¹ Paulo na Timotheo, abhakori abhemirimu abha Kristu Yesu, kubhanu bhaarigwa ku Kristu bhanu bhareekara Filipi, hamwi na abhemiriri na omukori wa emirimu gya mwisyengereero. ² Enoonkwe ebhe ebhe kubheenyu na eimani inu erarwa ku Waryubha tata wetu na omukuru weetu Yesu Kristu. ³ Ndamukumya Waryubha waani keego ndabhahituka bheenyu bhoonseego. ⁴ Mara kaaru kukusabha kwaani kubheenyu bhonseego, ndajomerwanga hanu ndabhasabhira. ⁵ Niina omukumo omwaaru kubhwi kirirya bhweenyu kwi ering'ana eriijomu kurwa orusiiku orwa obhambhiro na bhoono ego. ⁶ Niina obuheene ega unu yakangata emirimu emijomu gati yeenyu arigendererya okuihikya kunsiku gya omukuru Yesu Kristo. ⁷ Mmbwaheene kuoni okwiyigwa eguru yeengu bheenyu bhonseego kwa okubha nabhatuuru mmutima gwaani. Kwa okubha bheenyu mubheeri hamwi kwiruguto kukubhohwa kwaani na kubhwangiri na obhuheene bhwaani ku ering'ana erijomu. ⁸ Waryubha mwimiriri waani, kyeego niina enamba eguru ya bheenyu bhonsego munsi owa obhuhanje bhwamunsi obhwa omukuru Yesu. ⁹ Ndasabha ega: Ubhuhanje bhwenyu bhwiyongerye kweeki na kweeki kubhung'eni na obhumanyi bhonseego. ¹⁰ Ndasabha kuhitira kurinu nho mubhe na obhuturo obhwa okureenga na okusora amang'ana ganu gari bhwaheene bhukong'u. Kweeki ndabhasabhira nho mubhe bharabhu mutabha na obhubhibhi bhonse bhonse kurusiku orwa Kristu. ¹¹ Nawe nho mwijuribhwe emisuumo gya obhuheene rinu riratuuka ku Yesu omukuru, kwa obhukuru na omukuru gwa Waryubha. ¹² Nkyo kya akora ekibhohe kyaani ku omukuru, ¹³ kyaa manyikana ku abharundi abhahansi ahabhariito honseego na kumuntu wowonse. ¹⁴ Na abhahii bhaaru ku omukuru, kwa ekibhohe kyaani, bheekiriirye na okusarya okugamba eng'ana naawe otobhoha. ¹⁵ Gati kwa obhuheene bharamurariika Kristu kwa obhubhi na obhurwani, na abhandi kwa obhujomu. ¹⁶ Bhanu bharamuraarika Kristu kwa obhuhanje bhamanyiriiga naatuurwaho kwa obhwangiri obhwa eriing'ana eriijomu. ¹⁷ Nawe abhandi bharamuraarika Kristu kwa okwiyahura na kwa obhubhibhi. Bharamanya ega bharakora enyaanko kuoni kumunyororo gyaani. ¹⁸ Kweego? ntakwigwa, nawe enjira erabhe okwa obhubhibhi kasi kwa obhuheene, Kristu arararikwa, kuriinu ndajomererwa! niigo, ndijomererwa. ¹⁹ Kwa okubha mmanyiri ega riinu rirareeta okusikurirwa kwaani. ²⁰ Kuring'ana kweego ndeenda ubhuheene nuga, ntarirora eginsoni. Nawe kwa obhuhaari bhonseego, kyeego eginsiku gyonseengo na bhoono ego, ndaganyinira ega Kristu arii nurwa kuhitira omubhiri gwaani, orabhe kubhuhoru kasi kuruuku. ²¹ Kwa okubha kuoni, kubhaho nku Yesu okukwa mbwahene. ²² Nawe okumenya kwa omubhiri okwi bhura omusuumo ku mirimu gyaani, kwa ego ntamanyiri ndiiha erya okusoora. ²³ Nawe ndasukumwa bhukong'u, na amang'ana agabhiri. Niina enaamba eya okutiga omubhiri na okubha amwi na Kristu, ekintu kinu kiina obheera bhukong'u. ²⁴ Nyoora, okusaaga kumubhiri gunu ni eriing'ana ejomu bhukongu kwa okubhakoreera bheenyu. ²⁵ Kwa okubha niina obhuheene eguru yaarinu, mmanyiri ndisaaga na okugendererya okubha hamwi na bheenyu bhonseego, kwa amagendereryo obhujomerwa obhwa eimaani yeenyu. ²⁶ Na inu eribhareetera okujomerwa kweenyu bhukong'u ku Kristu Yesu, kwa oni okubhaho kweeki hamwi na bheenyu. ²⁷ Mureenderwa okwikara enginsiku gyo nseego kunteemo enjomu inu ereendana na amang'ana amajomu ga Kristu. Mukore ego hanu ndiija okubhamaha kasi anu ntaaje, niigwe ega mwimiriri bhwiima kwa omutima gumwi. Niina enaamba eya okwiigwa ega muuna omutima gumwi, murarwanira eimani eya eriing'ana eriijomu hamwi ego. ²⁸ Mutakobhohibhwa na ekintu kyonse kyonse kinu kirakorwa na abhasigu bheenyu inu kubheeki nkwiyoorokya kwa obhusarya. Nawe kubheenyu nkwiyoorokya kwa obhutuurya ku Waryubha. ²⁹ Kwa okubha bheenyu mwahanwa kwa okuhiitira ku Kristu, kutari okumwikirirya okweene, na okunyankibhwa hamwi naawe. ³⁰ Kwa okubha muuna obhuruutani bhurya bhurya kyeego mwabhurora kuoni na mureegwa ega nkya ruutana na bhoono.