¹ Ci yi mi klan amɛ lɔwo ɔ, mido etɔhungangan lɔ yi transɔyi kɔsi tɔɖomɛju mɛ i ŋkegbu ɔ, mi yi hlodɛsi tɔdomɛju mɛ yi so hunnɔtɔxu yiyi Patala jugan mɛ. ² Mi kpɔ etɔjihungangan deka le hunnɔtɔxu ci yi jikɔ a yi kan mɛ. Mi doi yi jeŋkɔ. ³ Ci yi mi gogokɔ shiplo tɔɖomɛju ɔ, mi toto fɔɖe nii yi jeŋkɔ sili ju mɛ agé etemaci mi vayi dyi do tii jugan mɛ fini ci yi etɔjigangan lɔ jikɔ a de agban do. ⁴ Eyi mi kpɔ nuplavi dékawo le hunnɔtɔxu yi ci wo gbɔ sɔnanɔ ŋkeke amadrɛ. Gbɔngbɔn kɔkɔɛ kanxle nukplavi lɔwo yi wo nu nɔ pɔlu mɔ yi ngbe yi zeluzalɛmu o. ⁵ Vɔ ci yi ŋkeke ci yi mi awa le hunnɔtɔxu sun ɔ, mi so. Nukplavi lɔwo pleŋ kodo wowo shiwo kodo wowo viwo kplɔ mi do yi sɔ dekɔ afɔnu toi nɔ mikeke mi fla jugan lɔ mɛ. Eyi mi je ekloji do axutu yi wa kuifan. ⁶ Ci yi mi klan miwonɔnɔwo degbɔ ɔ, mido etɔjihungangan mɛ yi jeŋkɔ yi wowa trɔyi axwemɛ. ⁷ Miwo yɛ ɔ, mi so le tii jugan hunnɔtɔ lɔ mɛ keke va ɖo Putolemayisi jugan mɛ yi sɔ vɔ etɔji mɔzɔnzɔn lɔ. Mido egbe nɔ nɔvi xɔsetɔ ciwo yi le hunnɔtɔxu yi nɔ wo gbɔ ŋkeke deka. ⁸ I ŋkegbu ɔ, mi so le wo gbɔ yiyi sezale jugan mɛ yi vayi ze Filipu, Mawuŋɛnyuidratɔ gbɔ. Filipu yi nyi amɛ amadrɛ ciwo wo can le zeluzalɛmu nɔ wo a kpɔ. ⁹ Filipu wa evi nyɔnuvi lea lɔji amɛn dɛ. Wo xonɔ nuxu eŋɛnyuidotɔwotɔ? ¹⁰ Mi nɔ hunnɔtɔxu sɔnanɔ ŋkeke dewo gbɔwe yi Mawu ŋɛdotɔ deka so zude kan mɛ yi va kɔdɛ. Wo yɔɛni mɔ Agabusu. ¹¹ E va migbɔ yi sɔ pɔlu kpablanu bla afɔwo kodo alɔwo nɔ yideki yi nu mɔ : Enyɔ ci yi gbɔngbɔn kɔkɔɛ nu ke : e nu mɔ ahan yi yudatɔwo bla amɛ citɔ yi nyi kpablanu cɛ le zeluzalɛmu yi a sɔ amɛ lɔ sa nɔ amɛmanyi yudatɔwo nɔ. ¹² Le enyɔ hunnɔtɔ godu ɔ, miwoŋtɔwo kodo nɔvi xɔsetɔ ciwo yi le sezale hunnɔtɔxu de kuku nɔ pɔlu mɔ yi ŋgbe yi zeluzalɛmuo. ¹³ Vɔ ɔ, pɔlu biɔ mi se mɔ : nyi vin yi mi fankɔ yi a gbɔjɔ lanmɛ nɔ ŋ ɔ? Enyɛ yɛ ɔ, de nyi awlɛwo mɛ nɔnɔ dekɛ yi ŋ le egbesɔsɔ nɔ le zeluzalɛmu o. Vɔ ɔ, ŋ gbe le egbesɔsɔ a ku le zeluzalɛmu do eta nɔ axwetɔ yesu. ¹⁴ Ci yi mi de sɛn eŋ xo nunu nii yi e xɔ egbe miwo nyɔ ji ɔ ɔ, mi tashii yi nu mɔ : tɔhonɔ dro le nyi wawa! ¹⁵ Le ŋkeke hunnɔtɔwo godu ɔ, mi drado yi jeŋkɔ zeluzalɛmu. ¹⁶ Sezale nukplavi dekawo can kplɔ mi do wo kplɔ mi yi nukplavi deka ci yi wo yɔnɔ mɔ Munasɔn yi e so shiplo toɖomɛju mɛ gbɔ, nɔ mia vayi ze gbɔ. Munasɔn trɔ nukplavi yɛ ɔ, e jinjin. ¹⁷ Ci yi mi vayi do zeluzalɛmu ɔ, nɔvi xɔsetɔwo xɔ mi koudo jijɔ. ¹⁸ I ŋkegbu ɔ, pɔlu kplɔ mi yi zaki xwemɛ ehamɛmɛganwo pleŋ can va hunnɔtɔxu lɔ. ¹⁹ Eyi pɔlu de egbe nɔ wo yi je enu ciwo pleŋ yi mawu wa toto sɛnsɛn dɔ ci yi e wa mɛ nunu nɔ amɛmanyi yudatɔwo. ²⁰ Ci yi wo sev enyɔ lɔwo degbɔ ɔ, wo kanfu Mawu yi nu nɔ pɔlu mɔ : nɔvi, e kpɔ a? Miwo nɔvi yudatɔ kotokun nɛni de xɔ yessu ji se. Wo pleŋ gbe bia ŋkuvi do esewo nu yi wakɔ do wo ji. ²¹ Vɔ ɔ, wo nukɔ soso eo nu nɔ wo mɔ eo kplakɔ enu yudatɔ ciwo yile akot buwo mɛ mɔ wo le de ekɔ le Mɔyizi nu; wo ŋgbe gbe so evo nɔ wowo viwo alo a nyi wowo xwe kɔwo o. ²² Le mi awɛɛ do yɛ ɔ? Wo ke a va se kokoko mɔ eo va elɛ. ²³ E yi na tado ɔ, nɔ mi nu enyɔ de nɔ eo ɔ, na sii. Amɛ amɛmɛ le mi mɛ le elɛ yɛ ciwo yi do egbe nɔ Mawu. ²⁴ Kplɔ wo ayi wa edyiklɔklɔ kɔnu eoŋtɔ yi a gbe wa nɔ wowo can. Ehoci pleŋ yi wo a zan le hunnɔtɔxu lɔ yi a sɔ lun eta ɔ na cui. Gahunnɔtɔmɛ ɔ, amɛshamɛ kpɔ mɔ enyɔ dede nyi nyɔnɔnui le enyɔ ciwo nu nɔ yewo soso eo mɛ o. Vɔ ɔ, eo can, eo wakɔ do ese lɔwo ji. ²⁵ Miwo yɛ ɔ, miwo ŋwlɛ enudada amɛmannyi yudatɔ ciwo yi va tro xɔsetɔwo mɔ miwo kpɔ mɔ de doyi a du elan ci yi wo sɔ sa avɔn nɔ vijuwo; gbe wo dedo yi a tɔ enu ahun o. Wo de do yi a du elan ci yi ehun de kɔdo nyi gban nɔ o; gbe wo de do a nyi hetelitɔnɔwo o. ²⁶ Eyi i ŋkegbu ɔ, pɔlu kplɔ ŋsu amɛnɛ lɔwo yiyi vayi wa edyuklɔklɔ kɔnu lɔ yiŋtɔ yi gbe wa nɔ wowo can le i godu ɔ, e yi Mawuxwe yi vayi nu azan ci gbe akɔnu lɔwo a vɔ do yi wo a sa avɔn nɔ wowo domɛto deka do nɔ amɛwo. ²⁷ Ci yi ŋkeke amadrɛ yikɔ vɔvɔnu ɔ, yudatɔ ciwo yi le azi kaan mɛ va kpɔ pɔlu le Mawuxwe lɔ mɛ yi fɔn ahwakɔn lɔ ɖo ji keŋ yi lii. ²⁸ Wo tɔ axa dodo mɔ : Israyɛlitɔwo, miva xɔ nɔ mi! ŋsu ci yi le enu kplakɔ mi va xɔ nɔ mi! ŋsu ci yi le enu kplakɔ amɛshamɛ toto afishafi ke. E kpanŋkɔ jukɔn lɔ, ciwo yi Mawu do toto Mɔyizi ji kodo Mawuxwe cɛ! Ecɛyɛ ɔ, e gbe edɔn kplɔ amɛmanyi yudatɔ dekawo va Mawuxwe lɔ mɛ yi xo edyi texwe kɔkɔɛ cɛ! ²⁹ Do ɔ, yudatɔwo kpɔ pɔlu kodo trofimu ci yi si Efɛzi yi wo le esa dyikɔ le zeluzalɛmu jugan lɔ mɛ vayi. Eyi wo bukɔ mɔ pɔlu kploɛ yi Mawuxwe lɔ. ³⁰ Ezi tɔnkɔ le jugan lɔ pleŋ mɛ hun yi jukɔn lɔ lɔ ahwa so afi, afiwo yi va le pɔlu yi dɔin toi le Mawuxwe lɔ mɛ yi cu ehɔn lɔwo zeɖeka. ³¹ Wo jikɔ mɔ yewo a wu pɔlu. Vɔ ɔ, hlɔmutɔwo sɔjawo ga va se mɔ ezin tɔnkɔ le jeruzalɛm lɔ pleŋ. ³² Zeɖeka ɔ, yɛ kplɔ hlɔmutɔwo sɔjawo koudo sɔjakave howigawo yi shi eju jeŋkɔ. Keke ahwakɔn lɔ a kpɔ hlɔmutɔwo sɔjawo ga lɔ koudo sɔja kpɛtɛwo ahan vɔ, wo mi pɔlu xoxo. ³³ Eyi hlɔmutɔwo sɔjawo ga lɔ tegogo hunnɔtɔxu yi le pɔlu yi de egbe mɔ wo le blɛɛ koudo awlɛga amɛve. Le godu ɔ, ebiɔ ahwakɔn lɔ se mɔ mi yi nyi ma yi nyi yi yi wa ma. ³⁴ Vɔ le ahwakɔn lɔ mɛ, nɔ amɛolewo dokɔ axwa yi le eke nukɔ ɔ, ebuwo a dokɔ axwa yi a le ebu nukɔ. Ci yi sɔjawo ga lɔ de se eta nɔ enyɔ de le amɛde nu o le ezin ci yi tɔnkɔ mɛ ɔ, e de egbe mɔ wole kplɔ pɔlu yi sɔjawo nɔxu. ³⁵ Ci yi pɔlu tokɔ exɔmɔnukpewo ji yi yikɔ hunnɔtɔxu lɔ ɔ, va zian yi sɔjawo kɔ pɔlu do eji do ahwakɔn lɔ le adan ji. ³⁶ Amɛ sugbɔtɔ lle jukɔn lɔ mɛ yi kplɔ pɔlu do yi le axwa dokɔ mɔ : Miwui! ³⁷ Ci yi wo kplɔ pɔlu yikɔ keke jikɔ a do sɔjawo nɔxu lɔ ɔ, e nu nɔ sɔjawo ga lɔ mɔ : Enyɔ deka le ŋ shi. A de emɔ nɔ ŋ nɔ ma nui a? Eyi yɛ biɔɛ se mɔ : A nyi ese glɛkigbe? ³⁸ Dee nyi eo yi nyi Ezipututɔ deka ci yi na yi ezin tɔn le ŋkeke cɛwo mɛ yi kplɔ etogbantɔ kotokun amɛnɛ yi zoxu sakli sakli mɛ ba? ³⁹ Eyi pɔlu doŋci nii mɔ : Enyɛ ɔ, yudatɔ ŋ nyi yi so tasi jugan mɛ le silisi kan mɛ jugan ci yi nyikɔ yi eto nɔ mɛ yi ŋ so. ŋ de kuku nɔ eo mɔ eo le na egbe ŋ nɔ ma xo nuxu nɔ jukɔn lɔ. ⁴⁰ Sɔjawo ga lɔ na egbe pɔlu yi ede exɔmɔnukpe lɔwo ji yi wa alo nɔ jukɔn lɔ yi amɛshamɛ be enu. Eyi e xo nuxu nɔ wo le Eble, yudatɔwo gbe mɛ.