¹ Na ngudi a muntu Ngayo, mpangi ya luzolo, yina mu kezolaka na kedika. ² Mpangi ya luzolo, munu kena kuzola nge vuanda ya ku toma na mambu nionsompe nge vuanda na mavimpi ya mbote, mutindu kena kutomina muela na nge. ³ Munu tomaka vuandaka na kiese mingi, ntangu ba mpangi kuizaka mpe ba tubaka kimbangi ya kedika kele na nge, na mutindu nge kena kutambula na kedika. ⁴ Munu ikele na kiese yankaka ve kana ku mona ve banaya munu kena kutambula na kedika. ⁵ Mpangi ya luzolo, nge kele ya ku kuikama na yina nge kena kusala samuna ba mpangi, ata na ba nzenza mpe, ⁶ ba yayi tubaka kimbangi ya nzola na nge, na ntuala ya dibundu. Diambu ya mbote nge ke sala, nge sindika bau nzietolo ya vuanda na mutindu ya ku fuana na Tata Nzambi. ⁷ Samu na nkumbu ya Yesu Klisto ba me kuendila, kondua ku baka kima na ba pakanu. ⁸ Beto fueti yamba bantu ya mutindu yayi, samu beto vuanda bisadi kintuadi na bau samunna kedika. ⁹ Mu sonikaka fidiambu na dibundu; kansi Diotelefe yayi ke zolaka kaka ku vuanda muntu ya ntete kati na bau, kena kuyamba beto ve. ¹⁰ Na yau, kana mu zola monana na beno, mu ke bambula beno moyo mavanga yandi kena kusala, na kutubila beto mambu ya yimbi; beto kele na kiese na yau ve, yandi kena kutambula ba mpangi ve, mpe ba yina zolaka sala yau, yandi kena kukakidila bau mpe kukuka bau na nganda ya dibundu. ¹¹ Mpangi ya luzolo, beno tanginina mambu ya yimbi, kansi ya mbote. Yina ke salaka mambu ya mbote kele ya Tata Nzambi; yina ke salaka mambu ya yimbi yandi monaka Tata Nzambi ve. ¹² Beto nionso, na kedika yau mosi mpe, beto kena kutuba kimbangi ya mbote samuna Demetelio; beto diaka, kena kutuba kimbangi samuna yandi, mpe nge me zaba ti kimbangi na beto kele ya kedika. ¹³ Mu zolaka vuanda na mambu mingi ya kusonikina nge, kansi mu zola ve ku sonikina nge na tinta na kilapi. ¹⁴ Ntama mingi mu zola monana na nge, mpe beto ke solola yinua na yinua. Bika yenge vuanda na nge! Ba kundi me pesa nge mbote, mosi na mosi na mutindu na yandi.