¹ Ɛɛ un jlo ɖɔ mi na nyɔ onu ekɔ wi: Un ɖo na funahwan na mi ta un, mi yisenɔ Laodise ton lɛ kpodo me ke ma mɔ kpɔn kpo nukun yetɔn kpo kpɔn gɛ lɛ. ² Un jlo ɖɔ ayixa yetɔn na gɔ kpodo akɔkpikpan kpo, ye na nyi ɖokpo le wan nyinyi mɛ, bo na lɛ gɔ kpodo nu nyinywɛ kpo. Hwenu exɔn nu ye na nyɔ tito hwihwla Mawu tɔn wi. Bɔ Klisi wɛ na blo, ³ bɔ dokun nu nyinywɛ zinzin tɔn lɛ kpodo nu nyinywɛ kpo hwla do eyɔ mɛ. ⁴ Un le ɖɔ le na mɛ ti ni nɔ kpɔn do blɛ mi ɖu kpodo numɛ vivi ɖe kpo gɛ. Xojɔxo un dɛn do mi, amɔ ayixa ce le kpɔ xa mi. ⁵ E vivi na un taun bɔ un do mɔ nu lɛ kpo le yi ganji le mi de, bɔ nuɖiɖini mitɔn do lɛ flɔn anyi ganji bo lido. ⁶ Mi yi Jezu Klisi ɖi Aklunɔ. Eyɔ, mi zan gbɛ le kɔndokpɔ mɛ le Klisi lɔ mɛ. ⁷ Mi do aɖɔ do do Eyɔ mɛ, Mi ɖo dolili le nuɖiɖi ke ye kpɔn mi lɔ mɛ bo nɔ do kpɛ na Mawu kpodo akpakpa kpo. ⁸ Mi cɔ miɖe na mɛ ti ni nɔ kpɔ blɛ mi ɖu kpo do linlin awo tɔn gbɛtɔ lɛ tɔn kpo gɛ. Awo ɖelɛwɛ bo flɔn gbɛtɔ we nu wiwa lɛ ji, hɔnhlɔn gbɛmɛ fikɔ tɔn lɛ ji. E ma flɔn Klisi ji gɛ. ⁹ Mawu nɔ nɔ agbaza Klisi tɔn mɛ blebu. ¹⁰ Bɔ mi ɖo alɔ do Klisi we ogbɛ me blebu, Eyɔ, ke nyi gan na hɔnhlɔn kpodo acɛkpikpa lɛ bisese kpo. ¹¹ KLisi me wɛ mi gbo ada le. Bɔ ada gbigbo xɔn ma nyi gbɛtɔ we alɔ wɛ blo gɛ. Klisi de wɛ e sɔn, bɔ gbɔn flɛn, E ɖe nu ke le do vivɛsise na mi lɔ sɛ. ¹² Do gbɔn mɛ nylɔ do tɔmɛ lɔ mɛ, ye ze mi do yɔdome xa Klisi, amɔ kpodo Eyɔ kpo, mi fɔn sɔn ku. Mi ɖi nu na hɔnhlɔn Mawu tɔn ke fɔn Klisi sɔn ku. ¹³ Mye, mi ku do nuwagbɔ mi tɔn lɛ wutu, bɔ mi ma lɛ nyi mɛ ke gbo ada lɛ gɛ. Amo Mawu na mi gbe kpodo Klisi kpo. E sɔ hwɛ mitɔn lɛ kpose sɔ kɛ mi, ¹⁴ E susu wema axɔ tɔn ke nɔ da hwɛ na mi lɔ, bo sɔ ta mi do osɛn lɔ wu lɛ. Bɔ e ke do akluzu ji do hen kija. ¹⁵ Mawu yi hɔnhlɔn kpodo acɛkpikpa kpo sɔn oyɛ nyiyla lɛ si. E ze oyɛ nyinyla xɔn lɛ mɛ bi, bo wa nu yetɔn ɖi gantɔ lɛ xa do gbɔn ɖuɖeji ovyɛ tɔn mɛ. ¹⁶ Hun mɛɖe ma si sɔ da hwɛ na mi ɖo nu ke mi ɖu alo mi nu wu gɛ, kabi oxwe wu gɛ ɖi sun yɔyɔ kpodo gbɔjɛzan kpo gɛ. ¹⁷ Exɔn lɛ bi, oyɛ nu ke na wa le tɔn wɛ, amɔ nu ke le ta un lɔ, e wɛ nyi Klisi. ¹⁸ Mɛ ti ma si gbɛ ɖuɖeji na mi gɛ. Un le ɖɔ mɛ ke no ze yɛɖe hunzu vi kpɛvu le wɛnzangun lɛ nukɔn do sɛn ye lɛ xo. Bɔ ye nɔ ze susu na nu ke ye mɔ le amlɔ mɛ. Mɛ xɔn lɛ nɔ ɖo linlin gbɛtɔ tɔn din, bɔ linlin xɔn nɔ ze ye zun goyitɔ. ¹⁹ Ye mɔ nɔ sin yeɖe do Klisi ke nyi ota lɔ wu gɛ. Co, ota lɔ we nɔ na awutu nu ke nyi nu taji lɛ. Do gbɔn eyɔ mɛ wɛ oxu kpo xugloxu lɛ kpo nɔ nɔ okpɔ mɛ le ganji mɛ, bɔ Mawu we nɔ na hihwɛn wu agbaza xɔn. ²⁰ Mi ku kpodo Klisi kpo, bɔ hɔnhlɔn gbɛmɛ fikɔ tɔn lɛ ma sɔ nyi nuti le nukɔn mitɔn ba gɛ. Amɔ mi nɔ wa nu ɖi gbɛ mitɔn kpole acɛ hihlɔn xɔn lɛ tɔn mɛ xa. Etɛ wutu mi nɔ lɛ nyi sɛn na onu exɔn lɛ: ²¹ «Nɔkpɔn ze ekɔ gɛ! Nɔkpɔn ɖu ekɔ gɛ! Nɔkpɔn ɖ'alɔ ekɔ go gɛ!» ²² E blo ye na onu ke nɔ bu hwenu ke ye zan ye ɖo lɛ. Osɛn kpodo nu kplɔnmɛ kpaɖɔ gbɛtɔ lɛ tɔn kpo wɛ e nyi! ²³ Xojɔxo wɛ: blo sisɛn, ze ɖewe hwe le wɛnzangun lɛ nukɔn, do vivɛsise na agbaza mɛtɔn, nu exɔn lɛ kpose ɖi nujɔnu. Co, osɛn xɔn lɛ ma nyi nujɔnu ti gɛ, e nɔ do vivi na mɛ na ojlo agbaza tɔn lɛ kpo un wɛ.