¹ Buaz gum ruwa le bawaba ta medina fi mahal al nas bi limo fugu wa geni hinak. Be zama besit, zol al gerib al kan Buaz wonoso kalam tou de muroro min hinak. Buaz kelimo le huwo," Sabii, taal wa geni hini." Rajil de ja wa geni tihit. ² Buaz gum nadi ashara rujal ta medina al kubareen wa kelimo le humon, "Geni takum hini." Fa humon ja wa geni tihi. ³ Buaz kelimo le rajil al gerib le Elimalik,"Naumi, al rija min beled ta Muab, der bieo gita ard al le aku tanna Elimalik. ⁴ Ana fekir ashan bi wori le ita wa kelimo le ita, ' Bieo fi gidam ta del al bi geni hini de, wa fi hudor ta sheyok tai de.' Ka kan ita der ishteri ashan hafizo fi osra de, ishteri. Lakin kan ita ma der ishteri, wori le ana, ashan ana bi arofo, leano mafi zol bi akidr ashteri ele ita, wa ana be wara taki." Rajil de gum kelimo," Ana bi ishteri." ⁵ Buaz gom kelimo," Fi yom al ita bi bieo ard de min Naumi, ita lazim bi shelo Raus mara al Muab de, armala ta rajil de, ashan bi arofa isim ta morhum fi miras tou." ⁶ Biga rajil al gerib de kelimo," Ana ma bi ageder ishteri iyal tai ma bi ligo haja fugu. Ita kede shilo hak tai ta ishtero mahal de, leano ana ma bi agder ishteri." ⁷ Fi zaman daak, kan gi hasil fi Israel be khusos ta shira wa badilo hajat. Ashan bi asbito hag ta tani, zol bi shelo farda jezma tuo wa bi wodi le aku al dear ishtari de; de yao kan teriga ta hugog ta itifagiya fi Israel. ⁸ Fa rajil al gerib de kelimo le Buaz," Ishtari le nefsa taki," wa huwo gom agila farda jezma tou wa wodi le Buaz. ⁹ Buaz gom kelimo le sheyokh wa nas al gi geni," Itakum shuhodeen alela ana ishteri kulu haja ta Elimalik wa ta Kilion wa Mahlon min iden ta Naumi. ¹⁰ Raus kaman mara al min Muab, mara ta Mahlon, ana shelo ashan bi kon mara tai, ashan ana bi hafizo isim ta meit wa miras tou, ashan isim tou ma bi woduro min nos ta akwana tou wa min medina tou. Intum shuhud alela!" ¹¹ Nas al fi bawaba wa sheyokh humon kulu ka kelimo," Enna shuhud. Kede Yahuwa kutu mara al bi ja fi beat taki de ze Raheal wa Leya, al humon abino beat ta Israel; wa kede ita zido fi Afrata wa tala marof fi Beatlaha. ¹² Kede iyal al Yahuwa bi wodi le ita min mara de geni ze beat ta Faris, al Samar weledo le Yahuza, ¹³ Buaz zaojo Raus. Huwo geni ma heya, wa Yahuwa bariko heya, wa heya weledo weled. ¹⁴ Nuswan kan kelimo le Maumi," Isim ta Yahuwa kede bariko, huwo ma sibo ita alela bedon gerib ta osra, jena de. Kede isim tou kun marof fi Israel. ¹⁵ Kede huwo geni sabab ta tejdid haya wa huwo shelo mosuliya taki kan ita biga ajuz, ashan biniya taki.... al hibo ita, weledo weled. Heya bega ahse le ita min saba awlad." ¹⁶ Naumi shelo jena de wa arofa fi duss tou, wa aino wara tou. ¹⁷ Nuswan ta jeran wodi le huwo isim, gali," Weledo jena le Naumi." Humon kutu isim tou Obed. Huwo yao biga abu ta Jesi, al abu ta melik Daud. ¹⁸ De yao iya al weledo le Faris: Faris weledo Hesron, ¹⁹ Hesron weledo Ram, Ram weledo Aminadab, ²⁰ Aminadab weledo Nahshon, Nahshon weledo Salmon, ²¹ Salmon weledo Buaz, Buaz weledo Obed, ²² Obed weledo Jesi, Jesi weledo Daud.