¹ Woman cɛ xo nuxu so enu ciwo yi Mawu ɖe wo doasɛ nii nɔ a doasɛ enu ciwo yi ɖo a vɔ jɔ le majinjinɖe mɛ nɔ yi dɔwaviwo . Kliso lɔ dɔ eyi cikplɔtɔ ɖaɖa e yi dɔwavi ʒan vayi nɔ a jeshi enu hunnɔ lɔwo . ² Eyi ʒan ɖe kunu mɔ enu ciwo pleŋ ci yi kpɔ nyi Mawu nyi yi gbe nyi nyɔnɔnui ci yi Kliso ɖe doasɛ Enu yi nyɔ nɔ amɛ ci yi hlɍnkɔ enyɔ cɛwo le amɛwo ŋmɛ . ³ Enu yi gbe nyɔ nɔ amɛ ciwo yi ɖokɔ eto eŋɛnyi cɛ yi gbe wakɔ do wo ji . Ɖo ɔ , hwecinu yi enu cɛwo a va jɔ do ɖe gbe ji,jino. ⁴ Enyɛ Ʒan yi ŋwlɛtɔ woma cɛ ɖaɖa Mawu ha amadrɛ ciwo yi le azi kan mɛ. Mawu ci yi li yɛ yi li sasa yi a gbe li le esɔmɛ le wa xomɛvunu nɔ mi yi a na fafa mi. Gbɔngbɔn amdrɛ ciwo yi le ŋkɔ nɔ Mawu fiɔzinkoin lɔ can le wa xomɛnunu nɔ mi a gbe na fafa mi hɛnnɛ . ⁵ Yesu Kliso ci yi nyi kunuɖetɔ egbejntɔtɔ lɔ can le wa xomɛvunu nɔ mi yi a gbe na fafa mi. Nyi amɛ ŋkɔtɔ ci yi fɔn soso ekuwodi yi gbe nyi ega nɔ nyigban ji fiɔwo pleŋ. Yesu Kliso yi lɔn mi yi hwlɛn mi gan le miwo nuvɔnwo mɛ sɔ todo e yi hun mɛ. ⁶ E sɔ mi wa avɔsatɔwo fiɔɖuxumɛtɔ wo nɔ mi a wakɔ edɔnɔ Mawu ciyi nyi Edalɔ yitɔ yi a nyi kɔkɔ koɖo acɛkpakpɔ sɔyi mavɔmavɔ. Xoaɖyi ! ⁷ Mi kpɔ ɖa , e gbɔkɔ le jeŋkui aɔwo mɛ . Amɛshamɛ a kpɔɛ kake amɛ ciwo yi tɔ ehwan yi can a kpɔɛ. Eyi nyigbanji kɔtawo pleŋ a va fankɔ egbɛkui do eta nii . Ɛɛ , xoaɖyi ! ⁸ Tɔhonɔ Mahu ŋsɛnwopleŋtɔ ci yi li yɛ yi li sasa yi a gbe li le esɔmɛ nu mɔ :'' Enyɛ yi nyi akufa koɖo omɛga ŋkɔtɔ koɖo docuitɔ. '' ⁹ enyɛ Ʒan , ŋ nyi miwo nɔvi koɖo miwo bɔdonutɔ ci yi bɔ senɔ veve koɖo mi , ci yi le Mawu fiɔƒuƒu lɔ mɛ koɖo mi koɖo ci yi dokɔ vevi enu le Yesumɛ. Wo klpɔ ŋ hɛnsɔyi etɔdomɛ , u ci yi wo yɔnɔ mɔ patimɔsu mɛ do Mawu nyɔ lɔ ci yi ŋ nukɔ koɖo do kunu ci yi ŋ ɖekɔ soso , Yesu nu ŋci . ¹⁰ Le Axwetɔ zangbe ɔ , gbɔngbɔn kɔkɔɛ va ŋ ji kpata . Eyi ŋ se yi egbe gangan ɖeka dyi le godu nɔ ŋ shigbe ekpɛn gbeɖyiɖyi ɛnɛ . ¹¹ Egbe ɖyiɖyi lɔ nukɔ mɔ : '' Iwlɛ enu ci yi e kpɔkɔ do woman mɛ yi a sɔɛ ɖaɖa Mawu ha amadrɛ cɛwo ciwo yi le : Efɛzi jugan , Simini jugan Pɛlugamu jugan , Tiyati jugan sadɛsu jugan , Filadɛfi jugan koɖo lawodise jugan mɛ.'' ¹² Eyi ŋ trɔŋgbe yi a kpɔ amɛ ci yi xokɔ nuxu nɔ ŋ , Nɛnɛ ɔ ,ŋ kpɔ kaɖigbanhɛnnu amadrɛ ci yi wo sɔ shika sɔ mɛ. Le ¹³ kaɖigbanhɛnnu lɔwo dodomɛ ɔ , ŋ gbe kpɔ agbetɔ hanci ɖeka . Edo awu jinjin gblɛgblɛ ɖeka yi gbe sɔ shika kpablanu ɖeka ta do akɔnnu. ¹⁴ Eta koɖo eɖa ciwo yi le eta nii ɣe pepepe shigbe gankpan eɣi nɛ . yi ŋkuviwo dakɔ ezo shigbe ezo ci yi xɔ xɛxɛxɛ ɛnɛ . ¹⁵ Yi fɔwo klɛnkɔ shigbe egajun ci yi akan ɛnɛ . YI gbemɛ ɖyikɔ shigbe etɔ ganganwo gbemɛ ɛnɛ . ¹⁶ Wlecivi amadrɛ le ɖushimɛ nii. Dekpui enuvenɔ ɖaɖa ɖeka tokɔ le aglanmɛ nii. YI ŋmɛ dakɔ ezo shigbe lehanci yi ewe danɔ ezo koɖu ŋsɛn do le ewezenya ɛnɛ ¹⁷ Ci yi ŋ kpɔɛ a hanɔ ,ŋ juin do akɔnmɛ nii shigbe amɛkuku ɛnɛ . Vɔɔ , e sɔ yi ɖushi mɛ lɔ dado ŋ ji yi nu nɔ ŋ mɔ :'' I gbe vɔn o , enyɛ yi nyi ŋkɔtɔ enyɛ yi gbe nyi docuitɔ. ¹⁸ Enyɛ yi nyi amɛ agbeagbe lɔ . ŋlcu vayisosa , vɔ ŋgbr fɔn soso ekuwodi yi le agbe sɔyi tɛgbɛɛ. Eku koɖo ekuwodi safliwo le alɔmɛ nɔ ŋ. ¹⁹ Eyi na taɖo ɔ , ŋwlɛ enu ciwo yi e kpɔ. Ŋwlɛn enu ciwo yi li yɛ koɖo enu ciwo gbɔkɔ a va jɔ le esɔgodumɛ. ²⁰ Kuso enuwlawla ci yi le wlecivi amadrɛ ciwo yi e kpɔ le anyi ɖushimɛ koɖo shika kaɖigbanhɛnnu amadrɛ lɔwo nu ɔ , wlecivi amadrɛ nyi cikplɔtɔ ciwo yi kpɔnɔ Mawu ha amadrɛ lɔwoji. Kaɖigbanhɛnnu amadrɛ lɔwo nyi Mawu ha amadrɛ lɔwo ''