¹ Paulu ye Timoteo, n'sadi mia Yesu Klisto, kua ban'longo bawonso muna Yesu Klisto bena kuna Filipo, kua Ngudi za nganga ye kua biselo: ² bika n'lemvo ye luvuvamu bialuvewa kua Nzambi Se dieto ye kua Mfumu eto Yesu Klisto! ³ Mvutudi matondo kua Nzambi amu mu diambu dia mambu ma mawonso yikulubambukilanga moyo , kiyoyanga ko, ⁴ mu sambu biamu biawonso, mukuma kia yeno awonso, mu songa kiese kiamu ⁵ muna matadidi kintuadi kilubakanga mu n'samu a mbote, tuka muna lumbu kia ntete nate wuwu. ⁶ Nkuikidi vo nduna wayantika salu kiambote kiki mu yeno sikakitula kio kialunga mu diambu dia lumbu kia Yesu Klisto. ⁷ Dina dia lunungu vo ndenda banza wowo mu beno bawonso kadi luna muna n'tima amu, kana vo ngina wakangama, yevo mu nduanunu ye mu nsikidukusu a n'samu a mbote, beno bawonso , bobo lutambulanga n'levo mosi ye mono. ⁸ Kadi Nzambi wuna mbangi amu vo yitoma kuluzolanga beno bawonso mu nzola ya Yesu Klisto. ⁹ Ye dina n'lombanga muna sambu biamu, yisavo nzola eno yatombokanga ntangu zawonso muna Nzayilu ye muna ngangu zalunga ¹⁰ mu suasikisa mambu malutidi m'funu, mpasi vo luakala luavelela ye luakondua nsembolo muna lumbu kia Klisto, ¹¹ luazala kua m'butu wa lunungu wuna muna nzila ya Yesu Klito, muna n'kembo ye muna nzitusu a Nzambi. ¹² Nzolele luazaya, luzimpangi, vo mana manduakidi nkutu masadidi mu ntombokolo a n'samu a mbote. ¹³ Ikuma, muna konso kua nzo a mbazi a n'kanu ye muawonso, kavena muntu lembidi zaya ko vo yi mukuma kia Klisto nginina wakangama, ¹⁴ ye zimpangi zabidi lutila mu Yesu Klisto, zasiamusua mu nkangamanu zamu, bena ye vuvu kialutila mu longa mambu ma Nzambu kondua kua wonga. ¹⁵ Dina diakieleka,ban'kaka, balonganga Klisto mu keto ye mu mpeve ya mpaka; kansi ban'kaka bakun'longanga muna nkubabanu zambote kikilu. ¹⁶ Baba bavanganga dio mu zola, kina bazeye vo ngina yabiekua mukuma kia nuanina n'samu a mbote, ¹⁷ kansi nkutu bana ban'kaka, bavuatua kua mpeve za mpaka, balonganga Klisto mukuma yikondolo velela ye mabanza ma kunsosela zimpasi muna nkangama zamu. ¹⁸ Nki kim'funi e? Mu mawonso, kana mu mbonokono, yevo mu kieleka, Klisto toma lungoluanga kuani: ngita dio yangalala ye siyatoma dio yangalala diaka. ¹⁹ Kadi nzeye vo dina sidiandata ku mpulusu, mu nzila a sambu bieno ye muna lusadusu lua Mpeve a Yesu Klisto, ²⁰ Landila diodio ngitatoma vingidila, ye vuvu kiamu vo kilendi fua nsoni ko, kansi vo wuwu, bonso tuka ntama, Yesu sikakembosua mu nitu amu mu vuvu kiawonso, kana mu moyo amu yevo mu mfuilu amu; ²¹ kadi Klisti yimoyo amu, ye lufua luna n'luta kua mono. ²² Kansi vo dina dia m'funu mu salu kiamu yazinga mu nitu amu, kilendi lenda vova dina siyaluta zola ko. ²³ Ngina ya fietukusua ku ndambu zole: ngina ye nsatu zakuenda kuamu ye kala ye Klisto, diodio dina diambote lutila kua babidi; ²⁴ Kansi mukuma kia yeno dilutidi m'funu yazinga mu nitu. ²⁵ Ye nkuikidi, nzeye vo siyazinga ye vo siyakala kaka ye beno, mukuma kia ntombokolo eno ye mukuma kia kiese kieno mu minu, ²⁶ mpasi vo muna mvutuka amu kua beno, mu mono luabaka n'samu wanene wakizitisa kueno mu Yesu Klisto. ²⁷ Dimosi kaka vo ludiata bonso bufuanakene mu n'samu a mbote wa Klisto, mpasi vo, yevo ngizidi kulutala yevo kizidi ko, yawa mu beno vo luta tatamana nakekete mu Mpeve mosi, lutanuana mu moyo wumosi mukuma kia minu kia n'samu a mbote. ²⁸ Kondua kuakiyambula kana fioti mu wonga wazimbeni, diodio dina kua bawu sinsu kia mvidusu, kansi kuayeno kia mpulusu, ye diodio ditukidi kua Nzambi, ²⁹ kadi n'lemvo waluvewa muna matadidi Klisto, kamu kuikila kaka muna yani ko, kansi mpe muna mona mpasi mu yani, ³⁰ mu tatamana nuana nkindu yoyo luambona ya nuana, yevo yoyo lutawa ngita nuana mu wuwu .