gumiwambela mu phipha, izuelenu mukatshi dia muanya; nu yago idi yagumiwambela mu kutshi, ilongesenu holu dia mayangi. 28 Mukhadi nu woma wa athu adi mushiya muila nu ashigo nu luholo lua gushiya nyuma; uvi mukhale nu woma wa yago udi nu luholo lua gushiya nyuma nu muila mu wina wa tshuya. 29 Ana diga ndo mbodio jiyadi mukunda nu kuta dimoshi? Ndaga, gushigo nga mumoshi wajiya gutota nga gutshigina gua Shenu. 30 Nu sanga jia muto wenu jidi jiagutangewa jiagasue. 31 Mukhadi nu woma : mudi yagubalega funu holu dia mbodio. 32 Mukunda nu ngenyi, muthu yagasue mba ungutshigina gutuama dia athu, mba ngumutshigina nji gutuama dia Shami udi mu dilu; 33 uvi muthu yagasue mba ungutuna gutuama dia athu, mba ngumutuna nji gutuama dia Shami udi mu dilu. 34 Mutangizago egi ngejile mukunda nu gubata (guhana) guhuima ha mavu; ngajilego mubata (muhana) guhuima, uvi phogo ya khusa. 35 Ndaga ngajile muhaga gukhaphumuna gudi muthu nu shenji, gudi muna mukhetu nu ginenji, gudi mukua givaji nu uko wenji wa mukhetu; 36 nu muthu mba ukhala mbalagaji ya athu amu inzo yenji. 37 Muthu yago udi muzumba shenji nga ginenji yagubalega ame gashigo yatagana gudi ame, nu muthu yago udi muzumba munenji ya yala nga wamukhetu yagubalega ame gashigo yagutagana gudi ame; 38 muthu yago ashigo muzangula mutshi wenji wagudikikisa, nu gashigo gunguhata, gashigo yagutagana gudi ame. 39 Muthu yago mba ubamba monyo wenji mba uwutotesa, nu muthu yago mba utotesa monyo wenji mukunda nu ame mba uwuheta. 40 Muthu yago mba umiyamba (umizangula) udi gunguzangula (gunguyamba), nu muthu yago gunguzangula, umuzangula yago wangutumine. 41 Muthu yago udi muzangula muzueledi wa ndaga jia gumatuama ndaga udi muzueledi wa ndaga jia gumatuama mba uheta gishimbigo gia muzueledi wa ndaga jia gumatuama, nu muthu yago udi muzangula muenya masonga ndaga udi muenya masonga mba uheta gishimbigo gia muenya masonga. 42 Nu muthu yagasue mba uhana khuta tshopho dia meya a gunua gudi mumoshi ya mukatshi dia ana wawa mukunda udi mulandudi wami, ngudi gumiwambela mu giamatshidia, mba gatotesago gishimbigo gienji.