¹ Ogan, mi wle bo na kannumɔnɔ ke le mi de le do jijlɔ ji ɖi le ke e jɛ ɖo. ² Mi ɖo nukɔn yiyi le odɛ mɛ ɖi le ke e jɛ ɖo, hwe exɔn nu mi na le gbesisɔ mɛ hwe lɛ kponu na do nɔ do kpɛ na Mawu. ³ Mi xo ɖɛ na mye lɛ lɔsu: Mawu ni wa fɛnu na mi na mi na nɔ do ɖɔ oxo etɔn. Hwe exɔn nu na kpego na ɖɔ xo do nubudo ke Mawu blo le Klisi mɛ, ke zɔn bɔ un le gan mɛ lɔ. ⁴ Mi xo ɖɛ na ma do ɖɔ xo de go le nujɔnu mɛ, ɖi le ke un ɖo na blo ɖo. ⁵ Kpodo mɛ ke ma yi se gɛ lɛ kpo, ayixa mitɔn ni le te le zɔnlin mitɔn lɛ mɛ. Mi hwlɛndo hwenu ke Mawu na mi. ⁶ Oxo mitɔn lɛ ni nɔ nyi oxo ɖagbe hwe binu, ke na nyɔ sise. Mi nɔ yi gbe na mɛ lokpo lokpo ɖi le ke e jɛ ɖo. ⁷ Ticiki na ɖɔ xo lɛ kpo na mi do gbɔn nyɛ go. nɔvi hado e, gbejinɔtɔ na Mawu lokpo bo le kpɔ xa un le azɔn Mawu tɔn mɛ. ⁸ Un ɖo e do xlan mi, taji na do ɖɔ le ke mi fɔn ɖo na mi bo na do lɛ do gan namɛ na mi. ⁹ Onezimu, nɔvi wan nyinanɔ gbejinɔtɔ le kpɔ xa Ticiki. omɛ mitɔn wɛ e nyi. kpɔmɛ, ye na ɖɔ nu ke le jɔ le fikɔ lɛ na mi. ¹⁰ Arisitaki, ke le gankpame xa un le do gbe na mi. Maki, ke nyi Barnabasi we onylɛ ylɔ vi, lɔsu le do gbe na mi. Un ɖi ɖɔ mi nyi nukplɔnmɛ Maki tɔn lɛ gba. Na e wa miɖe, mi yi ganji. ¹¹ Jezu, ke ye nɔ lɛ ylɔ ɖɔ Justus, le do gbe na mi gba. Le Juwifu ke yi se lɛ mɛ, ye mɛ ke le wa zɔn xa un na axɔluɖuta Mawu tɔn lɛ xɛn. Ye na un akɔnkpikpan. ¹² Epafras, ke yi mide nu lɔsu le do gbe na mi. Azɔn wa na Jezu Klisi tɔ xɔn lɔsu le fun ahwan do mi nu gbɔn oɖɛ etɔn lɛ mɛ. E byɔ ɖɔ mi ni nyi yisenɔ mimɛ, bo na le gbesisɔ xa nu ke Mawu ba. ¹³ E le wa zɔn susu na mi, na yisenɔ ke le Laodicee le kpo do Hierapolis: Un nyi kunnu ɖetɔ etɔn. ¹⁴ Luki, hadowe mitɔn doto ke nɔ gbɔ azɔn na mɛ lɔsu le do gbe na mi; Damas lɔsu gba. ¹⁵ Mi do gbe na nɔvi sunnu nyɔnu yisenɔ ke le Laodicee, kpodo Nimfa kpodo mɛ ke nɔ kpli le xwe tɔn gbe lɛ kpo. ¹⁶ Mi xa wema ke un wlan do xlan mikɔ le mye lɔsu e de. Exɔn godo, mi ze ze jo na agun ke le Laodicee na yisenɔ ke le toxo exɔn lɛ mɛ lɔsu na mɔ tɛnmɛ do xa gba. Bɔ mye lɔsu, mi xa wema ke sɔn Laodicee bo ja mide lɔ lɔsu. ¹⁷ Mi ɖɔ na Arkippe: «Cɔ ɖe we! Ye ze Mawu we azɔn ɖe na we, blo e ganji!» ¹⁸ Mi kpɔn gbe do na mɛ ke nyɛ Pɔlu, un wlan kpo alɔ ce kpo do xlan mi. Mi flin ɖɔ un le gankpamɛ! Mawu ni do na mi.