¹ Kunima mambu momo, Mfumu wasola diaka lusambuadia luan'kaka, ye wabatuma babole babole kun'tuala ani mu konso mbanza ye fulu kuna yani kibeni kazola kuenda. ² Wabatela: " salu kina kianene, kansi n'sadi mike. Lutoma sambila kua Mfumu a salu, mpasi kafidisa min'sadi mu salu kiani. ³ Luenda! Tala, yilufididi bonso bana ba mameme vakati kua madievua. ⁴ Kalunati mbongo ko, ka nkutu ya nzietela ko, ka nsampatu ko, ye kaluvani mbote kua muntu mu nzila ko. ⁵ Mu nzo zan'kaka lukota, luvova ntete: " bika luvuvamu luakala mu nzo yiyi." ⁶ Vo muntu mosi wa luvuvamu wuna muna, luvuvamu lueno siluasikila mu yani, kansi vo nkatu, siluavutuka kua yeno. ⁷ Luvuanda mu nzo yoyo, ludia, lunua biobio baluvene, kadi n'sadi fuene m'futu ani. Kaluendi nzo muna nzo ko. ⁸ Vo lukotele mu mbanza mosi, ye balutambudi, ludia bina bakulu vana. ⁹ Ye luniakisa mbevo zina muna. Lubatela: " Kimfumu kia Nzambi kifinamene kua yeno" ¹⁰ Kansi mu konso mbanza lukota, ye muna kabalutambudi ko, luenda muna zi bala bala zani ye luvova: " ¹¹ tulukubudidi nkutu mfumfuta za mbanza eno yina yina mu malu meto! Kansi luzaya vo kimfumu kia Nzambi kifinamene." ¹² Yilutelele dio vo muna lumbu kia mfundusu, sikuakala ye luvibudulu lua lutila kua Sodomo kansi ka kua mbanza yoyo ko. ¹³ Kiadi kua ngeye, Kolazi! Kiadi kua ngeye, Betesayida! Vo mavanga ma lulendo mavangama mu ngeye mavangamena mu Tilo ye mu Sidoni, nga bakiviludila n'tima tuka ntama mu vuata nsaku ye kikusa n'toto a mpolo. ¹⁴ Kansi sidiakala dia n'lemvo kua Tilo ye Sidoni mu lumbu kia mfundusu, kansi ka kua yeno ko. ¹⁵ Ngeye, Kapenawumi, banzidi vo siwatombolua kuna zulu e? Nkatu, ngeye siwakulumunua kuna nsi a bafua. ¹⁶ Nduna wuluwididi wunguididi, ye nduna wulutinguni wuntinguni; nduna wuntinguni tinguni mpe nduna wamfidisa." ¹⁷ Lusambuadia luawonso luayiza mu kiese, ye bavova: " Mfumu, kani mpeve zambi zatutumamane mu nkumbu aku." ¹⁸ Yesu wabatela: " yamona satana wasotoka tuka kuna zulu bonso nsemo. ¹⁹ Tala, yaluvene lendo kia diata zinioka, zinkutu ye va zulu a lendo kia bawonso kia n'tantu, ye kalekua kimosi nkutu kiambi kilenda kuluvanga mbi ko. ²⁰ Kansi, kaluyangalala kaka mudiambu dia mpeve zilutumamane ko, kansi luyangalala kibeni kadi nkumbu zeno zisonamene muna mazulu. ²¹ Vana vawu, Yesu wayangalala kibeni mu Mpeve a N'longo ye wavova: " yikusanisini, eh Tata, Mfumu ya zulu ye ya n'toto, kadi ngeye wasueka mambu mama kua bankua nduenga ye bankua ngangu, ye wasonga mo kua bana bena ye nzayilu za fioti bonso bana bafioti. Ingeta, Tata, kadi dina diakala diazolakana va meso maku." ²² Mambu mawonso yavewa mo kua Se diamu, ye ka muntu mosi ko zeye muana yinani, vo ka yi Se kaka ko; ye ka muntu mosi ko zeye Se yinanai, vo ka muana ko, ye kua konso muntu muana kazolele dio songa." ²³ Kiokio kabaluka kua kala n'longoki miani, wata mu kinsueki: " Mayangi kua bobo bamuene mambu mama lutamona. ²⁴ Yilutelele vo m'bikudi miabidi ye n'tinu miazola mona mambu momo lutamona kansi kabamona mo ko, ye wa mambu momo lutawa kansi ka bawa mo ko." ²⁵ N'longi mosi wa n'siku mia Bayudayo watelama, ye wan'tonta, wavova: " N'longi, nki ndenda vanga mpasi yatambula moyo wa m'vu ya m'vu e?" ²⁶ Yesu wan'tela: " nki kia sonama muna n'siku e? Nki lutanganga mo e ?" ²⁷ Kiokio kavutula, wavova: " fete zola Mfumu Nzambi aku mu n'tima aku wawonso, mu muela aku wawonso, mu ngolo zaku zawonso ye ngindu zaku zawonso, ye wazola mpangi aku bonso geye kibeni." ²⁸ Yesu wan'tela: " Tomene vutula, vangila wo ye siwazinga." ²⁹ Kansi n'longi, wazola kukilungisa, wavova kua Yesu: " nani yi nfinangani amu e?" ³⁰ Mu vana mvutu, Yesu wavova: " muntu mosi wakala kulumuka tuka kuna Yelusalemi ye kuenda kuna Yeliko. Wabua mu moko ma yimpumbulu, bobo ban'ziona bima biani biawonso, ban'zuba nate lukufi ye lufua. ³¹ Mu kinsusumukina, Nganga Nzambi mosi wakala kulumuka muna nzila yoyo, ye kiokio kammona waluta mbela mbela. ³² Mpila mosi, kiokio mpe n'levi kaluaka vana fulu kina, wammona ye waluta mbela mbela. ³³ Kansi Musamalia mosi wakala mu nzietelo, waluaka vana fulu kakala. Kiokio kammona, wamona kiadi kiayingi. ³⁴ Wafinama va mbela ani ye wakanga bitenda mu mputa zani, watula mo mafuta ye vinu. Wan'tula vana bulu kia yani kibeni, wannata muna nzo ya mpiokela ye watoma kun'keba. ³⁵ Lumbu kialanda, wavayikisa denali zole, wavana zo kua mfumu a nzo ya mpiokela, ye wavova: " toma kun'keba ye ntalu yawonso yiluta va zulu, siyavutudila yo mu mvutuka amu. ³⁶ Nani mu yawu a tatu, ngeye benzi, wakala mfinangani ya ndondo wabua mu moko ma yimpumbulu e?" ³⁷ N'longi wavova: " nduna wam'fuila kiadi." Yesu wan'tela: " wenda ye vangila mpila mosi." ³⁸ Wuwu, kina vo wakala mu nzietelo, wakota mu vata dimosi, ye n'kento mosi wakala ye nkumbu ya Malata wan'tambula muna nzo ani. ³⁹ Wakala ye mpangi ani ya n'kento wakala ye nkumbu ya Maliya, yani wavuanda vana malu ma Mfumu, ya wakala wa mambu mani. ⁴⁰ Kansi Malata wakala wabindama mu lamba mpasi kavana madia. Wayiza kua Yesu ye wavova: " Mfumu, kadita kuvanga kima ko vo mpangi amu wungiambudi mono mosi mu kubika madia e?" Wana wun'tela keza kunsadisa. ⁴¹ Kansi Mfumu wavutula ye wan'tela: " Malata, Malata, wuna ye mabanza ye n'tela n'tela mu diambu dia mambu mayingi. ⁴² Kansi diambu dimosi kaka dina dia m'funu. Maliya solele dina diluti wete, dina kadikun'katulua ko.