¹ Soneka kua Mbasi ya Dibundu dia Efeso: " Ewu wuvovele ndondo simbidi ntetembua nsambuadia mu koko kuani kua lunene. Ndondo wuta diata va kati kua fulu nsambuadia ya minda wolo wuta vova ewu: ² Nzeye mana wavanga, salu kiaku kia ngolo ye ntatamanu aku mu luvibudulu. Nzeye vo kuvibidilanga bana bavanganga mambi ko. Nzeye vo wafiongonona bana bakibokelalanga ntumua zina kabena kuawu ko ye wababaka bankua luvunu. ³ Nzeye vo wavibidila beni ye mpe vo wamona mpasi zayingi mukuma kia nkumbu amu ye kua yoya ko. ⁴ Kansi, tala di ngina diawu bila mu ngeye: wavidisi zola kuaku kua ntete. ⁵ Ikuma, bambuka moyo keti veyi wasotokele. Viluka ye sala bonso wasadilanga kuna ngiatukulu. Wana vo viluka, ngavo nkatu singiza katula fulu kia muinda aku vana fulu kiani. ⁶ Kansi nkutu, nzeye n'kayilu wowo wa m'funu mu ngeye: kuzolanga mana banikola bavanga ko, mana m'belanga mpe. ⁷ Ndondo wuna ye matu bika kawa mavovele Mpeve kua mabundu. Kua ndondo lunga, siyam'vana luve lua dila mu n'ti wa luzingu wuna muna Paladisu dia Nzambi. " " ⁸ Soneka kua Dibundu dia Semilina: " edi divovele ndondo wuna wa ntete ye wa nsuka, ndondo wafua ye wafutumuka. ⁹ " Nzeye mpasi zaku ye nkondua zaku ( kansi wu mvuama); nzeye luvunu lua bobo ba kibanzilanga kala bayuda ( kansi kabena wo ko ye bena nzo ya lusambulu ya satana). ¹⁰ Kutini mpasi zita kuvingila ko. Tala, nkadiampemba zolele loza ban'kaka mu beno mu boloko. Siluatontua ye siluamona mpasi mu lumbu kumi. Lukala luakuikama nate kuna lufua ye siyaluvana kolowa kia moyo. ¹¹ Konso wuna ye matu, bika kawa mavovele Mpeve kua Mabundu. Konso lunga, kasala mona mpasi za lufua lua n'zole ko." " ¹² Soneka kua Dibundu dia Pelegami: " tala mavovele ndondo wuna ye mbele a luyalu ya ndambu zole za meno: ¹³ " nzeye kuna zingilanga, yikuna kuna kiti kia kimfumu kia satana. Kansi watomene keba nkumbu amu, ye nzeye vo kua lozele minu kiaku mu momo ko, kana vo mu lumbu ya Antipasi, mbangi amu, munkuikizi amu wavondolo vakati kueno; vana satana kazingilanga. ¹⁴ Kansi nkutu, ngina ye nsembolo nzolele kusala: Wuna ye bantu va kati kueno bakuikilanga kibeni mu ndongolo za Balami, ndondo walongua kua Balaki mu tuba tadi dia n'teso a masakuba vantuala a bana ba Isaeli, mpasi badia madia mavewa n'kayilu kua nzambi za biteke ye bakiyekola mu mavanga ma nsoni ma zumba. ¹⁵ Mu mpila mosi, vena nkutu ye bantu vakati kueno batoma kangama mu malongi ma banikola. ¹⁶ Ikiuma viluka! Ngavo nkatu, singiza n'sualu ye siyavanga mvita kua bawu mu mbele a luyalu yivayikanga mu nua amu. ¹⁷ Bika ndondo wuna ye matu kawa ma vovele Mpeve kua Mabundu. Kua konso nduna lunga, siyavana ndambu ya mana yansuekua ye tadi dia mpembe vazulu a diawu vasonama nkumbu ya mpa yina yizayakana kaka kua ndondo kun'tambula" ¹⁸ Soneka kua Mbasi ya Tiyatila: " Tala m'vovo mia muana Nzambi, wuna ye meso bonso n'laku a tiya ye malu sengua kia toma lengomogua: " ¹⁹ Nzeye mavanga maku, nzola aku, minu kiaku, salu kiaku ye ntatamanu. Nzeye vo mavanga maku ma wuwu malutidi mavanga maku ma ntete. ²⁰ Kansi ngita kubelesela mu edi: " wutatambudila n'kento Zezabeli wuta kukiyika m'bikudi. Mu ndongolo ani, wuta vuna sadi biamu mu kubavangisa mambu ma nsoni ma zumba ye badinga madia mavewa n'kayilu kua nzambi zabiteke. ²¹ Yim'veni ntangu mu viluka kansi keta songa nkutu luzolo lua viluka mu mambi mani ko. ²² Tala, siyan'tuba kuna mfulu ya ngiedolo ye bana batanga yani zumba, siyabakotesa mu mpasi zayingi, wana nkutu vo bavilukidi mu momo kavangidi. ²³ Siyavonda bana bandi bawonso, ye Mabundu mawonso simazaya vo ngina ndondo fiongononanga mabanza ye min'tima. Siyavutudila kua konso muntu landila mavanga mani. ²⁴ Kansi beno lusidi mu Tiyatila, kua bawonso bobo kabena ntuadi ye ndongolo zozo ko, ye kabazeye momo ban'kaka beta bokelela mambu ma mpimpita ma satana ko, kua beno mvovele: " kitudidi zitu kia n'kaka kua beno ko" ; ²⁵ mu konso kua diambu, lufeti kala nakekete nate nkuiza." ²⁶ Kua nduna lunga ye vanga momo yavanga nate kuna nsuka, siyan'vana wisa mu nsi zawonso. ²⁷ Sikabayala ye n'ti wa sengua wa tuadisila , sikabatolozola mu ndambu ndambu bonso wumbua bia n'toto. ²⁸ Bonso yatambudila kua Se diamu, siyam'vanina mpe ntetembua ya n'suka. ²⁹ Konso wuna ye matu bika kawa mavovele Mpeve kua Mabundu."