¹ Nyɛ Jwídi mɛsɛntɔ́ Jezǔ klísi tɔn ,Jǎki wé nɔvǐ lɔ́ wɛ́ lé wlǎn wěma ékɔ; nyɛ wɛ le wěma ékɔ wlǎn ɖoxlán mɛ ke Mǎwǔ Tɔ́ ylɔ́ bɔ yě lé gbɛ le wǎn yíyí étɔn mɛ,bɔ Jezǔ klísi lě hɛn yě lɛ́ɛ. ² Nǔbláwǔkúnámɛ Máwú tɔn kpó fífá étɔn kpó, kpó wǎnyíyí étɔn kpó ní nɔ kpɔ́ xá mi bo su xugǎn. ³ Omɛ vǐvɛ́na cé lɛ́ɛ, un ko lě lin lě ke un nǎ bló ɖó, bo nǎ wlǎn wěmá ɖóxlán mi ɖó hwlengǎn ɖokpo lɔ́ ke mǐ ɖo ́lɔ́ wú tawun; éxɔn lɔ́ wɛ un lě lin bo wǎ mɔ́ ɖɔ̀ é lé dandan mɛ na un ɖɔ̀ má wlán ɖoxlán mi, bo nǎ dó akɔnkpinkpan mi, ná mɛɖeɖóvo étɔn lɛ́ɛ kpókpó zɔn ɖokpó géé bɔ̀ oxó ́fó. ⁴ Xó jɔxóo, omɛ dǐdá dé lɛ́ɛ lun byɛ́ mimɛ,bo nɔ kpé ta do nǎ owɛn ke ɖɔxó dó nyɔ̌na Mǎwǔ mǐtɔ́n tɔn wú lɛ́ɛ; yě bló lě,bo nǎ dó xlɛ̌ ɖɔ̀ ogbɛ húɖǐkuɖǐ ke émyé bó le zán lɔ̀ bó sɔgbe, bo gbɛ́ Jezǔ klísi ke byǐ Mɛ̌si mǐtɔn ɖokpó géé, bo nyí Aklúnɔ mǐtɔn lɔ́. E kó dɛ̌n din bɔ Mǎwǔ xówéma lɔ́ ko ɖɔ ohwɛ ke e ɖǎ ná yě lɔ. ⁵ Nǔ ékɔ lɛ́ɛ ke un ja ɖiɖɔ ná mi gbě din, mi ko nywɛ̌ ganjǐ có un ka jló bo nǎ lɛ́ flín mi ɖɔ ke Aklúnɔ́ hwɛ́n togun Izlaɛli tɔn lɔ̌ gán, bo ɖe e sɔ́n Ejípu gǒdo, é wá hu mɛ ke gbɛ ɖɔ émyé bo má lé dinǔ n'ǐ gɛ́ lɛ́ɛ kpo. ⁶ Mi flǐn wenzangun ke wanǔ sɛ acɛ ke Mǎwǔ ná yě lɔ́ wú lɛ́ɛ; yɛ̌ jó nɔtɛn yě lɔsú lɛ́ɛ tɔ́n dó́́, bɔ Mǎwǔ dó cábá yě káká sɔyi mavɔ mavɔ, bo zé yě ɖo zǐnvlu mɛ, le odo sídósísómɛ ná azǎn ɖaxo lɔ; azǎn exɔn gbe wɛ Mǎwǔ ná dá ohwɛ nǎ yě. ⁷ Mi flǐn Soɖɔ́mu kpó Gomɔ́ɔ kpó, kpó oto ke sɛkpɔ́ yě lɛ́e kpó; oto éxɔn mɛ nú lɛ́ɛ wa nǔ ɖí wɛnzangun éxɔn lɛ́e há; yě lɛ́ jó yědé dó ná ogalilɔ kpó nǔ kúdǐ kudǐ wíwá kpó; oto éxɔn mɛ nú lɛ́ɛ, e ze ozo mavɔ mavɔ dó lé dɔn otó ná yě, bo dǒ le dó sɛ́n ná mɛ kpókpó. ⁸ Alɔkpa ɖokpó lɔ wɛ medǐdǎ éxɔn lɛ́ɛ nɔ wanǔ ɖó: odlǒ ke yě nɔ́ ku lɛ́ɛ nɔ dɔn yě bɔ ye nɔ hɛn agabza yětɔn kúdǐ ; yě má z acɛ kpikpa Mǎwu tɔn dó mɔ nude gɛ́,bo nɔ zun nǔɖídó susunɔ ke le sɛxwé lɛ́ɛ. ⁹ Amɔ̌, hwe ke nu wɛnzangun ɖaxó Micɛ́li lě ɖɔn nǔ xa awǒvi, bo le ocyɔ Mɔyízi tɔn hwlɛ̌n xá ɛ wɛ, é má syɛ́n tá bo zě ozun dǒ dá hwɛ n'ǐ gɛ́; amɔ̌, é ɖɔ́ n'ǐ kpoun ɖɔ̀:"Aklúnɔ ni dɔn otó ná we." ¹⁰ Amɔ̌, omɛdidá éxɔn lɛ́ɛ, yě mɔ́ nɔ lín tamɛ hwɛ̌kpó bo nɔ wa nǔ gɛ́.Yě cí ɖi gběkanlin ɖɔhun; nǔ ke wù yě má mɔ nukúnnú́ jɛ gɛ̌ lɛ́ɛ wɛ yě nɔ́ zun; onǔnyínywɛ̌ ke kpò jɔ̀ lɛ́ɛ, okú wɛ é nɔ́ nyi ne yě. ¹¹ Aheelú ná́ yě, ɖó omɔ̌ ke kanyɛ́ɛ gbɔn lɔ wɛ ye sɔ́.Yě jó yědé do ́ná onǔ wa jɛ agɔ,bo nǎ dó mɔ akwa ɖi Baláamu ɖɔhun. Yě dɔn ,ɖo ́ye fɔ́n gǔ ɖi kolée ɖɔhun. ¹² Okpɔnɔxámɛ yětɔn, afɔklɛ́nnú wɛ é nyi le nɔvǐ nɔvǐ núɖúɖu itɔn kɔn, le fike yě nɔ́ ɖu agɔ̌ le ma ɖǒ wunnyǎ lé lɔ.Yě ci ɖi akpɔkpɔ́ ke jɛhɔn nɔ zě,bɔ e mɔ́ nɔ́ na jǒkún gɛ ɖɔhun.Yě cí di atín ke hwe ke nu yě ná ná sínsɛ́n dó ná bo wǎa,yě mɔ́ nɔ ná sínsɛ́n gɛ́ lɛ́ɛ ɖɔ̀hun.Yě cí di atin ke e hɔn do aɖɔn, bɔ yě kú sésé ɖɔ́hun. ¹³ Yě cídi oxu ke le xo kpo adǎn kpó ɖɔ̀hun, bɔ wunnyǎnú wiwa yětɔn lɛ́ɛ nɔ́ cí ɖi ofún ke oxu lɔ̌ lé nyɛ́ lɔ́ ɖɔhun.Yě cí ɖi sunvi ké le fúflú ɔn lɛ́ɛ ɖɔ́hun, bɔ Mǎwǔ zé tɛnmɛ ɖokṕ d'anyǐ ná ye káká sɔ́yi, le zǐnvlu ɖaxó lɔ́ mɛ. ¹⁴ Henɔ́ci ke nyi jijimɛ cánwɛgɔ̌ lɔ́ bɛ sɔ́n Adámu jǐ i, é ko dɛn din xóxó bɔ é dó owen ékɔ ke Mǎwǔ zé dó ayi mɛ n'i ̌bo ɖɔ̀ ní dó; é ɖɔ̀:"Mi kpɔ́n ! Aklúnɔ kpó wenzangun ɖedóvo étɔn susu gégé lɛ́ɛ kpo ja, bo nǎ ɖɔ́ ohwɛ xá mɛ kpókpo, ¹⁵ bo nǎ dá ohwɛ nǎ lɛ́e kpó; yě ná bló le, ɖó onǔ nyinylǎ ke omɛdídá lɛ́ɛ wa hwekenu yě fɔ̀n gú dó Mǎwǔ jí lɛ́ɛ kpókpó, kpó oxó nyinylǎ ke ohwɛhutɔ́ éxɔ lɛ́ɛ ke mɔ nɔ ɖó sísi na Mǎwǔ gɛ́ lɛ́ɛ ɖɔ́ ɖó Mǎwǔ go lɔ kpó kpó wútu".Omɛ éxɔn lɛ́ɛ wú wɛ owɛn exɔn ke é dó lɔ ́ ɖɔ̀ xó dó. ¹⁶ Omɛ éxɔ́n lɛ́e,nǔɖé mɔ́ nɔ́ jɛ yětɔn jí gbeɖěgɛ́; okwe jɛ́n yě nɔ́ lé fan;yě nɔ zán ogbɛ yětɔn lě ke é jló yě ɖó há;yě nɔ́ yí onu go,bo nɔ blɛ̌ mɛ ɖu, bo na dó mɔ nǔɖé yi le omɛ si. ¹⁷ Amɔ̌, mi mɛvǐvɛ́ná ce lɛ́ɛ,mi fǐn nǔ ke mɛɖǒxlán Aklunɔ mǐtɔn Jezǔ klísi tɔn lɛ́ɛ ko ɖɔ ná mi ɖ'anyǐ lɔ́. ¹⁸ Le xónúgbo mɛ, yě ɖɔ́ ná mi ɖɔ̀:"Azǎn gǒdo gǒdo tɔn lɛ̌ɛ mɛ, mɛɖě lɛ́ɛ ná le,bo nǎ nɔ́ ɖɔ̀ slǎmɛ dó mi wǔ,bo ná zán ogbɛ yětɔn le ke ojlǒ nyinylǎ yětɔn lɛ́ɛ zɔ́n yě ɖó há. ¹⁹ Yě wɛ́ nɔ hɛn kínklán byɛ́ omɛ mɛ. Gbɛtɔ́ ke yě ̌nyí lɔ́ wɛ́ nɔ́ ɖú le yě jí; é má nyí oyɛ ɖeɖóvo wɛ nɔ ɖu le yě jí gɛ́. ²⁰ Amɔ̌, mi mɛvǐvɛ́ná ce lɛ́ɛ, mi ko lě lídǒ le nǔdíɖí mǐmɛ́ titéungbe ke mi ɖǒ lɔ mɛ ; mi nɔ xo ɖɛ kpó oyɛ ɖeɖóvo wě hɔ̌nhlɔ́n kpo, ²¹ ke mi le te ná Aklúnɔ mǐtɔn Jezǔ klísi nǎ dó ná ogbɛ mavɔ mavɔ wú le xomɛnyínyɔ́ étɔn mɛ, mi bo hɛn miɖě le wǎn yíyí Mǎwǔ tɔn mɛ. ²² Mɛ ke nɔ lě xo nǔkpɔ́n lɛ́ɛ wé onǔ ni nɔ bláwǔ na ́mi. ²³ Mi dɔn ye sɔ́n omyɔ mɛ bo ze hwlěn yě gán.Mi bokú nubláwǔ ná omɛ ɖyɛ lɛ́ɛ lɔsú gbá;ayi mitɔn ni ká nɔ́ te, mi gbɛ̌ wǎn ná ohwɛhuh wé ninɔmɛ ke yě ɖó lɔ́ káká ke yě ɖó le gbɛtɔ́ nyínyi yětɔn mɛ́ lɔ́ nɔ́ hɛn kuɖǐ lɔ́ jí. ²⁴ Amɔ̌n sus ná mɛ ke kpéwu bo nǎ cyɔn alɔ mi jǐ bɔ mi ma na do jɛ anyǐ gɛ, eyɔ́ mɛ ke kpéwu bo ná de mi xlè ablɔ̌málawǔ, bɔ awǎjijɛ ná kpé. ²⁵ Mǎwǔ ɖokpónɔ́ géé ke nyí mɛhwlɛ́ngantɔ́ mǐtɔn gbɔn Aklúnɔ mǐtɔn Jezǔ klísi jǐ le okpɔ̀nɔ̀xamɛ etɔn wé susu mɛ, susu, yɛyi, hɔ̌nhlɔ́n, kpó acɛkpikpa kpó nyi étɔn sɔ́n odo, bo nyǐ din, bo lɛ̌ nyǐ káká sɔ́yi. Amǐ