¹ Isekulu akamutambuila u Musa, wazeligitya, ² "Alagiilye i antu a Israeli akuletele i makuta lukulu nasunsuigwe kupumiila ni mizeituni iti atumike mu muli, iti kina i muli ihume kakila ikali nu kuleta u welu. ³ Kunzi ipazia nilikoli ntongeela isandiko nila ulamli mukati a kitala nika kutankanila, Haruni wikakilya i ikali a muli ntongeela ang'wi Isekulu, puma kidau dau ga ni mpindi. Ili likatula ilagiilyo nila ikali ku utuugwa wihi nua antu anyu. ⁴ Kuhani nu mukulu wikazipya i muli iikwe ikali ntongeela ang'wi Isekulu, muli nianso ni imoli mu kilingasiilyo nika zahabu nziza. ⁵ Mutakiwe kuhola u utu nu utindu nu kuasa ku mikate nanso ikumi na ibiili. Ingi kusinja itule ibiili ni ikumi nia efa a utu ku kila mukate. ⁶ Uugwa mikamikita migulya a meza a zahabu nziza ntongeela ang'wi Isekul ku nkiili abiili, mikate mutandatu ku kila lukiili. ⁷ Mikaika uvumba nuuza mpelo a kila lukiili nula mikate kutula isongelyo nila kukuiila. Uvumba uwu wikasonswa ku moto ku nsoko ang'wi Isekulu. ⁸ Kila luhiku nula wikali u kuhani nu mukulu kusinja wamikite ku ntendo yiyo i mikate ntongeela ang'wi Isekulu, itule kilingasiilyo ni lilago nila ikali. ⁹ Isongelyo ili likatula ku nsoko ang'wa Haruni ni ana akwe, hangi ingi kusinja alye kianza pa yelu, ku nsoko ingi ipatyo nila upumyi kung'wi Isekulu nazipigwe ku moto." ¹⁰ Itungili ai ipumie kina ng'wana nua musungu mu israeli, naiiza u tataakwe ai watulaa Mu Misri, ai ulongoe mukati a antu a Israeli. Uyu ng'wana nua musungu Muisraeli wilea nu mitunja Muisraeli mu nkango. ¹¹ Ng'wana nua musungu Muisraeli walisense i lina lang'wi Isekulu nu kumuzuma Itunda, ku lulo antu akamuleta kung'wa Musa. Lina lang'wa nyinya wakwe ai witangwaa Shelomithi, munanso wang'wa Dibri, kupuma ndugu ang'wa Dani. ¹² Akamuika mu kadulumu kupikiila Isekulu mukola nuikataantya ulowa wakwe kung'waao. ¹³ Uugwa Isekulu akamutambuila u Musa, ¹⁴ "Muhole kunzi a nkango uyu numuzumile Itunda. Awo ihi niamigulye ikaika mikono ao migulya itwe lakwe, hangi uugwa milundo wihi akumutulanga ku magwe. ¹⁵ Ingi kusinja uaganuile i antu a Israeli nu kuligiya, "Wihi nuimuzumaa Itunda wakwe utakiwe kukenka kinkwatya kakwe mukola. ¹⁶ Nuanso nukulisensa i lina lang'wi Isekulu ku kulu kuulu ingi kusinja wabulagwe. Kulu kuulu, milundo wihi likamukua magwe, ang'wi watule muziila ang'wi Muisraeli mukolihi mutuugwa. Anga itule wihi ukulisensa i lina lang'wi Isekulu, ingi kusinja wabulagwe. ¹⁷ Nuyu nuimubulaga u muntu muya ingi kusinja ku kulu kuulu wabulagwe. ¹⁸ Nuanso nuibulaga i kikali ni muya kusinja walipiile, upanga ku upanga. ¹⁹ Anga itule muntu ukumulemaalya u munyakisali wakwe, ingi kusinja watendeelwe uu uu naza umutendee u munyakisali wakwe; ²⁰ Ubuniki ku ubuniki, liho ku liho, lino ku lino. Anga ize usakilye luguma ku muntu, uu itakiwe kutendelwa ku ng'waakwe. ²¹ Wihi nuibulaga i kikali ingi kusinja walipiile, hangi wihi nuibulaga u muntu kusinja wabulagwe. ²² Ingi kusinja mutule ni ilagiilyo ling'wi ku antu ihi, muziila nu Muisraeli mukolihi mutuugwa, ku nsoko Unene nene Isekulu Itunda wanyu." ²³ Ku lulo u Musa akitambulya ni antu a Israeli, ni enso i antu akamuleta mitunja uyu kunzi a nkango, uyu naiiza ai watulaa wamuzumaa Isekulu. Akamukua ku magwe. Antu a Israeli akalituma ilagiilyo lang'wi isekulu nai ulipumilye kukiila Musa.