¹ Bosi, wabatela ngana yimosi, mu matadidi neyi bafete sambidilanga mu ntangu zawonso, kondua kua beba nkutu. ² Wavova: " mu mbanza mosi, muakala m'fundisi mosi walembi vuminanga Nzambi ye kakala zitisa nkutu kana muntu ko. ³ Wuwu muna mbanza yoyo, muakala ye fola dimosi dia n'kento ye wayizanga kua yani ye vova: " wunsadisa mpasi yabaka ndungunu va n'tuala mbeni amu. " ⁴ Kadi mu ntangu ya nda kakala ye luzolo lua kun'sadisa ko, kansi kunima ntangu mosi, wavova mu yani mosi: " mpeleko kivuminanga Nzambi ko yevo kizitisanga muntu ko, ⁵ Kansi, wuwu kina vo n'kento ndundu wuta kunkuamisa, siyakun'sadisa mpasi kabaka ndungunu; mpasi vo kangioyisi mu ngiza zani zikondolo nsuka ko." ⁶ Bosi, mfumu wavova: " wa metavova m'fundisi wakondua lunungu. ⁷ Wuwu, nga Nzambi kalendi vana ndungidi kua basolua bani babokanga kua yani fuku ye muini ko e? Nga sikakala fuki kua yawa e? ⁸ Yilutelele vo kafeti kubavana ndungidi mu ngolo zawonso. Mpila mosi, kiokio Muana a muntu sikeza, kieleka nga sikawana minu vava n'toto e?" ⁹ Bosi, watadiaka ngana eyi kua ban'kaka bakala kibanzilanaga vo bakala balunungu ye bakala belanga bantu ban'kaka: ¹⁰ " Bantu bole batomboka kuna nzo a Nzambi mu sambila ( mosi wakala m'falisi, wan'kaka m'futisi a mpaku. ) ¹¹ M'falisi watelama ye wasambila mambu ema matadidi yani mosi: " Nzambi, yikutondele wuwu kina vo, kina bonso bantu ban'kaka bena yimpumbulu, bantu bakondolo lunungu, bankua zumba, yevo nkutu bonso m'futisi a mpaku wuwu ko." ¹² Yiminanga n'soki nkumbu zole mu lumingu ye yivananga buku kia kumi kia biawonso bina yamu." ¹³ Kansi m'futisi a mpaku, watelama kua nda, kateza nkutu tombola meso mani kuzulu ko, kansi wakala kibaba ntulu ye vova: " Nzambi, wumfuila nkenda, mono nkua masumu." ¹⁴ Yilutelele, muntu ndondo wavutuka kuna nzo ani wavelelesua, kabonso ndondo wan'kaka ko, kadi konso nduna kizangulanga sikakululua, kansi konso nduna kikululanga sikazangulua." ¹⁵ Bantu banatanga mpe bana bawu kua yani mpasi kabavalakana, kansi n'longoki bamona dio ye babasemba. ¹⁶ Kansi Yesu wababokela kuayani wata: " luyambula yingiana ngiana yiza kua mono, kalubakakidila ko; kadi kimfumu kia Nzambi kivuilu kua bantu bampila yoyo. ¹⁷ Mu kieleka, ngita wo kulutela, konso nduna katambudi kimfumu kia nzambi bonso muana ko, kalendi sala mo kota ko." ¹⁸ N'tuadisi mosi wangiuvula ye wavova: " N'longi a mbote, neyi ndenda vanga mpasi yatambula moyo wa m'vu ya m'vu e?" ¹⁹ Yesu wan'tela: " mu diambu dia nki wutakumbokelela wambote? Kavena muntu mosi wambote ko, vo kayi Nzambi yani mosi kaka ko. ²⁰ Zeye n'siku: " kute zumba ko, kuvondi ko, kuyiyi ko, kute kimbangi kia luvunu ko, zitisa Se diaku ye Ngudi aku." ²¹ N'tuadisi wavova: " yazitisi mawonso momo tuka ntangu yakala toko." ²² Kiokio Yesu kawa wo, wan'tela : " kima kimosi diaka kikukondolo. Feti teka biawonso bina yaku ye kaya bio kua bamputu, wana siwabaka kimvuama muna zulu ( bosi wiza, wundanda.)" ²³ Kansi kiokio n'tuadisi wowo wa mvuama kawa mambu momo, wakala ye kiadi kiayingi kibeni, kadi wakala mvuama kibeni. ²⁴ Bosi Yesu, kiokio kammona, wakendalala kibeni ye wavova: " dina dia mpasi kua zimvuama mu kota muna kimfumu kia Nzambi! ²⁵ Kadi kadina nkutu dia mpasi ko kua kavalu mu lutila muna wulu dia ntumbu kansi ka kua mvuama ko kakota muna kimfumu kia Nzambi." ²⁶ Bana ban'gua bavova: " wana, nani lenda vulusu e?" ²⁷ Yesu wavutula: " mambu mana kamalendakana kua bantu ko malendakana kua Nzambi. " ²⁸ Petelo wavova: " kansitu, tuasisa yawonso yina tuvuidi ye tualanda." ²⁹ Ikuma Yesu wabatela: " mu kieleka, yilutelele vo kavena muntu ko wasala sisa nzo ani, yevo n'kento ani, yevo mpangi zani za yakala, yevo Se diani ye Ngudi ani, yevo bana bani mukuma kia kimfumu kia Nzambi, ³⁰ kalembi tambula nkutu, mu nza yiyi ye mu nza yikuiza, moyo wam'vu ya m'vu." ³¹ Kunima ya kutakesa kumi ye zole kua yani, wabazayisa: " Lumuene, tutakuenda tomboki kuna Yelusalemi, ye mambu mawonso masonukua kua mim'bikudi mu matadidi Muana a muntu simalungana. ³² Kadi sibangiekola kua mim'pakanu, sibam'vueza, sibammuesa nsoni ye siban'tawudila kololo. ³³ Kiokio sibamanisa kun'zuba, sibam'vonda ye, mu lumbu kia tatu, sikafutumuka." ³⁴ Kababakusa kana diambu dimosi nkutu ko, ye m'vovo wowo wabasuekua, ye kababakusa mambu mana mavovoka ko. ³⁵ Diakala vo, kiokio Yesu kafinama ye Yeliko, mpofo mosi yakala yavuanda vana mbela a nzila, wakala lomba, ³⁶ ye kiokio kawa n'kangu wutaluta , wayuvula mana makala luta. ³⁷ Ban'zayisa vo Yesu musi Nazaleti wutaviokela vana. ³⁸ Yidina mpofo waboka mu ndinga ya ngolo, wakala vova: " Yesu, muana Davidi, wufuila nkenda. " ³⁹ Bana bakala diata ku n'tuala, basima mpofo, ban'tela kakala na pi. Kansi walutisa diaka boka mu ngolo: " Muana Davidi, wumfila nkenda." ⁴⁰ Yesu watelama ye watuma bannatina mutu ndondo. Bosi, kiokio mpofo kafinama, Yesu wan'giuvula: ⁴¹ " nki zolele yakuvangila e?" Wavova: " Mfumu, nzolele yatambula mbueno amu." ⁴² Yesu wan'zayisa : " tambula mbueno aku. Minu kiaku kiniakisi." ⁴³ " Vana vawu, watambula mbueno ani ye walanda Yesu, wasanisina Nzambi. Kiokio bamona diodio, n'kangu wawonso wasanisina Nzambi.