¹ Ci yí Yesu to le Mawuxwe lɔ mɛ yí ɖedo, yí 'nukplanviwo lɔ do nii. ² Eyi Yesu nu nɔ wo be: "Mí kpɔkpɔ enu cɛwo pleŋ a? Le Nyɔnɔnui mɛ ɔ, ŋ nunuɔ nɔ mí be : Ekpe ɖe d'a gbe va kpɔtɔ yí a nɔ́ ekpeɖe ji o. Wo a gban wo pleŋ." ³ Ci yí Yesu nɔ anyinɔnɔ do olivu 'ci 'kpo ji ɔ, 'nukplanviwo ɖekɛwo tegogoi yí biɔ́ɛ se be : "Gahinde mɛ yí enu cɛwo a vá tɔ́ jɔjɔ ɔ,? Jeshidu hinde yí mí a kpɔ́ yí a nyá be gamɛ sun yí à trɔgbɔ ɔ,yí jeshi hinde yi mí a kpɔ yí a nya be xexe jijiɛ a gu ɔ? Nùi nɔ mì." ⁴ Yesu ɖoŋci nɔ wo be: "Mí kpɔ nyuiɖe nɔ amɛɖe ŋgbe va flu mí go." ⁵ Ɖo amɛ sugbɔ a va vá, a sɔ́ nyaŋ nyikɔ yí a nunuɔ be: "Enyɛ yí nyí Kliso lɔ!" Wo a flu amɛ sugbɔ. ⁶ Nɔ́ mí va seseɛ be eju ciwo yí sɔ́ mí gbɔ le ahwa wa ɔ, yí ciwo yí jiji le mí gbɔ le aahwa wa ɔ, mí ŋgbe vɔn go. Ahwa hɔnwo ɖó a jɔ. Vɔ ɔ, d'é nyi xexe gugu gamɛ yí nyi hɔn go. ⁷ Jukɔn ɖe a vá tɔ́ ahwa wawa kodo Jukɔn ɖe yí efiɔɖuxu ɖe a vá tɔ́ ahwa wawa kodo efɔɖuxu ɖe. Shive a va tó. Nɛnɛke yí nyigban ava hunhun le ekan vovovowo mɛ nɛ. ⁸ Enu jɔjɔ hɔnwo pleŋ a va le shigbe veve ŋkɔtɔ ciwo yí nyɔnu senɔ gbɔxwe yí jinɔ evi han ɛnɛ. ⁹ Le hwehɔwonu ɔ, wo a vása mí nɔ́ wo a ɖe efun nɔ mí yí a wu mí. Jukɔnwo pleŋ a gbé eŋua nɔ mi dó nyaŋ 'ta. ¹⁰ Amɛ sugbɔ a klɛn enu yí a jɔin le xɔse 'mɔ jí. wo a sasa wowonɔnɔwo yí a gbe xaxa wowonɔnɔwo. ¹¹ Amɛ ciwo yí kannɔ ŋsu be yewo nyi mawu 'ŋɛdotɔwo a va va yí a flu amɛ sugbɔ. ¹² Enuvɔn wawa a va gban do xexe lɔ mɛ kaka amɛ nɔvilɔnlɔn ci yí le amɛ sugbɔ mɛ a va bú. ¹³ Vɔ amɛ ci yi a dó eji kaka sɔyi vɔvɔnu a kpɔ́ hwlɛngan. ¹⁴ Wo a nu efiɔɖuxu lɔ 'ŋɛnyui cɛ le xexe lɔ pleŋ mɛ kodo axwa. Enuhɔn yí wo sɔ ɖe kunu nɔ́ akɔtawo pleŋ nɛ. Eyi le eyɛ godu ɔ, wo a gú xexe lɔ hɔnnɔ." ¹⁵ " Mawu 'ŋɛdotɔ Daniyɛli xo nuxu so enunyɔŋnyɔŋ ɖeka nú. gamɛ gbɔgbɔ yí wo a vá tɔ́ enunyɔŋnyɔŋ ci yí wo gblé kpɔkpɔ le texwe kɔkɔɛ wo. (Amɛ ci yí le enu lɔ hlɛn le mɔŋje mɛ nyuiɖe) ¹⁶ Nɔ́ ega lɔ mɛ va ɖó ɔ, amɛ ciwo yí a le Ʒude 'kan mɛ ɖó ashi kpé ekpowo ji age, ¹⁷ Amɛ ci yi a le exɔ ci yí wo sɔ́ ekɔ cu aza nɔ tamɛ ŋgbe dyi a va sɔ enuɖde le yi 'xɔ lɔ mɛ go. ¹⁸ Yí amɛ ci yí a le ebomɛ ŋgbe gbɔva axwe mɛ a va sɔ yi vuvɔwu go. ¹⁹ Gamɛvɔin yí a nyi nɔ́ nyɔnu ci yi a nyí efunɔ kodo ci a e le anɔ na evi! ²⁰ Mí wa kuifan nɔ́ mawu nɔ míwo shishi ŋgbe va jɔ do vuvɔwleci alo dó gbɔngbɔn hwenu go. ²¹ Ɖó lé ŋkeke hɔnwo ji ɔ, amɛwo a se vevi sugbɔ. Amɛɖe de se vevi hɔn hanɖe kpɔ́ so xexe lɔ gɔnmɛjeje gacimɛ yí Mawu wa enuwo keŋkeŋ ɖegbɔ vasɔɖo egbɛ́. Nɛnɛke kpɔ amɛɖe d'a gbe va se vevi hɔn hanɖe kpɔ o nɛ. ²² Nɔ́ Mawu de ɖe le vevisese ŋkeke hɔn lɔwo jí́ kpɔtɔ sasa o ɔ, amɛɖe d'a cí agbe go, vɔ ɔ, é ɖe le wo ji kpɔtɔ dó amɛ ciwo yí é can nɔ́ wo a nyí yitɔ ŋci. ²³ Nɔ́ amɛɖe va nu nɔ mí be "kliso lɔ le elɛ! " Alo : " é le hunɖaa!" ɔ, Mí ŋgbe xɔɛ ji se go. ²⁴ Ɖo ɔ, ŋsu kantɔwo a va va ́ yí a nu be yewo yí nyi Kliso lɔ alo yewo yí nyi mawu 'ŋɛdotɔwo yi a le jeshidu ganganwo kodo enudanŋdowo ɖeɛ tii. Kaka nɔ́ wo kpeji ɔ, wo a flu amɛ ciwo mawu can hɛnnɛ. ²⁵ Agoo nɔ mí! Ŋ kanxle mi vɔ sɔso enu ciwo yí a vá jɔ nu. ²⁶ É yí ná taɖo nɔ amɛɖe vá nu nɔ́ mí be : "Mí kpɔ ɖa, é le zoxu sakli sakli mɛ!" ɔ, mí ŋgbe yi go. Nɛnɛ ke nɔ́ wo vá nú nɔ mi be: "Mí kpɔ ɖá, é be do exɔ mɛ elɛ!" Mí ŋgbe xɔɛ ji se go. ²⁷ Shigbe lehanci yi eji ɖenɔ ezo le akpa ɖeka nɔ́ jiŋkushi kaka a yi akpa ɖitɔ lɔ ji nii dó nɛnɛ ɔ, ahan yí Agbetɔvilɔ a vá vá dó nɛ. ²⁸ Fini ci yí enukuku le ɔ, ehɔn yí klansuwo bɔnɔdo nɛ." ²⁹ " Hwenu ci yí vevesese ŋkeke hɔn lɔwo a vayi ɖegbɔ ɔ, ewe d'a gbe klɛn go yí wleci d́'a gbe ɖyi go. Wleciviwo a hlɛ́n kotokota kodo nyigban yí jeŋkushi cɛkpakpawo a hunhun. ³⁰ Eyi jeshi ci yi a dansɛ be Agbetɔvi lɔ gbɔgbɔ a ze le jeŋkushimɛzɔyɔwo mɛ yí nyigban jí 'kɔtawo pleŋ a tɔ́ ekuifanfan. Wo a kpɔ́ Agbtɔvi lɔ yí jeŋkushimɛzɔyɔwo a trɔdoi yí á ɖyɛɖyɛ kodo ŋsɛn gangan ɖeka le klɛnklɛn mɛ. ³¹ Eyi le ekpɛn gangan ɖeka ɖyiɖyi mɛ ɔ, á dɔ́ yi dɔlawo ɖaɖa nyugban zogo amɛnɛ lɔwo jí nɔ́ wo a bɔ amɛ ciwo yi yi é can sɔto xexe lɔ pleŋ mɛ, so ago cɛ ji yi ago huɖeɖa ji." ³² " Mí kplan enu sɔto figici labalu cɛ nu: nɔ́ figici ɔ, mí nya nɔ́ be fiɔta gogo. ³³ Nɛnɛke nɔ́ mí va tɔ́ enu hɔnwo pleŋ kpɔkpɔ ɔ, mí a nyá be gamɛ tɔ sunsun nɔ Agbetɔvi lɔ yí á trɔgbɔ,. É le ehɔn ji vɔ. ³⁴ Le nyɔnɔnui mɛ ɔ, ŋ nunuɔ nɔ mí be : jijimɛ cɛ wo d'a kú vɛ gbɔxwe yí enu hɔnwo pleŋ a vá jɔ go. ³⁵ Jiŋkushi kodo nyigban a vá yi, gankegan yi anyi 'nyɔwo a li tɛgbɛɛ." ³⁶ " Amɛɖe de nyá ŋkeke alo egaxoxo ci yi xexe lɔ nu a vá yi do go. Kaka sɔje jiŋkushi dɔlawo kodo mawu Eviɛ lɔ ji cán ɔ, amɛɖekpokpoi de nyii go. Mawu Eda ɖekɛ kpáŋ yí nyii. ³⁷ Enu ci yí jɔ le Nɔwa gamɛ, é yí a vá jɔ hwecinu yi Agbetɔvi lɔ a vá trɔgbɔ. ³⁸ Ggɔxwe yi eshi gangan lɔ a vá xɔ eju ɔ, amɛwo le enu ɖuɔ, le enu nuɔ, le nyɔnu ɖeɛ yi gbe sɔsɔ nyɔnu nana asu kaka sɔnanɔ hwecinu yí Nɔwa ɖó ɖakahun lɔ mɛ. ³⁹ Kpɔ́ wo de nya be enuɖe jɔjɔ o kaka sɔnanɔ hwecinu eshi gangan lɔ va kplɔ wo yi. Nɛnɛhan yí Agbetɔvi lɔ trɔtrɔ gbɔ a vá le do nɛ. ⁴⁰ Le gahɔnmɛ ɔ, ŋsu amɛve a le bomɛ. Wo a cán ɖeka yi a gbe ɖeka. ⁴¹ Nyɔnu amɛve a le jinuku cuɔ le ete ji. Wo a cán ɖeka yí agbe ɖeka. ⁴² Éyí ná taɖo ɔ, mí nɔ ŋzɔn. Ɖo mí de nyá gacimɛ yí miwo 'xwetɔ lɔ a trɔgbɔ go. ⁴³ Mí mɔŋje enyɔ cɛ mɛ nyuiɖe: Nɔ́ axwetɔ ɖé nya gacimɛ yi flanfinɔ a vá gban axwe nii ɔ, á nɔ ŋzɔn yí a gbé be flafinɔ lɔ da ɖó ye 'xwe mɛ go. ⁴⁴ Éyi ná taɖo ɔ, miwo cán mí nɔ glagla ji ɖɛ. Ɖo ɔ, Agbetɔvi lɔ a vá vá dó gacimɛ yí mí de ɖó eŋ do go." ⁴⁵ "Mi yi nyi edɔwavi egbenɔtɔ ci yi nyá ŋuɖɛ́ ɔ? Éɖyi edɔwavi cɛ ci yi yi 'ga sɔ́ ɖó enu nɔ kpɛtɛwo yí é nanɔ enuɖuɖu wo dó gamɛ ji. ⁴⁶ Enu yi nyɔ́ nɔ́ edɔwavi ciɖe nɔ yi gá trɔ gbɔ yi vá kpɔ́ɛ le edɔ cɛ ji. ⁴⁷ Le nyɔnui mɛ ɔ, ŋ nunuɔ nɔ mí be ega lɔ a vá sɔ yi dɔkunuwo pleŋ doashi nii be yi lé kpɔ wo ji. ⁴⁸ Vɔ nɔ́ ényi edɔwavi vɔn yi é nyi sasa ɔ, á nú le yi ji mɛ be ye 'ga d'a gbɔ eviɛ trololo go ⁴⁹ yí a tɔ́ yi kpenawo xoxo yí a le enu ɖuɔ, a le enu kodo ahanumutɔnɔwo. ⁵⁰ Yi 'gá a vá trɔgbɔ le ŋkeke kodo egaxoxo ciwo nú yi d'é ɖo eŋ do go nu ⁵¹ yí a nyii yi eto ci yí wo a dɔn nii. Ehɔntɔxu yi amɛwo a fan avin yí a ɖu aɖukli le nɛ."