¹ Eviɛ ɔ, ŋ dodoɔ ŋsɛn lanmɛ nɔ amɛ ciwo yí nyí ehamɛmɛganwo le míwo domɛ. Enyɛ ɔ, ehamɛmɛgan yí ŋ nyi shigbe wowo han nɛnɛ yí kpɔ́ efun ciwo yí Kliso lɔ kpé tɔxu. Na vá kpɔ́ akpa ɖé a xɔ le Mawu klɛnklɛn gangan ci yí wo a vá ɖe dansin lɔ mɛ. Ŋ nunuɔ nɔ ehamɛmɛgan lɔwo bé :

² Mí le ebu nɔ amɛ ciwo yí Mawu sɔ́ doashi nɔ́ mí shigbe lehanci yí lɛngbɔ kplɔtɔwo lenɔ ebu nɔ lɛngbɔ ciwo yí wo sɔ́ doashi nɔ́ wo dó nɛnɛ. Mí le ebu nɔ wo shigbe lehanci yí Mawu dró dó nɛnɛ. Ŋgbé nyí ʒin wo ʒin mí ji taɖo go. Mí wɛɛ kodo ezosɔsɔ dó enu nú. Ŋgbé nyi eho do yí mí kplɔ go.

³ Mí ŋgbe sɔnɔ míwo 'cɛkpakpa ʒinnɔ amɛ ciwo yí wo sɔ́ doashi nɔ́ mí ji go. Vɔ ɔ, mí a nyí kpɔdonu nɔ́ wo.

⁴ Gahɔnmɛ, hwecinu yí lanku kplɔtɔwo 'gá a vá zé ɔ, mí a vá xɔ efiɔkuku ci yí klɛnnɔ lɔ, ci yí d'a vá gblé gbeɖe go lɔ. ⁵ Ɖajɛviwo, nɛnɛke yí míwo cán mí a bɔbɔ míwoɖekiwo nɔ́ ehamɛmɛganwo dó nɛ. Mí pleŋ ɔ, mí bɔbɔ míwoɖekiwo nɔ́ miwonɔnɔwo le enushanu ci yí mí a wa le míwoɖeɖewo mɛ mɛ. Ɖó wo ŋwle daɖɛ dó Mawu 'nyɔ wema ɖeka mɛ be : «Mawu trɔnɔ kpanŋkɔ egoyitɔwo vɔyí wanɔ xomɛvunu nɔ́ amɛɖekisɔhwetɔwo.»

⁶ Ci yí é le nɛnɛ ɔ, mí bɔbɔ míwoɖekiwo dó Mawu ŋsɛn 'lɔ lɔ gɔnmɛ nɔ́ á kɔ mí do eji dó hwecinu yí é ɖo daɖɛ mɛ.

⁷ Mí dro míwo tamɛbubu 'gbanwo pleŋ dó Mawu ji. Ɖó ɔ, é yí lenɔ ebu nɔ mí. ⁸ Ayexa le nɔ ete nɔ 'mi yí mí a le ezanŋte. Ɖo ɔ, Legba, míwo ketɔ trɔtrɔ do mí shigbe janŋtan ci yí le adan ji nɛnɛ. É jijiɛ amɛ ci yí á drɛnɖu.

⁹ Mí kpanŋkɔ Legba lɔ. Mí li eke le xɔse mɛ yí a nyá be míwo nɔvi klisotɔ ciwo yí le xexe lɔ pleŋ mɛ can le efun hɔn hanwo kpɛɛ. ¹⁰ Vɔ nɔ́ mí kpe efun sɔnanɔ hwenu kleŋ ɖé ɔ, Mawu ci gbɔ yí xomɛvu 'nuwo pleŋ sonɔ a trɔ́ a sɔ́ mí ɖo anyinɔnɔ. A ná yí mí a li eke goŋgoŋ yí a dó ŋsɛn mí nɔ́ enuɖe ŋgbe sɛn eŋ a sɔ́ mí xwin go. E yí yɔ́ mí nɔ́ mí a vá nɔ yi klɛnklɛn gangan mavɔ mɛ nɔ́ ci yí mí le Kliso mɛ taɖo.

¹¹ Yitɔ yí nyí ŋsɛn sɔyi tɛgbɛɛ ! Xoaɖyi. ¹² Mìwo nɔvi Silasi ɔ, ŋ kpɔɛni dó nyɔnɔnuitotɔ jí; eyɛ jí yí ŋ to yí ŋlwɛ wema hwɛhwɛ cɛ ɖaɖa mí. Ŋ wɛɛ yí a sɔ́ dó ŋsɛn lanmɛ nɔ mí yí a gbe sɔ ɖó ekpe i ji nɔ́ míbe Mawu xomɛvunɔ adodui lɔ dó yí mí kplɔ.

¹³ Mawu 'há ci yí le Babilɔnu yí Mawu cán hɛnnɛ shigbe míwo nɛnɛ dó egbe ɖaɖa mí.

¹⁴ Mí kpla ashi ekɔ nɔ miwonɔnɔwo yí a sɔ dó egbe nɔ nɔnɔ kodo lɔnlɔn le Mawu mɛ. Mawu lé ná fafa míwo pleŋ ciwo yí le Kliso mɛ !