¹ Isekulu akitambulya nu Musa nu Haruni, akaligitya, ² "Ligityi ni antu a Israeli muaile, 'Izi zizo intu ni ikete u upanga naza muhumile kulya mukati aikali ni imoli migulya ihi. ³ Muhumile kulya kikali kihi ni kikete i mamogomogo nagalanukile ni hangi nikiheula. ⁴ Ga ni iti, ikoli ing'wi nia ikali niiza ang'wi shanga iheula ang'wi kigila i mamogomogo natemanukile, unyenye muleke kuilya nianso, ikali anga ngamia, ku nsoko nanso iheula ila ngila i mamogomogo nagalanukile. Ku lulo i ngamia ingi kibudu kung'waanyu. ⁵ Ga ni mpimbi ku nsoko nanso iheula ila ngila imogomogo niligalanukile nkua ibiili, ga ni nyenso kibudu ku ng'waanyu. ⁶ Ga nu munyangala; ku nsoko nuanso wiheula ila mugila i mamogomogo nagalanukile nkua ibiili, uyu nu ng'wenso ingi kibudu ku ng'waanyu. ⁷ Ga ni ngulima; anga itule nanso ikete mamogomogo nagalanukile ila shanga iheulaa, ku lulo nanso ingi kibudu ku ng'waanyu. ⁸ Muleke kulya kihi nika nyama niao. ang'wi musakumpye i miimba ao. Nianso ingi kibudu kung'waanyu. ⁹ Ni yenso ikali ni ikie mu mazi muhumile kuilya ingi izo yihi ni ikete i mapezi ni makulugamba, itule ni ikoli mu luzi ang'wi mu mongo. ¹⁰ Ila iintu yihi ni igila i mapezi ni makulugamba ni imoli mu luzi ang'wi mu mongo, palung'wi nizo ni ilongola mu mazi ni intu ni imoli mu mazi - yikatula igazo ku ng'waanyu. ¹¹ Ku nsoko yikayula igazo, musalye i nyama niao, ga ni miimba ao miko ikutula igazo. ¹² Kihi ni kigila i mapezi ang'wi makulugamba ni kimoli mu mazi ingi kusinja kitule igazo ku ng'waanyu. ¹³ Ni nyenso i nyunyi ni mukuibipilwa hangi ni shanga mutakiwe kuilya ingi sawa niatyatiie; mujulungu, kinkingoma, kinsenda, ¹⁴ kinsenda ni mukauuku, mpyani ihi na a kinsenda, ¹⁵ kila mpyani a nkungulu, ¹⁶ kiputa - nzila, kitandula nda, Tambi, ni mpyani yihi nia kisenda. ¹⁷ Ingi kusinja ga nu hinkini nu muniino nu hinkini nu mukulu muaone kutula igazo, munandi, ¹⁸ hinkini nu ng'welu nu mwari, ¹⁹ Kungumbuli ni mpyani yihi nia koikoi, huduhudi ga ni mintali. ²⁰ Maling'wana ihi nakete i manana ni igenda na migulu inne ku ng'waanyu ingi magazo. ²¹ Ila muhumile kulya maling'wana na kete i manana anne ni ikugenda ku migulu inne nakulumila mihi nakete i malindiko. ²² Hangi muhumile kulya mpyani yihi nia nkumbi, nsenene, gagaliguga, ang'wi ntitimo. ²³ Ila maling'wana ihi nilumaa nakete migulu inne ingi igazo ku ng'waanyu. ²⁴ Nu nyenye mikatula kibudu kupika mpindi kupumiila ni ikali izi anga itye mikakumpya i miimba aa. ²⁵ Hangi wihi nuikakuga king'wi na miimba ao ingi kusinja wahombole i ang'wenda akwe nu ng'wenso wikatula kibudu kupikiila i mpindi. ²⁶ Kikali kihi niiza kikete i mamogomogo nalekanukile naza ni shanga atemanukile lukulu ang'wi shanga iheula nikanso ingi kibudu ku ng'waanyu. Nuanso nuikumpya wikatula kibudu. ²⁷ Kikali kihi nikigenda ku ng'anza yakwe mu kati a ikali niilongola ku migulu ihi inne ingi kibudu ku ng'waanyu. Wihi nuikumpyaa u muimba anga nuanso ukutula kibudu kupikiila i mpindi. ²⁸ Hangi wihi nuiundula u muimba anga nuanso ingi kusinja wahombole i ang'wenda akwe nu kutula kibudu kupikiila i mpindi. Ikali izi yikatula kibudu ku ng'waanyu ²⁹ Kutulikana ni ikali niagulaa migulya a mahalu, izi zizo ni kibudu ku ng'waanyu; lonzi, mpuku, mpyani yihi nia akihuli nia akulu, ngulukili, ³⁰ nkenge, kihuli nia mu makiligo, nu ombu. ³¹ Ikali izi yihi naza yagula, izi zizo yikatula kibudu ku ng'waanyu. Wihi nuiikumpya ukutula kibudu kupikiila i mpindi. ³² Hangi aga itule ung'wi ao ukusha nu kugwila migulya a kiseme, kiseme nikanso kikutula kibudu, anga kitule kizipigwe ku mabada, ng'wenda, ndili, ang'wi igunila. Kitule kiseme ka mpyani kii hangi kitule utumilwi ki, ingi kusinja kukunimikwa mu mazi ni kenso kikutula kibudu kupikiila i mpindi. Uugwa kikatla kiza. ³³ Ku lulo kila ishungu niiza i kikali ni kikakibudu kikakigwila migulya akwe ang'wi mukatiakwe, kihi ni kimoli mu shungu nikanso kikatula kibudu, hangi ingi kusinja mikakibadula ishungu ni kanso. ³⁴ Ndya yihi naiza ingi nzelu hangi nikigombigwe kuligwa, ila kingiilwe ni mazi kupuma mu shungu ni kibudu nikigwie, ni kenso kikutula kibudu. ³⁵ Ni kintu kihi ni kihumile kung'wegwa kupuma mu shungu anga nikanso kikutula kibudu. Kila kintu ni kikagwilwa migula akwe nu utompo nua muimba a nyama nanso na kibudu kikutula kibudu, ang'wi litule liko ang'wi nyungu nia kulugila. Ingi kibudu hangi ingi ksinja kitule kibudu kung'waanyu. ³⁶ Ndiilyo ang'wi ilungu nia mazi a kung'wa nakilundiila ikusaga kutula yelu anga itule kintu ni ka kibudu anga ize kikagwila mumo. Ila anga itule wihi ukukumpya u muimba nua kikali nika kibudu ni kimoli mu mazi, nuanso ukutula kibudu. ³⁷ Anga itule utoompo nua muimba nika kikali nika kibudu kikugula i mbeu ihi ni ikoli ku nsoko a kutemela. Mbeu nianso yikatula ikili nziza. ³⁸ Ila anga ize i mazi akuikilwa migulya a mbeu, ni anga ize utoompo nua muimba ukugwila igulya akwe, ni nyenso yikatula kibudu kung'waanyu. ³⁹ Anga itule kikali kihi nikuhumile kuligwa kikusha, nu ng'wenso wihi nuika kikumpya ukutula kibudu kupikiila i mpindi. ⁴⁰ Hangi wihi nuilizaa kihi nika muimba nuanso ukusingigwa kuhombola i ang'wenda akwe nu n'wenso uktla kibudu kupikiila i mpindi. Hangiwihi nuiundula u muimba anga nuanso ukuhombola i ang'wenda akwe nu kutula kibudu kupika i mpindi. ⁴¹ Kila kikali ni kagulya mgulya ihalu kikatula igazo; shanga kikutula kakuligwa. ⁴² Kihi nikagulaa ku kikweha migulya a nda akwe, hangi kihi nikigenda ku migulu akwe ihi inne, ang'wi kihi ni kikete i migulu mukwilo - ikali yihi naza yagulaa migulya ihi, izi musailye, ku nsoko yikatula magazo. ⁴³ Muleke kiikilya ikibudu akola ku kintu kihi nikakibudu ki kagula; muleke kiikilya ikibudu akola ku nyenso, iti kina muleke kugazangigwa ni nyenso. ⁴⁴ Ku nsoko Unene ingi nene Isekulu Itunda wanyu. Unyenye kusinja mutue elu, Ku lulo ni mutule mielu, ku nsoko unene ingi ni ng'welu. Shanga imutakile kigazanja ku mpyani yihi ni ilongola migulya ihi. ⁴⁵ Ku nsoko Unene ingi Isekulu, nai umuletile u nyenye kupuma ku Misri, iti ntule ni Itunda wanyu. Ku lulo kusinja mutule mielu, ku nsoko Unene ingi ni ng'welu. ⁴⁶ Ili lilo ilagiilya kutula ikali, nyunyi, kila kintu ni kipanga ni kilongolaa mu mazi, hangi a kila kintu ni kagulaa migulya ihi, ⁴⁷ ku nsoko iko nikitakiwe kutemanulwa kati a niki kakibudu niko ni kelu, hangi kati a intu ni ikule nizo ni ipanga niiza uhumile kuligwa ni intu ni ikete u upanga nishanga ihumile kuligwa."