¹ Ke lɛngbɔvi lɔ gba wuntun canwe gɔ lɔɔ, jixwe ci too na ganxixo ɖokpo we ovlɔ ha, ² bɔ un mɔ wɛnsagun Mawutɔn canwe ke le te le Mawu nukɔn lɛɛ. E fɔ okpɛn ɖaxo canwe na ye. ³ Wɛnsagun ɖevo wa ci vɔsakpe lɔ kpa; e hɛn onu ke mɛ e nɔ fyɔ azluya le lɔ ɖokpo; sika wɛ e do blo. Ɛn na ɛ azluya susu, bɔ e na ze kpo mɛ ɖevo Mawutɔn lɛɛ kpokpo we oɖɛ kpo ze xwle Mawu le vɔsakpenke e ze Sika do blo lɔ ji. ⁴ Azluya lɔ we azizɔ nɔ tun sɔn wɛnsagun lɔ we alɔ mɛ, bɔ azɔ etɔn kpo mɛ ɖeɖovo Mawutɔn lɛɛ we oɖɛ kpo nɔ yi ji le Mawu de. ⁵ Bɔ wɛnsagun Mawu tɔn lɔ ze azluyafiɔnu lɔ bo kɔn vɔsakpe lɔ we zokanlɔ d'emɛ, bɔ e gɔ, lo bo ze nyi do anyizan ji, bɔ e se ogbe ɖe lɛɛ; sɔ ny'awan bɔ gbɛmɛ ɖe abi, bɔ anyizan hunhun. ⁶ Wɛnsagun Mawutɔn canwe ke hɛn okpɛn ɖaxo canwe lɛɛ le sɔnu bo na jɛ okpɛn ɖaxo lɛɛ kun ji. ⁷ Wɛnsagun nukɔntɔn lɔ kun kpɛn bɔ okinji kpo ozo kpo ca kpo ohun kpo bo kɔn do ayizanji. Anyizan we vlɔ ɖo atɔn fyɔ; atin lɛɛ we vlɔ ɖo atɔn fyɔ; ogbe mumu lɛɛ kpokpo fyɔ. ⁸ E xɔn godo, wɛnsagun awe gɔɔ kun okpɛn, bɔ onu ɖi oso ɖaxo ha wle zo, bɔ e ze nyi oxu mɛ, bɔ oxu lɔ we atɔn vlɔ ɖo trɔ zun ohun. ⁹ Onuɖiɖo gbɛgbɛ ke le oxu gɔ lɛɛ kpokpo we atɔn vlɔ do ku, bɔ tɔjihun lɛɛ we atɔn vlɔ do gble. ¹⁰ Exɔn godo, wɛnsagun atɔngɔ lɔ kun kpɛn bɔ sunvi ɖaxo ɖe le ji ozo hwi ha, bo jɛ ayi sɔn oji; e jɛ tɔ lɛɛ kpo tɔjɔtɛn lɛe kpo we atɔn vlɔɖo ji. ¹¹ Sunvi ɛnɛ lɛɛ we nyikɔ nɔ nyi, Absɛnti; bɔ osin lɛɛ we atɔn vlɔɖo wɛ, bɔ mɛ ke nu osin lɛɛ susu ku, ɖo osin lɔ vɛ wutu. ¹² Exɔn godo, wɛnsagun ɛnɛgɔ kun kpɛn, bɔ e do nu ohwe lɔ we atɔn vlɔɖo, bo do nu osun lɔ we atɔn vlɔɖo, bo do nu sunvi lɛɛ we atɔnvlɔɖo, bɔ hinhɔn yetɔn we atɔn vlɔɖo do zinvlun; okle we atɔn vlɔɖo mɔ sɔ nɔ na hihɔn ba gɛɛ. ¹³ Un le kpɔn, bo mɔ gangan ɖokpo le zlɔn le jɛhɔn mɛ o ji ɖee; un se bɔ e le ɖo axwa tlilili ɖɔ: "Awoo! Awoo! Adan tɛ nyi e kɔ bo jlo na gbo mɛ ke le anyizan ji lɛɛ hwe ke nu wɛnsagun atɔn ɖe lɛɛ na lɛ vɔ kun kpɛn bɔ e na se lɔ?"