1 Exɔn godo, un mɔ oxlɛ ɖevo le oji; oxlɛ exɔn lɔ bo nyɔ kpinkpɔn: Wɛnsagun canwe ɖ'elɛɛ wɛ , bɔ ye hɛn onu nyinyla canwe . Onu nyinyla canwe xɔn lɛɛ lɔ, onu nyinyla godo godo tɔn lɛɛ wɛ; ɖo ye ji wɛ xomɛsin Mawutɔn na vɔ gbɔn. 2 Un mɔ onu ɖe ɖi oxu we nukpwɛn ha bo ca kpo ozo kpo; un lɛ mɔ ye me ke ɖu le kanlin lɔ ji lɛɛ, bo ɖu le ɖi ɖe etɔn ji lɛɛ, bo ɖu le xi xlɛ namu ke nyikɔ etɔn nyi lɛɛ ji. Ye le te le oxu we nukkpwɛn ɖɔhun lɔ ji, bo hɛn agidigbo ke Mawu ze na ye lɛɛ. 3 Ye le ji mɛnsɛntɔ Mawutɔn Moyizi we ohan, bo le ji lɛngbɔvi lɔ we ohan bo ɖɔ: "Aklunɔ Mawu nu lɛɛ kpo wu kpetɔ, azɔn towe lɛɛ klo bo nyɔ kpinkpɔn. Axɔlu oto lɛɛ tɔn, tito towe lɛɛ jlo bo nyi nugbo. 4 Aklunɔ, mɛ ma ka na ɖo sisi na we gɛɛ? Mɛ ka na gbɛ ɖɔ emye bo ma na kpa susu na we gɛɛ? Ɖo yɔ nɔ kpo nɔ je e wɛ nyi mimɛ; oto lɛɛ kpokpo na wa sɛn we ɖo onu jijlɔ ke a nɔ blo lɛɛ ɖe yeɖee xlɛ ceɖeceɖe." 5 Un mɔ sinsɛnxɔ ke mɛ akɔjijɛ Mawu tɔn we goxɔ le lɔ hun le oji. 6 Wɛnsagun canwe ke hɛn onu nyinyla canwe lɛɛ tɔn sɔn sinsɛnxɔ lɔ mɛ; ye do akwanɔ lɛɛ we avɔ wewe, bɔ e nɔ kɔn, bo sin akɔntablanu ke e nɔ ze sika do blo lɔ do akɔnnu. 7 Nu le gbɛ enɛ lɛɛ ɖokpo bɛ sinugannu ke e ze sika do blo lɔ canwe na wɛnsagun canwe lɛɛ; Mawu ke le gbɛ kaka do yi lɔ we xomɛsin gɔ sinnugannu e nɛ lɛɛ mɛ. 8 Azɔ gɔ sinsɛnxɔ lɔ mɛ, ɖo susu Mawutɔn kpo hlɔnhlɔn etɔn kpo wutu, bɔ mɛ ɖe ma kpewu na byɔ sinsɛnxɔ lɔ mɛ gɛɛ kaka jɛ hwe ke nu onu nyinyla canwe ke wɛnsagun lɛe hɛn lɔ na jɛ.