¹ Nɔvi ce lɛ, mi mɛ ke nɔ zan gbɛ mitɔn le nuɖiɖi ke mi ɖo na Aklunɔ mitɔn Jezu Klisi susu nɔ lɔ mɛ lɛ lɔ, mi ma ɖo na ɖe miɖe devo,le mɛ lɛ mɛ gɛ. ² Nɛ nyi ɖɔ sunnu akwatɔnɔ ɖe ɖo sikalɔkɛ, bo do awu ɖagbe ɖe, bo byɔ agun mitɔn mɛ; sunnu wamamɔnɔ ɖe lɔsu wa byɔ agun mitɔn mɛ, bo ɖe awu vunvun ɖe mɛ. ³ Ke ye byɔ agun lɔmɛ lɔ, mi ɖo sisi ganji ɖe na sunnu ke do awu ɖagbe lɔ, bo ɖɔ n'i ɖɔ: "wa flɔn anyi ɖo fikɔ, le susu we tɛn kɔ mɛ;" bo ka ɖɔ na wamamɔnɔ lɔ ɖɔ: "yɔ lɔ, nɔ te te ɖo flin, alo "flɔn anyi ɖo kɔ mɛ, le afɔ ce kpa". ⁴ Nɛ mi nɔ blo nu do lexa, mɛɖe ɖe ɖe vo wɛ nu na mɛ we nu wɛ mi le blo xɛn; linlin nyinyla ke ayixa mitɔn kplɔn mi lɔ wɛ mi nɔ do blo nu. ⁵ Nɔvi ce vivɛna lɛ, mi se: Mawu cyan wamamɔnɔ gbɛ kɔ mɛtɔn lɛ, bo na ye na nyi dɔkunnɔ ɖo nuɖiɖi mɛ, bo na nyi axɔluɖuto ke we akpa gbe ke ye do na mɛ ke nyi wan n'i lɛ lɔ we vi. ⁶ Vɔlɔ, mi mɛɖe lɛ lɔ, mi nɔ gbɛ wan na wamamɔnɔ lɛ ! E ma ka nyi dɔkunnɔ lɛ wɛ nɔ tacu mi wɛ, bo nɔ ze mi yi hwɛ nukɔn gɛ ja? ⁷ Ye mɛ xɔn wɛ nɔ ɖɔ xo nyinyla do nukɔn ɖagbe ke Mawu ze do mi ji lɔ a ye? ⁸ Xonugbo lɔ, nɛ mi nɔ blo axɔɖuluto Mawu tɔn we sɛn lɔ le ke Mawu xo wema ɖɔ ɖo lɔ, nu ganji wɛ mi le blo; ke nyi ɖɔ: "nyi wan na nɔvi towe ɖi yɔlɔsu ɖɔ hun". ⁹ Ɖo lexa, nɛ mi nɔ ɖe mɛ ɖe ɖo vo na mɛ ɖe lɔ, hwɛ wɛ mi le hu, toli wɛ mi le vɛ na sɛn lɔ. ¹⁰ Do nɛ mɛɖe vɛ toli na nu ke osɛn lɔ ɖɔ lɛ ɖokpo gee lɔ, nu ke sɛn lɔ ɖɔ lɛ kpo wɛ e vɛ toli na. ¹¹ Nugbo lɔ, me ke ɖɔ: "Ma lɛ aga gɛ" lɔ, e ɖokpo lɔ wɛ lɛ vɔ ɖɔ: "Ma hu mɛ gɛ". Exɔn wutu lɔ, e nyi a ma bo ma lɛ aga gɛ, bo ka hu mɛ lɔ, a gba sɛn wɛ. ¹² Mi nɔ ɖɔ xo, bo nɔ blo nu ɖi mɛ ke ye na ze sɛn da hwɛ na ɖo sɛn lɔ wɛ nɔ ɖe mɛ sɔn kannu gbenu. ¹³ Ɖo mɛ ke mɔ ku nublawu na mɛ gɛ lɔ, Mawu ma ja wa ku nublawu na elɔsu gɛ hwenu ke e na wa da hwɛ n'i; vɔlɔ, nublakunumɛ na ɖu ɖo wɛɖiɖo ji. ¹⁴ Nɔvi ce lɛ, nɛ mɛɖe ɖɔ: "Un do nuɖiɖi" bo ma nɔ ɖe xlɛ gbɔn nu wiwa etɔn le mɛ gɛ, etɛ wɛ nuɖiɖi xɔn ka nyi? ¹⁵ Nɛ nyi ɖɔ avɔ alo nuɖuɖu hwɛdo nɔvi sunnu alo nyɔnu ɖe, ¹⁶ nɛ mima na nu ke le vivɛ ɖe bɔ ye na do nɔ gbɛ gɛ, lobo ɖɔ na ye ɖɔ: "Mi na yi le fifa mɛ; mi do awu ganji, bo ɖu na ni kpe mi" lɔ, etɛ wɛ e na blo na ye? ¹⁷ Vɛ ke e le do nuɖiɖi xɛn: nɛ e ma no ɖe edee xlɛ gbɔn nuwiwa mɛ gɛ lɔ, nuɖiɖi kuku wɛ nyi le edee mɛ. ¹⁸ Ɖo lexa, na mɛɖe ɖɔ: Mi bo ɖo nuɖiɖi, bɔ nyɛ ɖo nuwiwa lɛ" lɔ, nya na ɖɔ n'i ɖɔ: " xlɛ le ke nuɖiɖi towe le do bɔ nuwiwa lɛ ma le mɛ gɛ nyɛ; exɔn lɔ, nyɛ na xlɛ nuɖiɖi ce we gbɔn nuwiwa ce lɛ mɛ". ¹⁹ A ɖinu dɔ Mawu ɖokpo gee wɛ le; e nyɔ ganji! Yɛ mawe lɛ ɖinu ɖɔ Mawu ɖokpo gee wɛ le, bɔ ye nɔ ɖi xɛsi, bɔ ye nɔ sisɔ. ²⁰ Ayixa masɔgbenanɔ! A ba ɖɔ ye ni ze le ke nuɖiɖi ke mɔ wa zɔn gɛ nyi nu vɔvɔ ɖo lɔ xlɛ wɛ jaa? ²¹ Dagbo mitɔn Ablaxamu lɔ, naɖe Mawu ka wa mɔ e do mɔ hwɛjijɔnɔ na ɖo? Mawu mɔ ɛ do mɔ hwɛjijɔnɔ na le nuwiwa etɔn lɛ wu; ɖo e ze vitɔn Izaki ze sa vɔ na Mawu ɖo vɔsakpe ji. ²² A mɔ a? Nuɖiɖi tɔn kpo nuwiwa tɔn lɛ kpo wa azɔn ɖo kpɔ, bɔ nuɖiɖi tɔn lilɛ nuɖiɖi blebu, ɖo nuɖiɖi tɔn kpo nuwiwa tɔn lɛ kpo nɔ wa azɔn ɖo kpɔ. ²³ Exɔn lɔ, nu ke ye wlan do Mawu xo wema lɔ mɛ lɔ jɔ; ke nyi ɖɔ: "Ablaxamu ɖu na Mawu, bɔ Mawu kpɔn do nuɖiɖi tɔn wu, bo ze bo mɔ hwɛjijɔnɔ. Lexa lɔ, ye na ylɔ ɛ ɖɔ Mawu we wannyi. ²⁴ Mi nɔ din ɖɔ Mawu ze gbɛtɔ do mɔ hwɛjijɔnɔ do gbɔn nuwiwa tɔn lɛ mɛ; e ma nyi nuɖiɖi etɔn kɛɖɛ wu wɛ gɛ. ²⁵ Ɖo lexa ɖokpo lɔ wɛ nyi na hlaxabu agalɛtɔ lɔ. Mawu ze do mɔ hwɛjijɔnɔ ɖo nuwiwa tɔn lɛ do xwe gbe, lobo gɔ alɔ na ye, bɔ ye gbɔn mɔ ɖevo bo sɔn. ²⁶ Xonugbo lɔ, le ke agbaza ke mɛ alindɔn ma le gɛ nyi nukuku ɖo lɔ, lexa ɖokpo lɔ wɛ nuɖiɖi ke ma nɔ ɖe eɖee xlɛ gbɔn nuwiwa lɛ mɛ gɛ lɔ nɔ nyi nu kuku ɖo.