¹ Igheri Yesu akinamalie firero fyoshe fyo, akavavia valoshi vakwe, ² Muichi ku mifiri ivi ichie haghira ngadhu ya pasaka na mwanake wa Adamu afunya nedha avabwe. ³ Na varwe vaghetathisha na vaghothi na vandu vakadhangana handu hamwi hena kirombo kya mghetadha mrwe, achiilawa kayafa. ⁴ Vakalagha na fundu vamvwara Yesu naivwagha. ⁵ Kwaku valghambie kinachi rika kigheri kya ngadhu, kinedha hanacheghira fujo hena vandu." ⁶ Kigheri Yesu ake Bethania hena nyumba Simoni mkoma, ⁷ akiva akugholele medhenyi mka umwi alechie kwakwe akukie mkebe uleghire mafura ghamhako mrwe. nakaghamimia hana mrwe wakwe. ⁸ Mira valoshi vakwe vekina vone kwio, vakaichwa madinga naighamba, Haniki hadhara ii? ⁹ Igha ghagheirima ghakapwe kwa vunguri vurwe vanikwe vakiva. ¹⁰ Mira Yesu, akiva aichi ki, akavavia, Haniki mumwamdhumbua mka uu? Kwa andehira kindo kicha kwakwa. ¹¹ Vakiva muke navo mifiri yoshe mira mukaikaenanyi mifiri yoshe mwe. ¹² Kwaku vakinairikilie mafura hena mwiri wakwa, alehira hena mwiri wakwa, alehirire kwio kwa irikwa yakwa. ¹³ Kweri ninamuvia, hohoshe Injili ikyabirikirwa kunu idhangenyi yoshe, kindo akihirire mka uu, kangi kyava kikyarerwa naimkumbuka. ¹⁴ Niho umwi wavaya ikumi na vavi, ailewe Yuda Iskariote, vavi, aleghendie kwa varwe va mtadho. ¹⁵ naakamba, Mwanjinika iki nikimuroraa?Vampimia Yuda firumbue thelathini fya pedha. ¹⁶ Ivokea kigheri akashigha fundu amfunya. ¹⁷ Hata mfiri wa kuvoka mikate irakereghete, valoshi vakamwivaria Yesu na ighamba, Nikwi ku kwashigha fukuchembie uye kijo kya Pasaka?" ¹⁸ Akavavia, Ghendenyi mrinyi kwa mru mummbie, Mloshi akyaghamba, "Igheri yakwa like havwihi. Na kolosha Pasaka hamwi na valoshi vakwa hena nyumba yapho. ¹⁹ Valoshi vakahira fundu Yesu avavirie, na vachemba kijo kya Pasaka. ²⁰ Ikinafike kyavukwau, akei na valoshi vakwe ikumi na vavi vakia kijo. ²¹ Vakiva vakyaya kijo, akarera, "Kweri ninamuvia ku umwi wenyu anjirengeha. ²² Vakatekerwa mnu, na kila umwi akamvia, Yeto ninyi Mrumi?" ²³ Akaghamba, Akaghamba ivia akyatoveja kuvoko kwakwe na inyi bakulinyi niwe anjirengeha. ²⁴ Mwanake wa Adamu avuka fundu ataririwe. Mira vwathi vwakwe mndu wia amregheha mwanake wa Adamu! Nivekeba mndu dho aragheferiwe." ²⁵ Yuda ningewe mghemrengeha aleghambie, "Yeto , Ninyi Rabi? Yesu akamvia, ikundeghamba kindo kyo. ²⁶ Vakinave vakyaya kijo, Yesu akafunya mkate, akaubarikia, na iubandua. Avanika valoshi vakwe akaghamba, Ondoenyi muye. Iu ni mwiri wakwa. ²⁷ Akafunya kikombe akalomba, akavanika na ighamba Nywenyi voshe hena kikombeki. ²⁸ Kwaku ii ni damu ya ndaghamo yakwa, iyakutwa kwa vundu vwa vengi kwa ireghewa unya mari. ²⁹ Mira ninamuvia, thikanywe he ndunda ta mzabibu iu, mpaka mfiri wia nache nywamsha handu hamwi na imwe hena vurwe vwa Papa imwe hena vurwe vwa Papa wakwa." ³⁰ Vanamalie iimba nyimbo, vakafuma vakafuma vakaghenda Fumbunyi ya Mizeituni. ³¹ Kangi Yesu alevavirie, "kio ki imwe voshe, kwaku kiandikiwe, Na mkava mrisha na mvagonji ghatadharuka. ³² Mira nimfuma hena kipfwa kyakwa, namdhongolea ighenda Galilaya." ³³ Mira Petro alemvirie, Hata kole voshe vakulegha kwa findo kwaghefipata, inyi dhakulegha nyi. ³⁴ Yesu akamvia, Kweri ninakuvia, kio ki nguruvi iranauruka, kwa njikana kando kararu. ³⁵ Petro akamvia, "hata kole niiphwa na iwe thikakukanenyi "Na valoshi vengi vakaghamba kwiokwio. ³⁶ Kigheri kyo Yesu akaghenda navo handu achiilawa Gethsemane nalevavirie valoshi vakwe, "Ikaenyi ha kigheri mkighenda ifwo ighelomba. ³⁷ Akamuondoa Petro na vanake vavi va Zebedayo naakavoka ichuchundika na ileghela. ³⁸ Kangi alevavirie, Ngoo yakwa indechuka mnu kiathi kyephwa. Heikyo muikae midho hamwi na inyi. ³⁹ Akaghenda mothia kadu, akawa, nailomba. Akaghamba Papa wakwa kole kyava, kikombe ki kinjiire. Kinava fundu minashigha inyi, mira fundu kukwashigha iwe. ⁴⁰ Akavaivaria valoshi akavakolea vandolaa mario, waakamvia Petro, haniki murandeirima iikaa midho nainyi hata idhaa limwi? ⁴¹ Kaenyi midhomulombe kimedha munaingia hena mighesho. Ngoo ifurie mira , mwiri ushokere. ⁴² Akaghenda he kando kakavi ighelomba, akaghamba, Papa wakwa , kole kindo ki kyava injiire nyi ni midhari ni kinyughie kikombe ki, ifura yaphwo likoloke. ⁴³ Akavwia akavakolea valee mario kwaku midho ghavo ghavelemerie mario. ⁴⁴ Heikyo akavara he akaghenda fyakwe. Akalomba kararu akighamba firero fiafia. ⁴⁵ Akavuka akavaivaria valoshi vakwe na ivavia, Murelee du naikuhemesha? Lolienyi igherilike havwihi, mwanake wa Adamu arenge nwa mwavokonyi vavagheghira dhambi. ⁴⁶ Vukienyi, fughende, lolienyi, wia mghenjirengeha ake avwihi. ⁴⁷ Kigheri akirera, Yuda umwi wa vaya ikumi na vavi, akacha. Vandu vengi vakacha nawe valefumirie kwa varwe vaghetadha wa vaghothi vandu. Velechie na mapanga na marungu. ⁴⁸ Kangi mndu mghemrengeha Yesu alevanikie kigherero, akighamba. Idhona ghe mkomba, niwe. Mvwarenyi." ⁴⁹ kamtungo akacha kwa Yesu akarera, Akamwiirikira Mloshi! Naimkomba. ⁵⁰ Yesu akamvia, Mmbwee hira kyo kikuendie. Niho vakacha, imggholela mavoko Yesu, naimvwara. ⁵¹ Lolea mndu umwi aleke na Yesu, akaghola kuvoko kwakwe, akafunya ipanga yakwe, akamtema mhiri wa mghetadha , mrwe akamvegha kurwi kwakwe. ⁵² Niho Yesu akamvia, vwighira ipanga yapfwo handu kulifunyire , kwaku voshe vachitema vandu kwa ipanga navo varetemwa na ipanga. ⁵³ Munuwaririka dhairima imuilagha Papa wakwa anjirumie vathikari ikumi na vavi na malaika? ⁵⁴ Mira luvaha ni kwa njia chiki maandiko ghakoleka , nikwio kikyashighwa kifumie?" ⁵⁵ kigheri kyo Yesu akyavia mkutano Yeto mumwacha na mapanga na marungu ighenjivwara dhamgheiva na mghedhaka vandu? Kila mfiri nileke nyumba ya ruva nikilosha, munjivwere mwe! ⁵⁶ Mira ifi fifywairika nedha Niho valoshi vakwe vakamra nairicha. ⁵⁷ Vaya vandemvwara Yesu vakamtika kwa kayafa, mghetadha mrwe, handu vagheandika na vaghothi vavevunganyikie handu hamwi. ⁵⁸ Mira Petro akamuivaria nyuma kwa mpaka kwamghetadha mrwe. Akaingia voshi navagheria avone ngekyo kikyafumia. ⁵⁹ Mira varwe vaghetadha naibaradha yoshe vavikyashigha vushahidi vywa mongo kwa Yesu, kimedha vairime imvwagha. ⁶⁰ Mira ku hendefumia mashahidi vengi mira vavonire mburi yoyoshe vo. Mira kamtungo mashahidi vavi vakafuma mothia. ⁶¹ Na ighamba "Mru iu aleghambie, Nairima itenya nyumba ya Ruva niigha he kwa mifiri iraru." ⁶² Mghetadha mrwe akamka akamvia, "kukwairi ighaluta phoo? Iva vakyakushuhudia? ⁶³ Mira Yesu akatia chwi. Mghetadha mrwe akamviua, Fundu Ruva akeho ninakushurutisha ufuvie, na iwe ku kristo, mwanake wa Ruva. ⁶⁴ Yesu akamvia, "Iwe kweka kundeghamba kindo kijo. Mira nakuvia ivokea luvaha namothia kwamvona mwanake wa Adamu aikee kuvoko kwa kumrumi ughire Nguju, naakicha ipho wailwinyi ipho kaghu. ⁶⁵ Niho mghemtadha mrwe akabara dhori yakwe naighamba, Andeimbilia! Fufwashigha vushehidi vwa iki? Lolenyi ku mundeichwa akiimbilia. ⁶⁶ Ku mumwaririka iki? Vakaghaluta naighamba, "kikyashighwa aphwe" ⁶⁷ Kangi valempuchirie mara kyamunyi naimkava ngumi naimkava makofi kwa mavoko ghavo, ⁶⁸ naighamba, Fubunie, iwe kukristo, Niitho akuchapie?" ⁶⁹ Igheri yo Petro aveke bwang'a hena itanga, mhiri akamwiivaria naighamba, Iwe nawe kuleke na Yesu wa Galilaya. ⁷⁰ Mira akakanana mothia yavo voshe, akaghamba, Dhiichi kindo mumwakirera nyi. ⁷¹ Akinaghende bwang'a ya kyoti, mhiri ungi wa kika akamvona akavavia valekeho iho. Mndu nawe aleke handu hamwi nawe Yesu wa Nazareti." ⁷² Akakanana he, Inyi thichi mndu nyi. ⁷³ Igheri ivwihi, vaya vaghemki havwihi vamwiivarilie na ireva na Petro, kwa keni hata iwe, fani yafwo iya rora. ⁷⁴ Niho akavoka ira mumu na iapa, Inyi dhimwiichi mndu iu nyi nakaenda nguruvi ikauruka. ⁷⁵ Petro akakumbuka fundu Yesu alemwirie. ku nguruvi ira nauruka kwanjikanana kando kararu.