¹ Igambo lye Mukama lilahika hali Yona rukandagolwe kabhili, alayomba, ² ''Punaho, uzye Ninawi, mulikaya elilya ikuru ne ulomele mpora ezyo nkukulagira.'' ³ Aho ne Yona alapuna alazya Ninawi mukukuzya igambo lye Mukama. Naye Ninawi lyali likaya ikuru muno, lwali rugendo lwe nsiku isatu. ⁴ Yona alatandika kwingira mukati ye likaya, hanuma ye rugendo ye rusiku, alahamuka ilaka alayomba, ''Hansiku makumi ane Ninawi ikuvula zibhwa.'' ⁵ Bhantu bhe Ninawi bhalamuzumya Mungu ne bhalakumusya kudira bhutamo bhinane bhalambara myenda zye magunira, kubhukila hamukuru kuhisya hamudo. ⁶ Simililene mpora zilamupandika Mwami we Ninawi. Alimilila nekunvwaho hite lyamwe lye Bhwami, alambura syambalwa syamwe, aliyambika magunila alikalisya mumavu. ⁷ Alapunhya mukukumusya ogwo gwekuyomba, ''Mulikaya lye Ninawi, alapunhya luhamo lwe bhukuru bhwe Mwami be bhakuru bhahe, mutakazumilizya muntu nolo ndimu, ngombe nolo idare, atakabhozya situ tye syosyona abhe bhatakalya nolo kunwa minzi. ⁸ Nahe bhantu ne ndimu bhabhe bhafundikilwe hamagunila ne bhalile hilaka ikuruu hali Mungu. Ne muntu iyo yo wona apiruke nekuleka nzila zyamwe mbi ne kupuna mubhubhi obhwo bhuli mumabhoko gamwe. ⁹ Nende ekumanhya? Mungu ekuduzya kusubyane kupilula miganiko gamwe ne kuleka bhusaye bhwamwe bhulambe oti tutiza kuvulala.'' ¹⁰ Mungu alabhona ago bhabhanga bhagabhezizye bhalazileka nzila zyabho mbi. Ahone Mungu alapilula miganiko gamwe habhusaye obhwo abhanga abhabhwilile oti enkabhagemere, nawe atalagema eyone.