¹ Kwa ku vumangi vwa ipfo kaghu vufwenene na mweni mremi, avukirie akarero kimacha avone vahiri ndima hena mremi wakwe wa mizabibu. ² Akinairikiriane na vahiri ndima dinari imwi kwa mfiri, akavaruma hena mremi wakwe wa mizabibu. ³ Akaghenda he kamtungo ka mathaa araru na akavona vahiri ndima vengi vamki ufuva varaghire ndima yehira. ⁴ Akavavia, "Naimwe ghendenyi hena mremi wa mizabibu, na kyokyoshe kimuvaie namuliha". Henaikyo vakaghenda ighehira ndima. ⁵ Akaghenda he magheri gha mathaa mtandatu na he magheri gha saa ya kwenda, na akahira kwio kwio. ⁶ Kando kengi he igheri ya thaa ikumi na imwi, akaghenda na ivakolea vandu vengi vamki varaghire ndima yehira. Akavavia, Haniiki mumki ha muraghire ndima yehira mfiri mthima. ⁷ Vakamvia, kwa ku haghire mndu wowoshe andefumka ndima. Akavavia "Na imwe he ghendenyi hena mremi wa mizabibu. ⁸ Igheri ya kyavukwau likinafike, mweni mremi wa mixzabibu akamvia myapara wakwe, Vailaghe vahiri ndima na uvalihe mariho ghavo idunga na va msirikijo mpaka wa kuvoka." ⁹ Vakinache vaya valenikiwe ndima chaa ikumi na imwi, kila umwi wavo akalinwa dinari. ¹⁰ Vakinagheche vaya vahiri ndima va kuvoka, vakadunga ku hangi vo valihwa ikela, mira vakalihwa kila umwi dinari imwi. ¹¹ Vakinaghuhie mariho ghavo, vaka mnungumikia mweni mremi. ¹² Vakaghamba, 'vahiri ndima iva vethililia vo vandema kwa igheri ya thaa imwi du, mira kundevaananitha na ifwe, ifwe fududie mjigho mfiri mthima na iokewa ni mbari. ¹³ Mira mweni mremi akaghalua na irera na umwi wavo, Mbwie, thihiri muveirikiliene mwe na inyi kwa dinari imwi? ¹⁴ Ondoa kiya ngekyo kikuvaie na ughende kyapfo. Ni inuliwa yakwa ivanika vahirindima nivaondondorie thililionyi kiringanyo ikyo nikulihie iwe. ¹⁵ Kana kinjivaie kyo ihira kiya ninakishigha na mari yakwa? Kana ritho yapfo lindevona funu kwaku inyi ni mndu mcha? ¹⁶ Henaikyo wa mthililio ava wa kuvoka na wa kuvaka wa mthililio." ¹⁷ Yesu akikwea ighendaYerusalemu, Alevavondori valoshwa vakwe ikumi na vavi mbarinyi yakwe, na njienyi akavavia, ¹⁸ "Lambua fufwazengelela Yerusalemu, na Mwana wa Adamu aghevwarwa movokonyi gha varwe va makuhani na vandishi. Vamrumbulia kipfwa ¹⁹ na vamnikia kwa vandu va mathanga kimacha vamnangie, vamchape na imvamba. Mira mfiri wa kararu afufuka. ²⁰ Niho mama wa vana va Zebedayo akacha kwa Yesu na vana vakwe. Akainanuia ndi ifuma kwakwe. ²¹ Yesu akamvia, "Kukwashigha iki? Akamghalua "Amurisha ku vana vavi vakwa vaikae, umwi kuvoko kwapfo kwa kumndumi na umwi kuvoko kwapfo kwa kumtho hena vumangi vwapfo.' ²² Mira Yesu akaghalua na ighamba, "Kuichi kipfo ikyo kukwalomba. Kana kwairima ikinyughia kikombe ngekyo ninaghe kinyughia? vakambia. "Fwairima." ²³ Akavavia, Kikombe kyakwa keni mwakinyugia. Mira iikaa kuvoko kwakwa kwa kumndumi na wa kumtho thi iamoro yakwa imunikanyi mira ni kwa vaya vandemiandaliwa ni Papa wakwa." ²⁴ Valoshwa vaya vengi ikumi vekinaichwe kwio, vakashirwa mnu vundu vwa vandughu vaya vavi. ²⁵ Mira Yesu akavailagha vo voka na ivavia, muichi ku vaghererea mataifa vamutisha, na varwe vavo vatimitha nguju tavo kaghu yavo. ²⁶ Mira inava kwio kwenyu. Kibanga kyakwe, wowoshe ashigha iva mrwe maghari yenyu ni ni thari ave mndima wenyu. ²⁷ Na agheva wa kuvoka maghari yenyu ni thari ave mndima wenyu. ²⁸ Tha fundu Mwana wa Adamu arachie ihiririrwa, mira ihirira , na ifunya moo wakwe uve ikia ya vengi." ²⁹ Igheri vakyafuma Yeriko, luvungano lirwe lukamwivaria. ³⁰ Na vakavona vandu vavi vapfwie mitho vaikee mbarinyi ya barabara. Vakakwera kaghu mairwi ghavo na irera, "Mndumi mwana wa Daudi, ufuvonie mbonea." ³¹ Mira luvungano lukavabohija, na ivavia titenyi. Hatakwio vo vakaongera ikwera irwi yavo na kaghu na ighamba "Mndumi, mwana wa Daudi, ufuvonie mbonea." ³² Niho Yesu aka mka na akavailagha na ivavetha, "Mumwashigha ni muhirire iki." ³³ Vakambia, "Mndumi ku mitho gheru gharughuke." ³⁴ Niho Yesu akiva ku andevajichwa mbonea, akabalia mitho ghavo, vakaghughia ivona na vaka mwiivaria.