¹ Enyɛ Pɔlu ci yi wo le do gakpamɛ do Yesu Kliso tamɛ koɖo nɔvi Timɔte yi ŋwlɛ wema cɛ ɖaɖa Filemɔ, miwo kpena vevi le Mawu dɔ lɔ mɛ. ² Mi gbe ŋwlii ɖaɖa miwo nɔvi nyɔnu Apiya koɖo Ashipu, amɛ ci miwo koɖo yɛ bɔ le ahwa dekɛ waa ; yi gbe ŋwlii ɖaɖa Mawu ha ci yi bɔnɔ do awu xwe mɛ. ³ Mawu miwo Da koɖo miwo Xwetɔ Yesu Kliso le wa xomɛvunu nɔ mi yi agbe na fafa mi. ⁴ Filemɔ, ŋɖonɔ eŋui eo gashiagamɛ le gbedoɖaɖa kinyɛwo mɛ, yi do nɔ akpe nɔ Mawu. ⁵ Ɖo ŋ se yi wo xonɔ nuxu nɔ ŋ soso awu lɔnlɔn koɖo xɔse ci yi e ɖo do Axwetɔ Yesu nu, yi gbe ɖiɔ doasɛ nɔ nɔvi xɔsetɔwo pleŋ. ⁶ Ŋ biɔbiɔ Mawu mɔ, awu lɔdodo xɔse nyɔ mɛ le ze toto edɔwawa mɛ nɔ wa jeshi enunyui ciwo yi mi ɖo le miwo junɔnɔ koɖo Kliso lɔ mɛ. ⁷ Nyao ɔ, nɔvinyɛ, eji jɔ ŋ sugɔ ; e yi ŋsɛn va nɔ ŋ do lɔnlɔn fɔ ci yi e ɖeɖeɔ nu. Ɖo, toto eo ji ɔ, ayexa je anyi nɔ xɔsetɔwo. ⁸ E yi na taɖo ci yi Kliso lɔ na acɛ ŋ yi na nu enu ci yi e ɖo a wa dru can ɔ, ⁹ ŋ ji mɔ na ɖe kuku nɔ eo le lɔnlɔn lɔ nyikɔ mɛ. Enyɛ Pɔlu ɔ, ŋ kpo, gbɔxwe yi gbe va le gakpamɛ do Yesu Kliso ta. ¹⁰ Ŋ ɖeɖeɔ kuku nɔ eo do evinyɛ, Onɛzimu, amɛ ci yi ŋ va trɔ eda nɔ le gakpamɛ. ¹¹ Sasa ɔ, ɖe nyi enuɖewanu o. Vɔ, eviɛ mɛ ɔ, eva nyi enuwanu nɔ enyɛ koɖo eo. ¹² Ŋ trɔtrɔɛ ɖaɖa eo ; shigbe evinyɛ jiji nɛ. ¹³ E dro ŋ mɔ na gbiɖɛ do nyɛɖeki gbɔ, nɔ a wawa edɔwo nɔ ŋ do awu tɔxu kaka a sɔ na gacimɛ yi na to le gakpamɛ do eŋɛnyui lɔ tamɛ. ¹⁴ Vɔ ɔ, ŋ ɖe ji mɔ na wa ŋ ɖe mana biɔ le wɔ kpɔɛdo se o. Nɛnɛ ɔ, awu nyuiwawa ɖa va le shigbe mɔ o sɔ enyɔ ʒin amɛji nɛo. Vɔ nɔ anyi koɖo eo ŋtɔ dro. ¹⁵ Taŋfɔin ɔ, Onɛzimu te le eo nu na azan kankin ɖe keŋ nɔ na va trɔ a kpɔɛ sɔyi tɛgbɛɛ. ¹⁶ Ɖe nyi hwashi tɔ ji yi abe trɔgbɔ do o. Vɔ ɔ, enu ciyi nyɔ sɔ wu hwashi ; taŋtaŋtɔ nɔ enyɛ, yi sɔwu ahan nɔ eo ɔ, e nyi nɔvi vevi le gbaza koɖo Kliso lɔ mɛ. ¹⁷ Lehan yi e sɔ ŋ shigbe exlɔ hanwo nɛ ɔ, xɔ nɔvi lɔ shigbe enyɛ yɔ hanwo nɛ. ¹⁸ Nɔ e wa ŋ de ko ɖo eo, alo e ɖu efɛn ɖe do eo ɔ, drɔɛ do anyi kɔnŋta mɛ. ¹⁹ Enyɛ Pɔlu ŋtɔ yi sɔ alɔ yi ŋwlɛ enyɔ cɛwo ɖaɖa eo mɔ : Na cu efɛn lɔwo nɔ eo. Ŋ de ji mɔ na nu nɔ eo a mɔ, eɔ can ɖu eoŋtɔ gbe fɛn do enyɛ hɛnnɛ o. ²⁰ Ɛɛ nɔvinyɛ, wa edɔ cɛ nɔ ŋ. Enyɛ yi a wɛɛ nɔ le Axwetɔ lɔ mɛ. Na, nɔ anyi ji a je mɛ le Kliso lɔ mɛ. ²¹ Ŋ kando awu tonusese ji, e yi dɔ yi ŋ ŋwlɛŋwlɛɔ wema cɛ ɖaɖao. Ŋ nya a wɛ sɔwugan le ŋ nui nɔ eo do. ²² Ŋ gbe biɔbiɔo zeɖeka mɔ, eo ɖe dra exɔ ɖeka do dadɛ nɔ ŋ. Ɖo ŋ le emɔ kpɔkpɔ mɛ mɔ wa jo ŋ sɔ toto miwo gbedodoɖawo mɛ, yi na trɔgbɔva mi gbɔ. ²³ Epaflasi, anyi kpena ci yi le gakpa mɛ koɖo ŋ do Yesu Kliso tamɛ, dodoɔ egbe ɖaɖa eo. ²⁴ Anyi bɔdonutɔ Maki koɖo Alishitaki, Demassi koɖo Luiki can do egbe ɖaɖa eo. ²⁵ Axwetɔ Yesu Kliso dɔmenyui le nɔ koɖo miwo gbɔngbɔn!