¹ Axɔluɖuto sɛxwe tɔn, nu ke wu e hɛn ɔ e na jlɛ do wɛ nyi: Gletɔ ɖe fɔn zan gbe ɖokpo, bo na yi din azɔnwatɔ do vɛngle etɔn mɛ. ² Azɔnwatɔ ke e mɔ jɛ nukun, le zanfunu, ɖi ogan ayizɛn mɛ ha ɔ, akwagan ɖokpo gbe ɖokpo ji wɛ ye ɖɔ gbo do; bɔ e nyi yɛ do xlan ogle lɔ mɛ. ³ Ogletɔ lɛ tɔn le zanfunu ɖi ogan cɛnnɛ mɛha, bo lɛ mɔ mɛ ɖevo lɛɛ, bɔ ye kple le tokpletɛn aximɛtɔn nuɖe ma wa, ⁴ bo lɛ ɖɔ na ye ɖɔ:"mye lɔsu lɔsu, mi yi vɛngle ce mɛ bo yi wa azɔn, nɛ ma su axɔ ke jɛ xa mi", ⁵ bɔ ye yi jɛ azɔn lɔ wa ji xonugbo le ogle lɔ mɛ. Ogletɔ lɔ ka lɛ tɔn le hwemɛ ogan wyawɛ mɛ ha., bo lɛ tɔn ogan atɔn mɛ hwelɛkɔ ha, bo le blo onu ɖokpo lɔ pɛpɛ. ⁶ Ke e wa jɛ ogan atɔɔn mɛ hwelɛkɔ, ogletɔ lɔ lɛ tɔn, bo yi mɔ mɛ ɖevo lɛɛ le tokpletɛn, bo kanse ye ɖɔ: "Etɛ wutu wɛ mi ka wa cifi sɔn zanfunu kaka wa jɛ odin nuɖe ma wa? ⁷ Ye yigbe n'i ɖɔ: "Mɛ ti ma yi mi do azɔn mɛ nɛ!" Bɔ ogletɔ lɔ ka ɖɔ na ye ɖɔ: "mye lɔsu, mi bo wa yi vɛngle ce mɛ bo yi wa azɔn." ⁸ Ke ohwe wa lɛkɔ kpokpo le hwedoo, ogletɔ ɖɔ na onujikpɔntɔ etɔn ɖɔ: "yi bo yi ylɔ azɔnwatɔ lɛɛ wa, bo su gbeɖokwa yemɛ ɖokpo ɖokpo , bɛ sɔn mɛ ke ma gbɔn godo sese lɛɛ ji kaka yi jɛ mɛ ke wa jɛ nukɔn lɛɛ ji." ⁹ Hwenuke azɔnwatɔ ke bɛ azɔn le ogzn atɔɔn mɛ hwelɛkɔ tɔn lɛɛ waa, ye mɛ ɖokpo ɖokpo yi akwagan ɖokpo ɖokpo. ¹⁰ Hwenuke azɔnwatɔ nukɔn tɔn lɛ wa, ye do sin ɖɔ ye na yi ahwa xugan lexa wɛ sin, amɔ ye su akwagan ɖokpo ɖokpo wu mɛ okpo ɖokpo. ¹¹ Hwenuke e su axɔ ye mɛ kpokpo sese vɔ ɔ, ye sinxomɛ bo jɛ oxo ɖɔ do ogletɔ lɔ wu ji. ¹² ye ɖɔ: «Azɔnwatɔ godotɔn e kɔ lɛɛ, ye wa azɔn na ogan xixo ɖokpo, bɔ mi ka su akwa ɖokpo lɔ mi mɛ kpo, kaka jɛ mi mɛ ke ji ya sɔn zanfunu bo nɔ hwenu lɛɛ ji.» ¹³ Amɔ, ogletɔ lɔ yigbe na omɛ ɖokpo le ye mɛ bo ɖɔ: «Hwannyi ce! un ma ka wa onu nyinyla ɖe xa we nɛ. Alo nyɛ kpo mye kpo mɛ gbo do akwagan ɖokpo jii?» ¹⁴ Mi bo yi nu ke nyi mitɔn bo ɖido xwe; nyɛ lɔsu wɛ jlo bo na aznwat godo godo tɔn lɛɛ ajɔ ɖokpo lɔ ɖi mye lɔsu tɔn ha. ¹⁵ Alo un ma ɖo acɛ bo na blo nu ke jlo un kpo adɔkun ce kpoo? Alo, etɛ wɛ le vɛ na we le e mɛ, nɛ un nyɔ xomɛ do mɛ ɖe wu? ¹⁶ Bɔ Jezu ɖɔ: «Omɛ godo tɔn lɔ, na wa nyi omɛ nukɔn tɔn; bɔ omɛ nukɔn tɔn lɔ, na wa nyi godo tɔn. Gbɛtɔ susu wɛ e ylɔ, amɔ kpɛɖe wɛ e ka na cyan.» ¹⁷ Hwenuke Jezu wa le sɔn yi Jeluzalɛmu, e kplan ahwanvi etɔn wyawe lɛɛ. Le omɔ lɔ jiji, e ɖɔ na ye ɖɔ: ¹⁸ "Mye ke xwe Jeluzalɛmu; e na ze nyɛ Ovi gbɛtɔ tɔn jo na vɔsanu-xwlemawutɔ gan lɛɛ kpo sɛnkplɔnmɛtɔ lɛ kpo, bɔ ye na ɖo okuhwɛ na un, ¹⁹ bo na jo un na mɛ ke ma nyi Jwifu gɛ lɛɛ, bɔ ye na ɖɔ sramɛ na un; ye na sɔ lanba do xo un, lobo na ka un do akluzu ji, bo na hu un. Azan etɔn atɔngɔ lɔ gbe ɔ, Mawu ka na fɔn un sɔn ku." ²⁰ Exɔn godo, Ovi Zebzde tɔn lɛ we nɔ sɛ kpɔ Jezu e kpo ovye lɛɛ kpo; e jɛ klo le nukɔn na Jezu, bo ɖe kɔ n'i, bo jlo na byɔ nuɖe wi. ²¹ ke Jezu mɔ ɛ le e, e kanse wi ɖɔ: "etɛ wɛ a le din?" Nyɔnu lɔ ka yi gbe n'i ɖɔ: "Un le din ɖɔ a ni na un jiɖiɖe ɖɔ ovi ce awe ekɔ lɛɛ na flɔn anyi le akpa towe hwenu ke a na wa ɖu axɔlu. Mɛɖe na nɔ aɖisixwe, bɔ mɛɖe na nɔ amyɔxwe." ²² Jezu ka yi gbe na ovi lɛ ɖɔ: "Mi ma nyɔ nuke mi le byɔ gɛ. Awuvɛ kɔfo ke un ja nunu gbe ɔ, mi na sigan kpe wu bo nu wɛ?" Ye ka yi gbe ɖɔ: "Ɛɛn mi na kpe wu." ²³ jezu ka ɖɔ na ye ɖɔ: "Mi na wa nu awuvɛ tɔn kɔfo ce exɔn xonugbo; amɔ, aɖisixwe ce kpo amyɔxwe ce kpo na flɔn ɔ, nyɛ mɛ na na gɛ; mɛ ke Mawu ko blo tɛnmɛ exɔn lɛ d'anyi na lɛ tɔn wɛ." ²⁴ Hwenuke Jezu we ahwanvi awo ɖyɛ lɛ se xo exɔn ɔ, ye sinxomɛ do nɔvi nɔvi awe exɔn lɛ wu. ²⁵ Jezu ka ylɔ ye, bo ɖɔ na ye ɖɔ: "Mi nywɛ ɖɔ togan ke ma nyi Jwifu gɛ lɛɛ ɔ, acɛ gannaganna wɛ ye nɔ kpa na tovi yetɔn lɛɛ lobɔ ganhunutɔ lɛɛ lɔsu nɔ kpa acɛ na ye. ²⁶ Onu ma ka sigan nyi le le mye lɛɛ cɛncɛn gɛ; amɔ, mɛ ɖe kpekpe ke jlo bo na nyi ogan le mi mɛ ɔ, e ɖɔ na nyi mɛsɛntɔ mitɔn. ²⁷ Mɛ ɖe kpekpe ke jlo bo na nyi nukɔntɔ le mi mɛ ɔ, e ɖo na nyi kannumɔ mitɔn. ²⁸ Le wɛ e le ne nyɛ Ovi gbɛtɔ tɔn; e na sɛn un wutu wɛ un wa gɛ; amɔ, omɛ sɛn gbe wɛ un tɔn bo wa, bo na sɔ ogbɛ ce sɔ jo bo na do xɔ ogbɛ na omɛ susu." ²⁹ Hwenu ke Jezu kpo ahwanvi etɔn lɛɛ kpo tɔn sɔn Jeliko, bo le yiyi ɔn ɔ, ahwan wɔbuwɔbu ɖe xodo e. ³⁰ Nukuntintɔnnɔ awe ɖe lɛɛ ka le anyififlɔn le omɔ lɔ kpa. Ke ye se ɖɔ Jezu wa le sɔn ɔ, ye jɛ axwa do ji, bo nɔ ɖɔ: "Aklunɔ! Ovi Davidi tɔn, ku nublawu na mi. ³¹ Ahwan ke xodo Jezu lɛɛ ka bɛ adan do ye ji, bo ɖɔ ye ni bɔnu, cobɔ, ye lɛ d'axwa sisyɛn, bo ɖɔ : "Aklunɔ! Ovi Davidi tɔn, ku nublawu na mi." ³² Exɔn wutu, Jezu nɔ te, bo ylɔ ye, bo kanse ye ɖɔ: "Etɛ mi jlo ɖɔ ma wa na mi?" ³³ Bɔ ye yi gbe n'i ɖɔ: "Aklunɔ, hun nukun na mi." ³⁴ Bɔ Jezu ku nublawu na ye, bo ɖo alɔ nukun yetɔn lɛɛ ji, bɔ ye mɛ awe lɛɛ kpo we nukun hun tlolo, bɔ ye jɛ nukunnu mɔ ji, bo xodo Jezu.