¹ Urusiko urwonde Yeesu yeegheyaanga eng'ana iya Waryobha, aimeereeye ko-marambo ugwa nyansha iya Genesareti. Abhanto abhaaru bhakamusughutara baang'e bhamwinarre okore bhamwiteghere. ² Akamaha ko-marambo hayo amaato abhere abheene amaato bhaghatigire ho bharooghya emetegho ighyaabho. ³ Amaato ghano ghaare hayo ubhwonde nu-bhwa Simoni bhwaare, mbwo Yeesu yaariinire mo. Akamosabha abhununi ukurwa ko-morambo hayo abhwughutari hako gho mubhusibha. Yeesu akaghender ⁴ Hano yaamare ukweghya abhanto, akateebhya Simoni igha, "Uhire ubhwato bhuribha gate moteghe emetegho ighyenyu moghooti sinswe." ⁵ Simoni akamobonshora igha, "Omonene uweto, toteghire igho ubhutiko bhonswe igho, kora ti-tunyoore ekento he. Kasi ko bhoora nu-uwe oghambire, tigha mbe tuteghe. ⁶ Hano bhaakore kya bhoora yaabhateebheri, emetegho ghekaghootya sinswe sinsharu, kora emetegho ighyaabho ghekasimya okotandeka. ⁷ Ekaghira bhakobhekobhe bharikyabho bhano bhaare mu-bhwato ubhonde, bhaashe okobhatorya. Hano bhaishire bhakaishorya amaatoghonswe igho abhere sinswe korahake igho bhaare bhakwerere. ⁸ Hano Simoni yaaroshe amang'ana ghayo, akatema hanse ibhiru mbere iya Yeesu akamotebya igha, "Ee ore omonene otantigha ko okobha oni no-monto uwa ebhebhe nde." ⁹ Simoni yaaghambire amang'a ghayo kobhoora umwene hamwe na bharikyaye bhonswe igho mbaroghore, bhokong'u ku ubhwaru ubhwa sinswe seno bhaaghoteri. ¹⁰ Ighoigho Yakobo na Yohana bhano bhaare mu-bhwato ubhwonde, bhonswe ghayo ghakabharoghoorya. Bhayo mbhamwa abha Zebedayo bhaare, na mbhateghi abha obhomwe ubhwabho Simoni. Yeesu akatebhya Simoni igha, "Uwe otakoobhoha, waaghokooranga sinswe. Kasi ukurwa reero, na bhanto oraaghokoorenga." ¹¹ Hano bhaaghobheri amaato aghaabho ko-marambo, bhakaghatigha hayo na bhyonswe igho, bhakaghya ku-Yeesu. ¹² Urusiko urwonde hano Yeesu yaare mu-mughi ughwonde, yaishire omonto ono yaarenga aromaini obhoghenge omobhere ghonswe igho. Ni-gho yaaroshe Yeesu igho, akairekera bhoronge ubhwaye, akamosaasaama igha, "Ee ore omonene, uweeto, hano oraahanshe, oratora okansaabhwura ukughirwa ukwaane kono." ¹³ Yeesu akarembeka okobhoko akamukunia, akamoteebhya igha, "Nigho nkutuna. Igha osaabhuurwe." Hayo na hayo igho, omoghenge oora akahwena obhoghenge uhwaye. ¹⁴ "Yeesu akamokaania, akamoteebhya igha, "Otakaateebhya omonto wowonswe oora kya igho uhwenire okore kya bhoora amaragheryo agha Mosa ghakoragherya, Kaghi ko mosengeri okore amaahe igha mmaheene osaabhurwe, na uruusi ikimwenso ikya okosaabhuurwa ukwa abharooye abha obhogenge. Ikimwenso kiyo kebhe ekemanyero ko bhanto bhamanye igha uhwenire." ¹⁵ Nokanyora ni-igho yaare, kasi amang'ana agha Yeesu ghakaromaana bhokong'u. Mbaamwesheranga amakomo na amakomo akore bhaiteghere ameeghyo aghaaye, na ukubhwenibhwa amarooye aghaabho. ¹⁶ Kasi senkaagha isyende Yeesu yaabhatighanga hayo aghya okosaasaama Waryobha ahase hano omonto atare. ¹⁷ Urusiko urwonde Yeesu yeeghyanga abhanto. Bhaereho abhafarisayo hamwe na abheegya, abha amaragheryo bhaikaaye bharure mubhishishi bhonswe igho ibhya Galilaya, Yudea, na Mu mughi ughwa Yerusalemu. Yeesu yaare na singuru isya Omonene Waryobha isya ukwenia abhanto. ¹⁸ Ho abhanto abhande bhaishire bhaseng'esire omorooye ko keragho ono atakotora okogheroka. Bhakaseemya ukumuhira mu-nyumba bhoronge ubhwa Yeesu. ¹⁹ Kasi bhakakerwa kobhoora abhanto m-bhaaru bhaare ho, Ho bhoono mbe bhaamuriiniri ko-rosara, bhakahobhora riibhanga bhanyoore waawweya ughwa okohetya-ho omorooye na ekeragho ikyaye bhakamwikirya sinsiri bhoronge ubhwa Yeesu. ²⁰ Hano Yeesu yaroshe umukumo ughwa abhanto bhayo akateebhya omorooye oora igha, "Mosani, wabheeywe ebhebhe ibhyaaho." ²¹ Abheghya abha amaragheryo na abhafarisayo bhakaibhoorya igha, "Kana ono nawe akushabhura Waryobha? Ta aho omonto ono akotora ukwkahera abhanto ebhebhe he. Waryobha umwene akokora igho?" ²² Yeesu akang'ura keno bhaitegheranga ku bhuyo akabhabhoorya igha, "Nkwake mukwiteghera igho mo-metwe ighyenyu? ²³ Bhoono mbe bheenyu monteebhi neng'ana ke entobhu? Okoteebya omonto igha, wabheeywe ebhebhe ibhyaaho hande no komoteebhya igha, "Emoka oghende?' Ghonswe igho ghayo ke bhanto ke ghakotora okobha he. ²⁴ Kasi keno nkutuna momanye ni igha, omoona uwa omonto aana ubhwera ubhwa ukwabhera abhanto ebhebhe ibhyabho mu kyaro mono. Ni igho ndaakore, ho Yeesu akaisyorya omorooye oora akamoteebhya igha, "Emoka, oghende ekeragho ikyaho oghende yeeka.|" ²⁵ Omonto huyo ataatoranga ukwemera akaimera kamwe igho bhoronge mo bhanto hayo akaghegha ekeragho ikyaye keno yaarenga araareeye. Akaghya yeeka na eno asatoonia Waryobha. ²⁶ Abhanto bhonswe bhanu bhaare ho bhakaroghoora bhokong'u bhakatoonia Waryobha. Bhakaitakya bharaghamba igha, "Reero torooshe amakono bhamure!" ²⁷ Hano ghayo ghaahoye, Yeesu akarishoka ukurwa mu nyumba akamaaha omoghooti uwa righoti eno yabherekerwanga igha Rawi yaarenga aikaaye mu righutu iryaye ikya ukurusirya mo righoti. Akamotebya igha, "Nsho obhe umwegha uwaane." ²⁸ Raawi aeemoka akatiga bhyonswe igho, akamosoorana. ²⁹ Raawi kakora inyangi enene yeeka waaye, iya okosereenia Yeesu. Akaraareka abhaghoti abharighooti abhaaru na abhanto abhande bhonswe bhaaryanga nabho hamwe hayo ko meeza. ³⁰ Abhafarisayo na abheeghya abha amaragheryo bhakaibhembeerya ko bheegha abha Yeesu igha, "Nkwake mokosanga hamwe ibhyakorya na abhaghooti abha righooti na abhanyanku abhande?" ³¹ Yeesu akabhahonshora igha, "Abharooye mbo bhakughya ko moreri abharore, ta bhahoru he. ³² Kubhuyo oni te naasha okobherekera abhanto bhano bhkwimaaha igha mbhanto abha heene he. Kasi keno kyandeeta no kobherekera abha ebhebhe, okore bhahongore ebhebhe ibhyabho." ³³ Abhanto bhayo bhakabhoorya Yeesu igha, "Abheegha bha Yohana na abha Abhafarisayo bhare bharasaasaama Waryobha. Kasi abheegha abhaaho ndara bhote bhaakwisasa ronde he? No okorya ukwene bhaikareeye." ³⁴ Yeesu akabhahonshora igha, Iyake moraatore okokora abhaghendesya abha omoteti, bhaisase ibhyakorya, na bhaarenge hamwe na omoteti? ³⁵ Kasi enkaagha irihika hano omoteti ariruusibhwa ho sengaagha siyo nsyo bhoono bharisasanga okorya." ³⁶ Yeesu akabharengeerya ekerengyo ikyende igha, "Ta aho omonto ono akotandora eketati ku ghibho engotu. Hano araakore igho naraasari ingibho ehya eera na eketati ikya ingibho ehya eera, ti kituubhane na ingibho engotu he. ³⁷ Kora, abhanto te-bhakotoora idivai ehya mo-bhebhansha ebhekoro ibhya amaseero he. Na hano bharaakore igho ebheghansha nkobhaaroka bhere na idivai ereeteka. ³⁸ Idivai ehya ni igha etoorwe mo-bheghansha ebhehya. ³⁹ Omonto ono yaanara idivai enkoro ta-kutuna idivai ehya he. Ko obhoora nkoghamba, are igha, iya kare yo inshiiya."