¹ Ke mi wa gan vɔ ɔ, mi se ɖɔ otɔ cɛncɛnto exɔn, Maluti wɛ e nɔ ylɔ ɖɔ. ² Oto lɔ mɛ nu lɛɛ nyɔ xomɛ do mi wutaun. Ke jokun bɛ jija, bɔ vivɔ gbɛ ɛ, ye bɔ myɔ ɖaxo ɖe, bo yi jonɔ mitɔn ɖ'ekɔn. ³ Pɔlu bɛ nuywɛ, bo na kɔn nyi omyɔ lɔ mɛ, bɔ manɔnu zakpata ɖokpo tɔn sɔn nuwyɛ lɔ mɛ, bo tɛ do alɔ etɔn wu, ɖo omyɔ lɔ we zozo hɛn ɛ. ⁴ Ke oto lɔ mɛ nu lɛɛ mɔ odan lɔ le gblɛlɛ le alɔ etɔn wu u, ye nɔ ɖɔ na yeɖee bo ɖɔ: "Dandan mɛ, omɛhutɔ wɛ omɛ ekɔ nyi; ɖo e gan le oxu si, co ohwɛjijɔ vodun yɛhwe kpo le godo n'i." ⁵ Pɔlu ka mimi odan lɔ do omyɔ lɔ mɛ; onu ti ma ka wa e lɔsu gɛ. ⁶ Omɛ lɛɛ ko le te kpɔn ɖɔ e na jɛ fifan ji, alo e na jɛ anyi bo ku ciciɖiɖi; amɔ, ke ye nɔ te kaka bɔ nuɖe masɔ wa ɛ gɛɛ, ye ɖyɔ gbe bo ɖɔ vodun yehwe wɛ e nyi. ⁷ Oto lɔ mɛ gan ke e nɔ ylɔ ɖɔ Publiwusi lɔ ɖo anyizan ɖokpo le akpa flɛɛn. E yi jonɔ mitɔn, bɔ e fɛ awu taun, bɔ mi nɔ oxwe etɔn gbe na azan atɔn. ⁸ Publiwusi we tɔ le anyimimlɔn, bɔ vivɔ le e ji, bɔ e le alɔnkpwɛn nyɛ ɔ. Pɔlu ka yi kpɔn ɛ, bo xo ɖɛ, bo ɖo alɔ e ji, bo gbɔ azɔn n'i. ⁹ Exɔn godo, azɔntɔ ke kpo le oto lɔ mɛ lɛɛ wa mɔ Pɔlu, bɔ e gbɔ azɔn na ye lɔsu. ¹⁰ Exɔn wutu wɛ ye wle yɛyi lɛɛ kpo na mi, bɔ ke mi le ohun mɛ byɛ ɔn, ye na onu ke na hudo mi lɛɛ kpo wu mi. ¹¹ Osun atɔn wɛ mi blo le oto exɔn lɔ mɛ, hwɛ kpo bo wa do ohun ɖe, bɔ ohun lɔ ko wa nɔ flɛɛn vivɔ hwenu; Alɛsandli wɛ e sɔn, bɔ e ɖo nyikɔ n'i ɖɔ" Vodun yɛhwe hoho lɛɛ." ¹² Mi wa jɛ silakusi, bo nɔ flɛɛn na azan atɔn. ¹³ Ke mi wa lɛ le flɛɛn, ohun lɔ gbɔn oxuto oxuto kaka yi jɛ Hlejio. Anyihɔngbe etɔn, jɛhɔn otofɔligbe tɔn lɔ jɛ nyinyi ji, bɔ azan atɔngɔ lɔ gbee, mi wa jɛ Puzɔlu. ¹⁴ Mi mɔ mye nɔvi le Klisi mɛ ke le flɛɛn lɛɛ, bɔ ye do kɛnklɛn na mi ɖɔ mi ni bo nɔ emye lɛɛ de na azan canwe, bɔ mi nɔ ye de. Flɛɛn wɛ mi sɔn bo yi. ¹⁵ Mye nɔvi le Klisi mɛ ke le Hlɔma lɛɛ ko se ɖɔ mi ja ye de, bo wa kpe mi le mɔji; mɛɖe lɛɛ wa nɔte kpɔn mi le Jonɔyitɛn Atɔn lɛɛ we nukɔn; mɛɖe lɛɛ zɔn ahwan hooo kaka wa kpe mi le Apiwusi we aximɛ. Ke Pɔlu mɔ ye e, e do okpɛ na Mawu, bɔ awu ya ɛ. ¹⁶ Ke mi jɛ Hlɔma, e na gbe Pɔlu ɖɔ e ni yi nɔ ovo; e ka ɖo sɔja ɖokpo n'i, bɔ e na nɔ cɔ ɛ. ¹⁷ Azan atɔngɔ lɔ gbe, Pɔlu ylɔ Jwifu nukun leji lɛɛ wa oxwe etɔn gbe. Ke ye wa kple e, e ɖɔ na ye ɖɔ: "Anɛevi lɛɛ, un ma jɛ agɔ ɖe do togun mitɔn gɛ; un ma ka jɛ agɔ do dagbo mitɔn lɛɛ lɛɛ we hwɛndo gɛ, cobɔ e wle un do gankpa mɛ le Jeluzalɛmu, bo jo un na Hlɔmanu lɛɛ. ¹⁸ Ke Hlɔmanu lɛɛ kan xo se un kaka a, ye ma mɔ nuɖe go bo na ɖo do, bo do da okuhwɛ na un gɛ, bo ko jlo bo na jo un. ¹⁹ Lo ɔ, Jwifu lɛɛ ka gbɛ; exɔn lɔ wutu, un mɔ ɖɔ e le dandan mɛ ɖɔ ma ylɔ hwɛ ɖaxo le Axɔlu Hlɔma tɔn de; e ma ka nyi oto ce we hwɛ na jɛ wɛ un le bo wa fi gɛ. ²⁰ Onu ke wutu un byɔ ɖɔ ma mɔ mi, bo na ɖɔ xo na mi lɔ xɛn; ɖo mɛ ke ɖo nukun wɛ Izlayɛli togun lɔ le lɔ wutu wɛ e do caba un ɖo le." ²¹ Ye ka yi gbe n'i ɖɔ: "Mye lɛɛ, wema ɖekpekpe ma wa na mi sɔn Judee, bo ɖɔ xo na mi do yɔ wu gɛ; mye nɔvi ɖe ma ka sɔn dɔn, bo wa jɛ ohwɛ towe nyinyla ɖe na mi gɛ. ²² Amɔ, mi jlo ɖɔ yɔ lɔsu ni ɖɔ nu ke a lin lɔ na mi; ɖo mi nywɛ ɖɔ fi lɛɛ kpo jɛn e nɔ ɖɔ xo nyinyla do sinsɛngbɛ exɔn wu le." ²³ Eyɔ kpo ye kpo ɖo azan, bɔ ye su geɖe geɖe d'eji, bo wa yi mɔ ɛ, le oxɔ ke mɛ e le lɔ mɛ. Sɔn zanfɔnnu kaka wa jɛ hwedo o, e tin nu mɛ na ye. E ɖɔ axɔluɖuɖu Mawu tɔn we oxo na ye; e ze Moyizi we osɛn lɛɛ kpo nukplɔnmɛ xoyiɖɔtɔ Mawu tɔn lɛɛ tɔn kpo do ɖɔ xo na ye, bo jlo na dɔn ye, na ye na ɖi nu ɖɔ onu ke ɖɔ do Jezu go wɛ e le lɔɔ, xojɔxo wɛ. ²⁴ Mɛ ɖe lɛɛ le ye mɛ, bo mɔ xojɔxo na oxo ke Pɔlu le ɖɔ lɔ, bo ɖi nu na; mɛ ɖe lɛɛ ma ka ɖi nu na gɛ. ²⁵ Bɔ ye nɔ ogbe ma ɖo kpɔ le, bo wle omɔ, bɔ Pɔlu ɖɔ na ye kpoun ɖɔ: «Oxo ke oyɛ ɖeɖovo ɖɔ na dagbo mitɔn lɛɛ ze gbɔn xoyiɖɔtɔ Mawu tɔn Ezayii ji lɔɔ, xonugbo jɛn e nyi. ²⁶ E wɛ nyi ɖɔ: "Yi togun exɔn lɔ de, bo ɖɔ n'i ɖɔ: Mi na se ceɖeceɖe, mi ma ka mɔ nu jɛ e mɛ gɛ; mi na mɔ ganji co mi ma ka na mɔ gɛ. ²⁷ Ɖo togun ekɔ we ayixa ko syɛn; ye su oto yetɔn, bo myɔ nukun, ɖo nukun yetɔn na wa mɔ nu wutu, bɔ oto yetɔn na wa se nu wutu, na ayixa yetɔn na wa ja onu mɔ jɛ nu mɛ gbe, bɔ ye na wa ja okɔ lɛ sɔn ohwɛ yetɔn lɛɛ godo gbe, na ma wa gbɔ azɔn na ye. Oxo ke Aklunɔ ɖɔ lɔ xɛn." ²⁸ Pɔlu ka lɛ ɖɔ na ye ɖɔ: "Mi bo nywɛ ganji ɖɔ Mawu ɖo hwlɛngan etɔn ɖoxlan mɛ ke ma nyi Jwifu gɛ lɛɛ; na ɖoto e." ²⁹ Ke Pɔlu ɖo oxo exɔn lɛɛ vɔ ɔ, Jwifu lɛɛ wle mɔ, bo le onu dɔn le yeɖe cɛncɛn ɔ taun. ³⁰ Pɔlu nɔ oxɔ ke e xaya lɔ mɛ na oxwe awe kpikpe, bo nɔ yi mɛ ke nɔ wa e de lɛɛ kpo we jonɔ le flɛɛn. ³¹ E nɔ ɖɔ axɔluɖuɖu Mawu tɔn we xo, bo nɔ kplɔn nu mɛ do Aklunɔ Jezu Klisi wu, kpo jiɖide kpo, bɔ mɛɖe kpekpe mɔ nɔ sɔ nɔ do tagba n'i gɛ.