¹ Isekulu ai witambuuye nu Musa nu Haruni, wazeligitya, ² "Aile i antu a Israeli, hangi tambula kung'waao, 'matungo muntu wihi kisonono kimugazangilye u muili wakwe kikupumya upila, ukutula kibudu. ³ Ukibudu wakwe upumiie nu ulema nua kisonono. Itule muili wakwe ukupumya upila ang'wi waula, nuanso ingi ukibudu." ⁴ Ulili wihi nuilaila kikutula kibudu, hangikila i kintu naiza wikie migulya akwe kikutula kibudu. ⁵ Wihi nukukumpya u ulili wakwe kusinja wahombole i ang'wenda akwe nu koga mu mazi, hangi nuatule wikibudu kupikiila i mpindi. ⁶ Wihi nuikiie mu kintu kihi niiza u muntu niiza ulemaigwee ni kisonono ai wikie, muntu uyu kusinja wahombole ang'wenda akwe nu koga ku mazi, hangi ukutula kibudu kupikiila i mpindi. ⁷ Hangi wihi nukukumpya u muili nua muntu naza ulamaigwe ni kisonono kusinja wahombole ang'wenda akwe nu koga ku mazi, hangi watule kibudu kupikiila i mpindi. ⁸ Anga ize u muntu naiza ukihenga mazimazi anga yayo u muntu nua kituunga niiza weigwe, papo u muntu uyu kusinja wahombole i ang'wenda akwe hangi woge mu mazi, hangi ukutula kbudu kupikiila i mpindi. ⁹ Kipalatu kakwe naza ize kikete mazi mazi a kisonono ukulikaila likutula kibudu. ¹⁰ Wihi nuikumpya kintu kihi nai katula pihi a muntu uyu ukutula kibudu kupikiila i mpindi, hangi wihi nuikenkaa i intu izi kusinja wahombole i ang'wenda akwe nu koga ku mazi; ukutula kibudu kupikiila i mpindi. ¹¹ Nai iza ukete mazi mazi anga nanso anga wamukumpye ze wakili kandya koga ku mazi maziza mikono akwe, muntu nukumpigwe kusinja wahombole i ang'wenda akwe nukoga ku mazi, hangi ukutula kibudu kupikiila i mpindi. ¹² Shungu kihi ni kilongo niiza ukete mazi mazi anga nanso anga wakumpye kusinja kibulagwe, ni kiseme iko nika kikota kusinja kogigwe ni mazi melu. ¹³ Matungo nukete i kisonono nukeligwa ku kisono kakwe, papo kusinja waalye ku nsoko akwe mahiku mupungati ku nsoko a keligwa kung'waakwe, papo wahombole ang'wenda akwe nu koga muili wakwe mu mazi nakuhuma. Papo ukutula ng'welu. ¹⁴ Mu luhiku nula munana kusinja wahole i nkunda ibiili ang'wi nuni ibiili nia nkunda hagi waze ntongeela ang'wi Isekulu pa kingiilila mu kitala ni kianza; pang'wanso kusinja wapumye i nyunyi nianso kung'wa kuhani. ¹⁵ Kusinja u kuhani wapumye, ing'wi anga isongelyo nila milandu i nzuya anga nila kuzigilya, nu kuhani kusinja wazipye ulamuli ku nsoko akwe ntongeela ang'wi Isekulu ku nsoko a kisonono kakwe. ¹⁶ Anga ize u muntu upumilwe ni manala, papo kusinja kusinja woge muili wakwe ku mazi; ukutula kibudu kupikiila i mpindi. ¹⁷ Kila ng'wenda ang'wi ndili naiza migulya akwe ikoli i manala kusinja yogigwe ku mazi; ikutula kibudu kupikiila i mpindi. ¹⁸ Hangi anga ize musungu nu mitunja ikalala palung'wi hangi ikoli kupung'wa ni manala kulongola ku musungu, kusinja ihi abiili oge ku mazi; akutula kibudu kupikiila mpindi. ¹⁹ Musungu nukutula ukuli mu luhiku la ng'weli, ukulongoleka kutula kibudu ku mahiku mupungati, hangi wihi nukumukumpya ukutula kibudu kupikiila i mpindi. ²⁰ Kihi nuilala migulya akwe matungo a luhiku la ng'weli kikutula kibudu; kila kintu niiza wikaila kikutula kibudu. ²¹ Wihi nuikumpyaa u ulili wakwe kusinja wahombole i ang'wenda akwe nu koga ku mazi; muntu uyu ukutula kibudu kupikiila i mpindi. ²² Wihi niiza ukukumpya kihi naza wikaie kusinja wahombole ku mazi; muntu uyu ukutula kibudu kupikiila i mpindi. ²³ Itule migulya a ulili ang'wi kintu kihi migulya a pihi nuikikie, anga ize ukukumpya, muntu uyu ukutula kibudu kupikiila i mpindi. ²⁴ Anga ize mitunja wihi walale nu ng'wenso, nu ukibudu nua musungu umukumpye, ukutula kibudu mahiku mupungati. Kila ulili naza wilaila u mitunja uyu kikutula kibudu. ²⁵ Anga ize musungu upumilwe ni sakami ku mahiku mukwilo shanga itungo nila luhiku lakwe la ng'weli, ang'wi anga ipume ikilo itungo lakwe nila hedhi, itungo lihi nla mahiku na kutula kibudu, ukutula anga aza ukoli mu mahiku akwe a ng'weli. Nuanso ingi kibudu. ²⁶ Kila ulili nuilaila matungo ihi na kupung'wa ni sakami ikutula kung'waakwe iniganiie udu anga ulili nuilaila matungo a luhiku la ng'weli, hangi kila i kintu naza wikaila kikutula kibudu, anga ize udu u kibudu nua luhiku lakwe la ng'weli. ²⁷ Hangi wihi nukukumpya kintu kati a intu izi ukutula kibudu; kusinja wahombole ang'wenda akwe nu koga mukola ku mazi, hangi ukutula ukete kibudu kupikiila i mpindi. ²⁸ Ila anga ze musungu weligwa mu upung'wa ni sakami, papo ukualya ku nsoko akwe mahiku mupungati, niakila a izo ukutula muza. ²⁹ Ku luhiku nula munana ukuhola nkunda ku ng'waakwe ibiili ang'wi nkuni ibiili nia nkunda hangi ukileta kung'wa kuhani pa wingiililo nua kitala nika kianza. ³⁰ Kuhani uyu ukupumya i nyunyi ing'wi anga isongelyo nila milandu ni nzuya anga isongelyo nila kuzigilya, hangi ukuzipya ulamulwa ku nsoko ang'wa uyu ntongeela ang'wi Isekulu ku nsoko a ukibudu nua musungu nuipung'waa ni sakami. ³¹ Izi zizo kusinja uabagule i antu a Israeli ku ukibudu nuao, iti shanga ikusha kupumiila nu ukibudu nuao, kushapula i kitala, niiza nikie pakati ao. ³² Uwu wuwo ulingasi ku kila niiza ukete kisonono, ku nsoko kila mitunja niiza i manala akwe akupuma nu kumuzipya kutula kibudu. ³³ Ku nsoko a musungu niiza ukoli ku mahiku akwe a ng'weli, ku nsoko a wihi nukete i kisonono, watule mitunja ang'wi musungu, hangi ku nsoko a wihi nuilala nu musungu ni kibudu.