Yecuwa Boduwok Nyägäk Nye Wällore Wïwung

¹ Wurïdena ïnaneng gäppak ga thïk thïꞌräng the Duko na Dokäꞌrïko de Dunzagok dobaꞌro, maung memema Yecuwa bännanang äna thïk thïthung thathok äna banyago änäthappu iththi theng onyagïno Dada, Ongokpeng bebe berïnyek wïwung wewe wega näthappu änzïk athwuk, Ongokpeng borïnyekeng ängäng dorïnya dïdung dädïyaꞌrok cïk ngorek ngorek. ² Wurïdena Yecuwa na wällore wïwung dogak orägo dure de thibing. Oꞌrïna thäjibäk thogak thonyagok ïga Yawüza ngega änzï Cäkärïyodï thäguräk thabaräk the Cämang, ongokpeng begak benareng äna bayirämigino Yecuwa thïk. ³ Yecuwa bännanang äna Dada bogak bïthedok daꞌrädang adwuk änzïk ïkung thïthung na ongokpeng bogak bathok änno Gänzï na banyago ogappïyïno Gänzï, ⁴ Ongokpeng bogüyogok änno dure de thibing a ongokpeng ogäro nadïya nïnung. Wurïdena ongokpeng bommok gadïya gakäkagägok ängäng ngïräk änno gatha a ongokpeng oppok no gatha gïgung. ⁵ Wurïdena ongokpeng bünode ngïräk ï gättaru agorethe änzïk oduweno wällore wïwung nyägäk na ongokpeng bokäkagode geng ngïräk ängäng gadïya gakäkagägok ängäng ngïräk änno gatha. ⁶ Wurïdena Ongokpeng bathïnok Cämang Bodäruc. Wurïdena Bodäruc bomodok äna,“Gäꞌrok Gänzï, Oungbeng baduwo nyägäk nyïnyïng aa?” ⁷ Yecuwa bobärïcek agomoyok äna,“Ngäye ngengenga Oïngbeng boga oyego ïnaneng oungbeng bodäma, oꞌrïna oungbeng bïyandänna irri reng gäceng.” ⁸ Bodäruc bomodok äna,“Oungbeng bädaduwenïng nyägäk nyïnyïng bäꞌrik!” Yecuwa bobärïcenoyok äna,“Naa Oïngbeng bädaduwok nyägäk nyïnyang, agoga äna oungbeng bädaga thäꞌrägik ängagïng.” ⁹ Cämang Bodäruc bomodok äna,“Gäꞌrok Gänzï, oungbeng bädaduwïng nyägäk nyïnyïng nyulluk, oꞌrïna nyägung nyïnyïng na gäꞌrok gïgïng gämme!” ¹⁰ Yecuwa bomodok äna,“Obadï bebe bebekok bonareng äna baduwegïno nyägäk nyïnyung nyulluk, oꞌrïna ongokpeng boduwïgok abwuk änzïk bäꞌrik ithecak, wurïdena onongdeng doduwïgok, oꞌrïna bädaga äna onongdeng adwuk.” ¹¹ Gaka Yecuwa bogak bännak obadï bebe bïya irämiginok a orapïppïyok dümi, oꞌrämïna Ongokpeng bomok äna,“Onongdeng adwuk dädaduwïgok.” ¹² Oꞌrämïna maung memema Yecuwa bogak boduwenokeng nyägäk nyïnyeng agogäro nadïya nïnung agonängk cïk näthappu gämme, Ongokpeng bomode geng äna,“Onongdeng dänna ngänïbeng bebeba Oïngbeng boyegïnonong aa? ¹³ Onongdeng dayïbïttïng äna bännïke na ‘Gäꞌrok Gänzï, na onongdeng doga ïꞌre ïrrïng, gaka Oïngbeng boga mik. ¹⁴ Wurïdena, naa Oïngbeng boga Gäꞌrok Gänzï na Bännïke beduwenonong nyägäk nyïnyong, agoga äna onongdeng daduwenïttïyo nyägäk nyïnyong bulluk bulluk. ¹⁵ Gaka oïngbeng bogenenong domïcïgo iddi deng äna onongdeng daduwenïttïyo nyägäk nyïnyong ngokäme bulluk bulluk. ¹⁶ Oïngbeng bamonong ithecak, ithecak äna, boyego bädaga bimmäng oko no thobong thïthung, däkäna bodinyagok boga bimmäng oko no bodinyagok bïbung bedinyodok. ¹⁷ Naa onongdeng dänna irri reng, agoga äna onongdeng donu dorïnyanang naa onongdeng doyego mik. ¹⁸ Oïngbeng bädaga ïꞌre nanagenong adwuk. Oïngbeng bänna wuräk wewewa Oïngbeng bodibok änzik, oꞌrïna irri reng roga mika a thadak the Gänzï änanna othodägagok äna,“Obadï bebe barägo dure thäꞌrägik ängagïng orämïceyok nyägung ï thaꞌrok bïyarämiginïng. ¹⁹ Oïngbeng bamonong irri reng ïnaneng äna gäppak ga irri reng rïꞌräng rädathok a onongdeng oroyik äna Oïngbeng Boga Ongokpeng. ²⁰ Oïngbeng bamonong ithecak, ithecak äna obadï bebe berabo buräk bebeba oïngbeng bodinyode, agoga äna ongokpeng boraboyïng gämme, na obadï bebe beraboyïng borabok buräk bebe bedinyodïng.” ²¹ Maung memema Yecuwa bomok rong irri reng, Ongokpeng bogak bogattok gättïng ängäng bärruk, Ongokpeng bogenek agomo äna,“Ithecak, Ithecak, Oïngbeng bamonong äna obärïk bulluk änanagenong bïya irämiginïng agorabpïppïng rümi” ²² Wurïdena wällore wurïgïttïyode Bulluk bulluk na ollïgok rong ängäng rerera Ongokpeng boga ïꞌre. ²³ Wurïdena bällore bulluk änno wällore wïwung, bebeba Yecuwa borïnyek gättïng bogak odimbagok Yecuwa ändothabik. ²⁴ Oꞌrämïna Bodäruc Cämang bunzagedok äna bathuwungok äna,“Ongokpeng bogak ïꞌrek nana obïthung beng.” ²⁵ Wurïdena Ongokpeng bebe bogak begak ithak ï guꞌru ge, ongokpeng bomodok äna,“Gäꞌrok Gänzï, ongokpeng obïthung beng?” ²⁶ Wurïdena Yecuwa boräbïcek äna,“Ongokpeng bebeba oïngbeng bïyamäthe dure a oïngbeng ïtheyok dotteng. Wurïdena maung memema Ongokpeng bomäthedok dagik a Ongokpeng ïthek Yawüza ngegak änzï Cäkärïyodï thäguräk thabaräk the Cämang. ²⁷ Wurïdena maung memema Yawüza bommok dagik thäjibäk thonyagok ïgagok. Wurïdena Yecuwa bomodok äna,“Ngäye ngengenga oungbeng boga oyego, yegu gäre gäre.” ²⁸ Oꞌrïna obärïk billak no borokk bebe bännak äna Ongokpeng bomodok irri reng mik onayïnï. ²⁹ Gaka obärïk ngeng dogak donak ïngäꞌre äna Yawüza bonak gembeng ge natteräk, Yecuwa bomodok äna,“Geyu waräbü wäre wewe wenarïgïno Duko na Dokäꞌrïko däkäna äna ongokpeng bayïthek wuräk willa waräbü. ³⁰ Oꞌrämïna maung memema ongokpeng bomäthek dure a ongokpeng ogädeyok nang onyago ga nängkora norok cïk. ³¹ Oꞌrämïna maung memema ongokpeng bonyagok däbäk, Yecuwa bomok äna,“Thäguräk Thabaräk The Buräk Bonyi thodengkïgagok na Gänzï godengkïgagok ïgagok. ³² Naa Gänzï godengkïgagok ïgagok, agoga äna Gänzï gïyadengkïyok ngokäme ängäng gatha gïgung na ogädeyonang odengkïyok gäre gäre. ³³ Nyäguräk nyïnyïng nyettetteng Oïngbeng bädïyaga änagenong thäki thäki. Onongdeng dïyagänzoyïng gayïka Oïngbeng bomode Yawüd äna,“Gayïk gegega Oïngbeng bïyanyago nang onondeng dädïyamüde athonang, oꞌrämïna Oïngbeng bamonong irri reng ïnaneng. ³⁴ Oïngbeng bayïthenong nädumïk nïyathe äna,“Rïnyïttïyunong bulluk bulluk gayïka Oïngbeng borïnyenong ngokäme, roga äna onongdeng dorïnyïttïyo bulluk bulluk. ³⁵ Ängäng irri reng arwuk änzïk onongdeng dïya ännago äna onongdeng doga wällore wïwïng, naa onongdeng dorïnyïttïyok bulluk bulluk.” ³⁶ Cämang Bodäruc bomodok äna,“Bännïke oungbeng banyago gïyethung? Yecuwa bobärïcenoyok äna,“Gayïk gegega oïngbeng onyago nang. Oungbeng bädïyamüde onyago nanag omakoyïng ïnaneng, oꞌrïna oungbeng bïyamakoyïng maung motteng.” ³⁷ Bodäruc bomodok äna,“Bännïke, oïngbeng bädamüde omakoyang onayïnï ïnaneng? Oïngbeng bokuthïttagode äna oïngbeng bayïnyïnang.” ³⁸ Yecuwa bobärïcenoyok äna,“Oungbeng bïyamüde äna oungbeng bayïnyïnïng aa? Oïngbeng bamoyang ithecak, ithecak, äna,“Dakodak dädïyagüro gäppak ga oungbeng bïꞌräng bädanyukok nanagïng amäddäk äna oungbeng bodämïng.”