¹ ''Emba, eve mkima mgumba, eve yule ukali ivyala, imba lwimbo lwa utogwa na lila kunguzu eve yule ukali upandike usungu wuita. Nguno vana vale vali mgate na vingi ikila vana va mkima yule watolwa, ''Akuyomba Yahwe. ² Ita ihema lyako live ikulu na sambazya emapazia hatali, yikavile hado golola engoye zyako na zitule visoga evigingi vyako. ³ Nguno isambaziwa mgate na mkono gwa mlyila na gwa mmoso na igongo lyako likukinda ensi na kuvapa evijiji evyo vilina upina. ⁴ Ukogohaga kunguno ukashe waibike, ninga ikaishwa, epema nguno ukashe upandikwe na ensoni; ukashe ulavile ensoni ya usumba wako wa iteketezya. ⁵ Nguno Mtundi ni mugosha wako; Yahwe wa emajeshi hilyene lina lyakwe. Mkonde wa Israeli umsava ni mpizwa wisu alewitanwa Seva wa ensi yonse. ⁶ Yahwe akukwitana eve suva kate mkima yule walelewe na yule wa mwego gwa upina, kate mkima mdo yule watolwa na ilelewa akuyomba Seva. ⁷ ''Kwi itungo ifupi namleka inyu, ila eve kukisa kihanya nkumkuminga inyu. ⁸ Mgate na etaabu ya kisira nakavisa ushu wane kwitungo. Ila eve kwilagano la emilele lya kwaminika nkuva na kisa ninyu- akuyomba Yahwe, yule wamukombola inyu. ⁹ Nguno ya genaga ni kate Nuhu kuwane: Kate evyo malapilizya manzi gamwa Nuhu gakashe gavite hangi mgate na ensi, hivyo nalapilizya kuva akashe pandikwe na kisira ninyu ninga kuvakemea inyu. ¹⁰ Ninga ngulu zikowolile igwa na tulugulu vikowolile itingishiwa ninga wuimara wa utogwe wane ukashe ugaluke kunyuma ifuma kwinyu, ninga ilagano lyane lya konse lakisa- atogunyika- akuyomba Yahwe, umsava himwene yule wakisa higulya yinyu. ¹¹ Vavovakuhangaika, valevakuvita moduki na vale vakavile na utogwe, lola, nkutula elami kurangi ensoga, na kutula umsingi gwa yakuti. ¹² Nkugweta umnara gwa hana na umlango gwakwe gwa almasi na magelele gakwe ga hibala ni gamawe masoga. ¹³ Na vana vako wonse valahembekwe na Yahwe; na konde ya vana vako yilave hanya. ¹⁴ Mgate ehaki nkukulamula hangi. Ukashe uone uduki hangi, nguno ukashe wogohe na kuduhu ekintu cha gogohya echo kilize mbihe yako. ¹⁵ Lola, mbiyili yonseyonse yule walogaga ematatizo, egisi fuma hawane; yonseyonse yule akuseleganwa ematatizo hakimo nawe alagwe kumkindo. ¹⁶ Lola, nmutundaga efundi, yule akupuga makala gakuvaka na lyandaa esilaha kate milimo yakwe, na mtundaga umvipya ili avipye. ¹⁷ Kuduhu esilaha yile yaveziwa hagate yako yafankiwa; na ulamlapilizya kila umwi yule alikutukila eve. Wenuwu hiwene isalo lya vatumami vamwa Yahwe, na umanyile walwe ifuma kwane- wenuwu huyombe umwa Yahwe.''