¹ Kitabu kia kala ngevaregha, Theofilo, geamba shose Yesu nyelelora iuta na ilosha, ² mpaka mfuru icho apeadija uye. Iki kivekeri baada ye funa amuri ida mumu Mwele ko valosha evekoje amevasabura. ³ Baada ya mateso vake, vaja veleonekana kwavo akeri arukie kavi na usipitisho shifoje sheshuda, ko mfuru makumi vaana nyelekulera kwavo, na nyelededa ihusu umagi oMakilunga. ⁴ Ihandu ekenarambatana kimu navo, nyelevavia valakure Yerusalemu, kake vevedeke ko kitevi kia ahadi ya Mndumi, nyeamba, mleichwa ifuma kokwa. ⁵ Kee Yohana mbatizaji ko muringa, kake mpebatizwa ko Mumu Mwele ko mfuru mfui.'' ⁶ Navekusangiria anduamu velembesera, ''Mndumi, ichwi nyicho mkondo upevanguria Israeli umangi?'' ⁷ Ichwa kavavia, ''Chikicha kwanu imanya kigeri ana kigeri kisa Mndumi akusudie ko mamlaka vake amonyi.'' ⁸ Kake mpewadija aru, ko Mumu o Mwele ihaduapecha uye yanu, na inyempeva mahuda vakwa kose ifumia Yerusalemu na Uyahudi yose na Samaria mpaka mwisho orika lose.'' ⁹ Mndumi Yesu amariaja ideda ishi, vakeri velambwa uye, icho yeleiruwa uye, na iridi jikamushikija valamone ko meso vavo. ¹⁰ KIngeri vakena lambwa ruveu ko loi akenadambuka, turukia, vandu vavi veleimukana gholosi yavo varerie nguvo siile. ¹¹ Vakaamba, ''Inywe vandu vya Galilaya, ngikimukenaimukana iha mkenalambwa ruveu?'' Ichwa Yesu eledoja uye rveu apeuya ko kiungi kudo kudo chakundu mlemwona edambuka ruveu. ¹² Nyiho vakauya Yerusalemu ifuma mlimenyi o mizeituni, icho ukeri kufui na Yerusalemu, mwendo o mfuri o Sabato. ¹³ Veshika veledambuka. Navo nyi Petro, Yohana, Yakobo, Andrea, Filipo, Thomaso, Batholomayo, Mathayo, Yakobo Mwana o Alfayo, Simoni Zelote na Yuda Mwana o Yakobo. ¹⁴ Vose velekungiriana cha mndu umu, ko ikunda vevekeri vakenatereva. Kimu na ivo vevekeri na vaka, Mariamu maye o Yesu, na vasacha vake. ¹⁵ Komekoja mfuru iya Petro nyelemukana ngholosi ya vanduave cha vandu 120, kaamba, ¹⁶ Mundondu kivekeri lazima kee shiregio shishike, andu kale Mumu Mwele nyeleamba ko ndumbu jaa Daudi ishikana na Yuda, icho elelora vaja velemweda Yesu. ¹⁷ Ko mekoja ikeri umu na ondu na nyeleadija ifungu jake jaa faida ko iki iruda.'' ¹⁸ (Lwaha mundu ichwi nyeleura andu ko kija elekiadija ko inyamari wake na iho nyelengwa esongora mudo, osese ukabarika na ndeu yake yose shikaaria shikabusuka. ¹⁹ Vose vekenadamia Yerusalemu veleichwa kee, isho andu ikio vakajidira ko kidedo kivo ''Akeldoma'' icho nyi ''Rera ya ndakame.'') ²⁰ ''Ko kitabu kia Zaburi kirengiwa, ''Vendeja kidedo kiake kive isamo na jilalekiwa nama umu aladamie aja;' na, 'Ilekia mundu ungi nairie mwanya wake o uongozi.' ²¹ Ikio nyi loi, ko ikiyo, umu o vomi andu vekenadambuka naize kingeri Mndumi Yesu elefma na ingia gholosi yedu, ²² Igakio aja ubatizo o Yohana ishikia mfuja eleria uje, kake nave shahidi o iruka kim na ise. ²³ ''Vakamudera o shangunyi vami vavi, Yusufu echidikirwa Barnaba, kavi eledikirura Yusto na Mathia. ²⁴ Ivo veletereva vakaamba, ''Igwe, Mndumi, uichi ngoo za vandu vose, ikio bwanga nyunga gholosi ya vavi iva usa umemusambura. ²⁵ Iria mwanya ko iruda na idumwa, andu Yuda elerunda unyamari na enda andu aja.'' ²⁶ Vakakava kura ko kitevi kivo, na kura ikaja Mathia icho eleitalwa kimu na vaja vadumwa ikumi na umu.