¹ Mbuta muntu, na mfumu ya nkento soluaka na bana ya yandi, mu ke zolaka na kedika, mpe yau kele munu mosi kaka ve me zola bau, kansi bayina nionso zabaka kadika, ² samuna kedika yayi me vuanda kati na beto, mpe ke vuanda na beto samuna ba mvula na bamvula: ³ bika nlemvo, nkenda mpe yenge me katuka na Tata Nzambi mpe na Yesu Klisto, Muana ya Tata, vuanda na beno, na kedika mpe na zola. ⁴ Munu vuandaka na kiese mingi na kumona bana na nge ku tambula na kedika, na kulanda nsiku beto bakaka na Tata. ⁵ Mpe na ntangu yayi, kima mu kena ku lomba nge, mfumu ya nkento, ba kena ku sonikina nge nsiku ya yimpa ve, kansi yina beto bakaka ku banda na ntonono, bika beto zolasana ba yayi na bayina. ⁶ Mpe nzola kena kulomba, beto tambula na ku landa ba nsiku. Yau nde nsiku beno fueti landa, mutindu beno longukilaka yau ku banda na ntonono. ⁷ Samu ba mvukumuni mingi me kota na yinza, ba yayi kena kutuba ve kimbangi ti Yesu kuizaka na nzutu. Muntu kele mutindu yina kele mvukumuni mpe antiklisto. ⁸ Beno ki luengisa, samu ti beno zimbisa ve mbutu ya kisalu ya beno, kansi beno baka nsendo ya kufuluka. ⁹ Konso muntu yiname taluka mpe me sikila na ndongosolo ya Klisto ve kele na Tata nzambi ve; muntu yina kele na ndongosolo yina kele na Tata mpe na Muana. ¹⁰ Kana muntu me kuiza na beno mpe me nata ndongosolo yayi ve, be yamba yandi na yinzo na beno ve, mpe beno tuba ve na yandi : Mbote! ¹¹ samu yina ke tuba nayandi: Mbote! me sangana na mavanga na yandi ya yimbi. ¹² Ata munu ikele na mambu mingi ya ku sonikina beno, mu zolaka ve ku tula yau na bisono na ditinta; kansi mu ikele na mabanza ya ku kumina beno, mpe ku tubasana na yinua, samu ti kiese na beto vuanda ya ku lungana. ¹³ Bana ya mpangi na nge ya nkento soluaka me pesa nge mbote.