¹ Yesu nu nɔ ahwakɔn lɔwo pleŋ kodo yi nukplanviwo be: ² "Esedɔwatɔwo kodo falishitɔwo sɔ ese ciwo mawu do sɔ to Mɔyizi ji wa edɔ yi ɖe wowo gɔnmɛ nɔ amɛwo. ³ É yi na taɖo ɔ, mí ɖo a bunɔ wo yí a wa nɔ do enyɔ ciwo pleŋ yi wo nu ji. Vɔ ɔ, mí gbe kpɔ do enu ciwo yí wo wawa nu yi a wa go. Ɖo ɔ, wo de wanɔ do enu ci yi wo kplankpan amɛwo ji go. ⁴ Wo wanɔ ɖoɖo sugbɔ ciwo yi va trɔ agban kpɛn kpɛn yí Ʒinɔ amɛwo jí be wo le hɛn. Vɔ ɔ, wowoŋtɔwo de lɔnnɔ be yewo a do alɔ wo yi a sɔ alɔvi lé agban lɔ kodo wo kpetii go. ⁵ Wo wanɔ wowo 'nuwo pleŋ be nɔ amɛwo a kpɔ. Nɛnɛ ɔ, wo blanɔ cila ciwo yí gangan sɔwu amɛwotɔ do ŋgon kodo aba nɔ wo wawa gbedodoɖa. Wo gbe sɔnɔ aka lɔnlɔn gblɛlɛlɛ ɖekawo tanɔ do wowo 'wu vlayawo 'tuga nu. ⁶ Wo jinɔ bubu tɔxuwo a nɔ le exweɖuxuwo kodo mawusɛnxuwo ⁷ yi gbe jinɔ be amɛwo de do egbe nɔ yewo kodo bubu yi a gbe yɔyɔ yewo be meganwo le egodoxuwo. ⁸ Vɔ mìwo ɔ, mi ŋgbe jinɔ be wo le yɔyɔ yewo be mɛgan go. Ɖo amɛ ɖɛkɛwo yi mí nyi yi cicagan kuɖeka yi li nɔ mí. ⁹ Nɛnɛke yí mí d'a yɔyɔ amɛɖe le nyigban ji be mìwo 'da nɛ. Ɖo Eda kuɖeka yi li nɔ mì. É yi nyi mawuci yí le jiŋkushi. ¹⁰ Mì ŋgbe lɔ nɔ wo a yɔyɔ mì be ega go. Ɖo ega kuɖeka yí li nɔ mí E yi nyi Kliso lɔ. ¹¹ Amɛ ci yí nyi mɛgan le mí mɛ ɖo a nyi edɔwavi han nɔ mí. ¹² Nɔ amɛɖe kɔkɔ yiɖeki do ejiɔ, Mawu a bɔbɔɛ va gɔnmɛ. yi amɛ ci yí bɔbɔnɔ yiɖeki do gɔnmɛ ɔ, mawu a kɔkɔɛ do eji." ¹³ Yesu nu nɔ wo be: "Babɛɛ nɔ mí, miwo Esedɔwatɔ kodo Falisitɔ, ayemɛnuwatɔwo! Mí cu jiŋkushi 'fiɔɖuxu 'hɔnwo do amɛwo yí amɛwo ci ehɔn godu. Míwoŋtɔwo d'a sɛn eŋ yí jiŋkushi 'fiɔɖuxu lɔ mɛ go keŋ yí trɔ xexeɛ emɔ nɔ amɛ ciwo yi é dro. ¹⁴ Babɛɛ nɔ mí, míwo esdɔwatɔwo! Mí xɔnɔ enuwo pleŋ le kposhiwo shi gankegan yí a gbe le gbedodoɖa jijiwo waa nɔ amɛwo a kpɔ. É yi na yi wo a ɖo kojo kodo mì veviɖe sugbɔ sɔwo amɛ kpɛtɛwo. ¹⁵ Babɛɛ nɔ mí esedɔwatɔ ko Flisitɔ ayemenuwatɔ! MÍ ɖyinɔ esa to afshiafi le nyigan kodo axu ji a le maxɔsetɔ kuɖeka jiɛ be nɔ yi a trɔ xɔsetɔ yi nɔ mi va kpɔɛ ɔ, mí sɔ trɔnɔ ezomavɔmɛtɔ sɔwu míwo tɔwo zeve. ¹⁶ Babɛɛ nɔ mí amɛkplɔtɔ ŋkuvitɔntɔntɔnɔwo! Nɔ amɛɖe ta Mawu xwe lɔ do enuɖe ji yí de va wa do ji go ɔ, yí d'e wa enu ɖe go. Vɔ nɔ amɛ. ɖe ta shika ci yí le mawuxwe lɔ do enuɖe ji ɔ, yi ɖo a wa doji. ¹⁷ Ŋɖɛmanyatɔ kodo ŋkuvitɔntɔntɔnɔwo gbali! Ci yi shika le Mawuxwe mɛ taɖo ɔ, é nyi Mawutɔ. Mawu xwe nɛ, shika nɛ, hin yi le veviɖe lewo mɛ sɔwu eɖitɔ? Shika alo Mawuxwe? ¹⁸ Mi gbe nu nɔ hɛnnɛ be: Nɔ amɛɖe ta avɔsakpe dó enuɖe ji yi d'é va wa do ji goɔ, yi de wa enuɖe go; vɔ nɔ amɛɖe ta enunana ci yi le avɔsakpe ji do enuɖe jiɔ, yí ɖo a wa do ji." ¹⁹ Ŋkuvitɔntɔntɔnɔwo gbali! Ci yí enunan le avɔsakpe ji taɖo ɔ, é nyi mawutɔ. Ci yi é le nɛnɛ ɖe hin yì le veviɖe sɔwu nɔviɛ ɔ? Enunana alo avɔsakpe? ²⁰ É yi na taɖo ɔ, nɔ amɛɖe ta avɔsakpe do enuɖe ji ɔ é ta avɔsakpe kodo enu ciwo pleŋ yí le ji. ²¹ Nɔ amɛɖe ta mawuxwe lɔ kodo mawu ci yí nɔnɔ mawuxwe lɔ mɛ. ²² Nɛnɛke nɔ amɛɖe ta jiŋkushi do enuɖe ji ŋ, é ta Mawu 'fiɔʒinkpin lɔ kodo mawu ci yi nɔnɔ efɔʒinkpin lɔ ji. ²³ Babɛɛ nɔ mi, esedɔwatɔ kodo Falisitɔ ayemɛnuwatɔwo! Minanɔ Madowo Mawu nɔ amahwɛnhwɛn anɛti kodo kumɛn ciwo yi mí do dó bomɛ yi va sɔ nɔ enu gankegan yi tanɔshi enujɔjɔwawa, xomɛvu wawa kodo enuwawa kodo xɔse ciwo yi le veviɖe sɔwu yí ese nu be wo le wa do akpa ɖeka. Onu vevi hɔnwo yi wo ɖo a wa doŋkɔ gbɔxwe yi a sɔ kpɛtɛwo bɔ do ́ wo nu nɛ. ²⁴ Amɛkplɔ ŋkuvitɔntɔntɔwo! Mí fiɔnnɔ aha kaka yí a ɖe amui tii le mɛ gankegan yi mimiɛ esɔkpotɔnɔ blebu! ²⁵ Babɛɛ nɔ mí, esedɔwatɔ kodo Falisitɔ ayemɛnuwatɔwo! mí klɔnɔ kpota nɔ kɔkpɔ kodo agan lɔwo xomɛ ɖɔ kodo enu ciwo yí mí fin sɔkpenɔ míwo 'nudroamu vɔinwo. ²⁶ Falisitɔ ŋkuvitɔtɔntɔnɔwo! Mí klɔ xomɛ nɔ kɔkpulɔ doŋkɔ gahɔnmɛ nɔ agogbe a mɛ nii hɛnnɛ. ²⁷ babɛ nɔ mí esedɔwatɔ kodo Falisitɔ ayemɛnuwatɔwo! Mí le shigbe yɔdu ciwo yí wo shi kalo eɣi nɔ yí blema nya kpɔkpɔ le agogbe gankegan yí amɛkuku 'xuwo kodo enubebe vovovowo ɖɔ xomɛ nii nɛnɛ. ²⁸ Le agogbe ɔ, nɛnɛke yí mí wawa enu shigbe amɛjɔjɔɛwo nɛnɛ do enu nɔ amɛwo; vɔ yi ayemɛnuwawa kodo enuvɔn ɖɔ mí nɛ. ²⁹ Babɛɛ nɔ mí, esedɔwatɔ kodo Falisitɔ ayemɛnuwatɔwo! Mí le ekpe mɛɛ do mawu 'ŋɛdotɔwo yɔ duwo ji yí le acan doɔ nɔ amɛjɔjɔɛwo yɔduwo ³⁰ yí nunuɔ be: "Nɔ mí li gacimɛ yí miwo tɔgbiwo wuwu mawu 'ŋɛdotɔwo ɔ, tɔwo ɔ, mì d'a bla ese kodo wo yí akɔ Mawu 'ŋɛdotɔwo 'hun do anyi go." ³¹ Nɛnɛ ɔ, mí ɖeɖeɛ kunu kpanŋkɔ mìwo nɔnɔwo be yrwo togbiwo yí wu Mawu 'ŋɛdotɔwo. ³² Ci yí é le nɛnɛ ɔ, mì yi enu ci yí míwo tɔgbiwo tɔ yí a ɖe egbɔ i! ³³ Edan kodo zakpata xo muwo! Bu mí bubuɔ be yewo a wɛ eɖe yi a shi nɔ enyɔzannɔamɛ le kojo mɛ ci yi dɔnnɔ amɛ yi ezomavɔ mɛ a? ³⁴ É yi na taɖo mí ɖo eto yi a se. na dɔ nyaŋ 'ŋɛdotɔwo, ŋɖɛ nyatowo kodo ese dɔwatɔ adoduiwo ɖaɖa mí. Mi a wu ɖekawo, a kan ɖekawo do acisoga ji. A xo ɖewo le míwo Mawu sɛnxuwo yí a ci yu mɛ nɔ wo sɔ to jugan, juganwo mɛ. ³⁵ Nɛnɛ ɔ, à nyi míwo yi a ɖu xomɛ vunɔ ciwo 'hun yí wo kɔdo anyi so amɛjɔjɔɛ Abɛliji kaka vasɔkɔdo Zakali, Balashi eviɛ ci yí wo wu le mawuxwe ko avɔsakpe glamɛ 'lɔzu. ³⁶ Le nyɔnɔnyui mɛ ɔ, ŋ nunuɔ nɔ mí be: egbɛviwo yi a ɖu amɛ ciwo yí wo wu hɔnwo 'lɔzu. ³⁷ Yesu nu nɔ Ʒeluzalɛmutɔwo be : "Ʒeluzalɛmutɔwo, Ʒeluzalɛmutɔwo, míwo ciwo yí wuwuɔ Mawu 'ŋɛdo tɔ wo yí xoxoɔ ekpe amɛ ciwo yí Mawu dɔ ɖaɖa mí kaka wo a ku! Ŋ ji zenɛniɖe be na bɔ mí do enyɛ ɖeki gbɔ shigbe lehanci yí kloklonɔ bɔ nɔ eviɛwo do yi 'wa gɔnmɛ do. Nɛnɛ gankegan yí mí gbe! ³⁸ Ecɛyɛ ɔ, mawu a tashi miwo mawu xwe ɖɛ yí a ci tootu. ³⁹ Ɖo ɔ, na nu nɔ mí be sɔso eviɛ kaka a sɔnanɔ gacimɛ yi wo a nube: "Shicu nɔ amɛ ci yi gbɔgbɔ le Mawu nyikɔmɛ!" ɔ, mí d'a gbe kpɔ ŋ go."