¹ Athu agasue adi nu lungonji mu shingo, gifua ahiga ana tala fumu yawo, Gifua muthu ya ginemua giagasue. Adi nayo gutshita ngenyi hagula jina dia fumu nu luholo luetu lukhadigo lua gulelula. ² Hene ahiga adi nu mafumu adi enye gutshigina akhadigo mutuna gutumaga ha guzuela egi tudi aphanji'awo uvi akhale guatshitshila luko muabonga, ndaga ya mafumu adi agukuatesewa gu midimo yawo, adi enya gutshina nu aguzumbiwa. Longesa nu zuela ndaga' eji ³ Gifua muthu udi mulongesa luholo luko gajiyilego gutshigina athu adi mutshitshila Nzambi. Luenyelu mbimbi ya Fumu yetu Yesu-Kilisto gifua ana tshigina ndo gubongesewa gudi guabonga. ⁴ Muthu yowu udi wadizumba gajiya nga gima ndo nu nji udi muenya misongo nu gumana mukunda nu gishina gia ndaga yeyi. Yeyi yana hana gifua lufuto nu guvua nzala ya ima yangane, gumana, gushingana, nu gutangiza ima yabola. ⁵ Gimbalagaji, gidi mukatshi dia'athu nu mitshima yabola. Adi mutuna giamatshidia, adi mutangiza egi gudi luholo lua gubua amonyi. ⁶ Na gubonga mu gusualuga gudi nu luta. ⁷ Tuabatelego nga gima ha mavu, nu tuajiyilego guzangula gima ha guya nagio ndo. ⁸ Luenyelu tukutenu gu ima ya gudia nu milele ya gusudiga. ⁹ Udi ago adi mutshigina gubua amonyi, anabua mu gulolewa, mu muheto umoshi, anabua mu matangi avula agituhu agutotesa mu yagasue yana buisa athu mu gubola nu guzangela. ¹⁰ Ndaga guzumba gua falanga gudi muji wa gubola gua luholo luagasue. athu ako aditshigine, aditotesele gualeha mu gutshigina guawo. ¹¹ Uvi aye muthu ya Nzambi, lenga ima yiyi yagasue, kamba giamatshidia, mu gubonga, mu guzumba, mu gidindamana, nu gutuluga gua mutshima. ¹² Lua ita yabonga ya gutshigina. Kuata monyo wa mayilago gu watamegewe, yakhalele mukunda nu ngenyi, walondolele guyshigina gutuama dia themua jiavula mukunda nu ndaga jidi jiabonga. ¹³ Ngudi gu guhana gutuama dia Nzambi, yago udi muhana monyo gudi ima yagasue, yago wazuelele giamatshidia gutuama dia fumu Philato. ¹⁴ Bamba muabonga mikhuala, gukhadigo gubelesewa unu gumonega gua Fumu yetu Yesu-Kilisto. ¹⁵ Nzambi mba umuenegesa guzoga guenji mu kumbi diabonga. Mba uhana guzela muila, ngolo jimoshi, Fumu yago udi muhinyina mahugo ayadi. ¹⁶ Muene hakhenji mu ndaga jiabola nu wana nginyisa muanya ushigo nu gusugishilo. Nga muthu mumoshi ndo wana gu mumona nga wajiya gu mumona, gudi muene gukhale ginemua nu ngolo jia mayila. Idi ngenyi. ¹⁷ Ngudi mulomba gudi amonyi a ha mavu wawa, hagula akhadigo gudihala nu hagula guhaga ndo matangi gu umonyi wawo, ushigo musaga ndunge jiawo. Gula ndo adi nayo gudifuelela gudi Nzambi.Udi gutuhua umonyi wa mayilago hagula tusuanguluge. ¹⁸ Wambela amonyi ha gutshita gubonga, ha gukhala amonyi mu midimo yabonga, hagukhala nu gisemo nu gukhala nu udikhaledi. ¹⁹ Mu ngenyi mba azangula gisendeselo gia bonga gidi muza gutuama. ²⁰ Timote, bamba yago ya guhuwe, tuna izuele-zuele nu gudinyonga gua guthuhu yago idi mutamegewa mu mambo egi ujiyi. ²¹ Athu ako adi mulongesa ima yeyi nu adi lengesa gualeha nu gutshigina. Egi ngasa ikhale gudi enue agasue.