¹ Kilumu ki teete kilumingi, ba kehete a beeni ku ma nziami misuku-musuku, ba nati mafuta ma tsungu ba yiriki mukwe pakala mu niti Ysu. ² Ba ye wanese tari badi bariri wu kundumi Manziami. ³ Aba koti, bawu kaba moni ki niti yi mfumu Yesu. ⁴ Aku sari vo bakari ba kiyangasa mu bwabunu, mu mbala mosi, baata bolo abesi teleme a mbele bawu ba vuati milele mi peemi. ⁵ Bukwe ba kehete bakari ba bakimi moyo, aba kurimisi lusee twau mu tsi mutoto, kaansi bawu ababa mokini : «Mu diama di kihi lu dingi mutu moyo ku kwe bafwa? ⁶ Nde kake gaha-gaha ka, kaansi nde futumi ki wu. luteke kihi pili nde ka lusamini, bu kakari ku galileyi, ⁷ Kamoki ni : «Kwe vo muana mutu ka fwete ka bama ku moko ma baata na masumu, ka komomo a kulunsi, nde sa kafutumuku kilumu kiki taat.» ⁸ Ba kehete aba teki mbunu mu mama mana, ye aba vutiki ku manziami. ⁹ Aba samini mama ma mamaso ku kwe kumi yi mosi di ba milongoki ye baata bakaka. ¹⁰ Ba kehete ba moki mama-mana ku milongi ku kari : Mari u Magadala, Jani, Mari nguri Zaki ye ba kehete bakaka yi bawu. ¹¹ Kaansi tsaanga yini imonikini ku ba milongi boonso yi buzobo, ka ba kwikiri ki ma baba samini ba kehete. ¹² Kaansi Pieri a ka terimi, akeni tini ku manziami. Na ka fukumu, aka tari, nde ka moni kaka milele. Pieri aka vuki si kuku nde ki beeni ki yi ku kiyuhulu buku luti. ¹³ Tala, munu kilmu kini, baata bolo ba yini ku Gahata di mosi zini Emausi, taama i Yerusalem basala wu taanga zolo. ¹⁴ Ba kari kwa moko ki nzili ki nzili iba kwene bawu mamaso maluti. ¹⁵ Nde Yesu akesi kala akahati ki bawu buba sisini wu pahaka ye bu ba kiyuhuri sini wu. ¹⁶ Kaansi mese ma bawu makari makaanga ma baleni ku mu zaya ka. ¹⁷ Yesu aka bamokini : «Kihi beene lu zonsi wu beene mbolo kunu lu kwe?» Ba aba terimi yi kiari kikingi. ¹⁸ Mosi ubawu zini diani Kelopasi, aka mu vuturi mvutu : «Nge we nge kaka, ukala ku Yerusalemi ku uhunu zaya mama-sarimi bi lumu bi?» ¹⁹ «Kihi ma-ma?» kaba yuhuri Yesu: Ba wu vo : «Ma-ma matari Yesu uNazereti, nde ke musakiri mosi u ngolo mu bisala biani ye ma ndingi m'ani ku ndumi Nzaami yi ku ndumi baata, ²⁰ Mutini kwe ba nganga Nzaami ba bayuda ye ba mfumu beete aba mu kabi muku zeengene ndolo lu fwa yi kumu koomo a kulunsi. ²¹ Beete twe i vufu vo nde u tanana Isaele. Kieriki, a mbele bwabu, leleki bilumu bi taata tuku kuluti mama-ma. ²² Kaansi di kaka ndama ba kehete a kahati ki beete ba tu yiti kiwu, a beni mu misiku-misuku kuma nziami. ²³ Ba moni ki nit'ani, abesi tusa mene vo ba wanzio abesi mono kono ku bawu muku basamene vo nde ke u moyo. ²⁴ Baata bana ba kari i beete abeni ku mapieme ba moni mâama ki tese ki mosi boonso buku moki ba kehete. Kaansi nde ka mu moni ki.» ²⁵ Bunu Yesu aka ba mokini : «O bahata ba kohoni ngaanga ye mbunu yi bu molo muku ku kwikili mamaso ku moki misakiri ! ²⁶ Keketi kwe i mfunu ku vo klisto ka mono paasi mu maama ma, ye nde ka koto mu kêeme?» ²⁷ Ku yantaka ku Moyisi yi ku misakiri, nde ka ba samini mu maama-sonimi mu diama di nde. ²⁸ Bu ba kari a mbele gahata ba yini wu nde Yesu aka sii boonso mutu u yini ku tabama. ²⁹ Kaansi ba wu aba mutumi kisasakisasa ye ku moko : «Kala gahaka i beete, diama kohokolo i kwisi yi kilumu kie ku tsuku.» nde aka koti muku kala i bawu. ³⁰ Nde ka kari kimvuku i bawu a taama mese, Yesu aka boongi di pâaku nimi, aka ba gehe. ³¹ Bunu mese mawu a ma zibiki ye besi zaya, kaansi nde akesi lala a ndumi bawu. ³² Aba yantiki ku moko bayi ba wu : «Mbunu beete ka yi ihiki mu kahati ki beete buka tu mokini wu mu nzili ye bukatu samini wu masonoko?» ³³ Buba vuiki misuku-misuku, aba vutiki ku Yerusalemi ye aba monini yi milongiki kumi yi mosi, yi baba kari i bawu, ³⁴ Yi ku moko: «Mfumu kieriki futukimi wu yi nde monikini ku kwe Simoni.» ³⁵ Aba samini maamaso ba moni nu nzili yi mu tini ba mu zayi buka bukini di pâa. ³⁶ Buba moki maama-mana, Yesu ndeki beni ki a kesi monokono a kahati ki bawu nde aka ba mokini: «Ngeeme i kala ku beene!» ³⁷ Kaansi milongiki mikari yi miteketeyi moyo, ba kihitiri mufu. ³⁸ Yesu aka ba mokini : «Mu diama di kihi beene lu tekiti wu ye mu diama di kihi ngini bwabunu mu ma mbunu mene? ³⁹ Lu tala moko ma me yi mala maa-ma, kieriki beni me. Lu tsimi-me yi lutala. mufu kakala yi nitiki, kaani mfwa boonso bu tu atari vome.» ⁴⁰ Buka moki bwabunu, nde akaba soongi moko yi mala ma ani. ⁴¹ Boonso bu ku kari kiesi kiawu, bawu kaba kwikiri kibeni ki, ba kari muku yitiki, nde aka ba mokini :«Beene lwe gaha-gaha i kimi ku ku dia?» ⁴² Bawu aba mu soongini mbisi ku yoko yi ndaama bwiki. ⁴³ Yesu aka bongi nde aka di a ndumi ba wu. ⁴⁴ Nde aka ba mokini vo bwabunu me i lumokini, taanga ikari i beene, me i lumokini, ku fwani ku fuanene maama sonimi mu me mu mukana misiki mi Moyisi ku misakiri ye mu mikungu. ⁴⁵ Bunu nde aka ba zibiri yini, muku saa ba zaya masonomo. ⁴⁶ Nde aka ba mokini : «Idini ku sonimi vo klisto ka mono pâasi, ye sa ka futumuku mu kilumi kiki tâata. ⁴⁷ Ye vo ku balala ma mbulu ye ndololo masumu ku kala kuloongomo mu zini diani ku makana mamaso, ku yantaka ku Yerusalemi. ⁴⁸ Beene lwe ba mbangi ma maama ma. Lutala, me sa ifili ku beene maka siri taata ama. ⁴⁹ Kaansi beene lusala kunu vulu i kunu lu fuluku i ngolo iku zulu.» ⁵⁰ Bunu Yesu aka ba nati ti ikunu be tani. Buka zaangini moko m'ani, nde aka basakimini. ⁵¹ Buka basakimini wu, nde aka gaamisi yi bawu, aka tohomiki ku zulu. ⁵² Bunu aba mu kumisi, ku nimi aba vutiki ku Yerusalemi ye kiesi ki nene. ⁵³ Ba bakari koonso kilumu mu nzô Nzaami, kukumusu Nzaami.