¹ Enyangi ya emikaate ginu gitakutuurwa mo ekimera yaaringa ehikiri hang'i. Enyangi iyo yaabhirikirwanga epasaka. ² Abhakuru bha abhasyengeri hamwi na abheehigigirya bha amaragiriryo ga Waryubha, bhaaringa bharatuna omweya gwa okwita Yesu. Nawe, bhoobho hanga abhantu bhataja okukora eriihe. ³ Mbe, erisambwa rikamusoherera Yuda Iskariote, unu yaaringa oumwi wa abheehigira bha Yesu ekumi na bhabhiri. ⁴ Nho, Yuda akagya ku abhakuru bha abhasyengeri na abhakuru bha abharindi bha murisyengerero erikuru rya Waryubha. Hanu yaahika, akeekiriranya nabho kya ego yakakonere Yesu eniku ku bheeki. ⁵ Bhakajomerwa bhukong'u, bhakeekirira nya okumuhaana egimbirya. ⁶ Yuda akeekirirya, akaamba okutuna omweya gwa okumukorera Yesu eniku, eribhaga rinu abhantu abhaaru bhatariho. ⁷ Orusiku rwa enyangi ya emikate ginu gitakutuurwa mo ekimera rukahika. Ruyo ndo rwaaringa orusiku rwa okugooga ering'ondi rya ekimweso kya epasaka. ⁸ Yesu akatuma Petro hamwi na Yohana, akabhakeerya ega, "Mugende mutuseemerye ebhyakurya bhya enyangi ya epasaka, naho twuje turye hamwi." ⁹ Bhakamubhuurya ega, "Oreenda tusemeerye ha?" ¹⁰ Akabhakyukya ega, "Hanu mura asohe mumugi gwa Yerusalemu, muraasika ne na omusaaja umwi agegeri ensengo ya amanji, mumuseete mpaka munyumba inu araasohe. ¹¹ Mubhuure omwene onyumba iyo ega, 'Omwihigirya arabhuurya ega, "Kiringi ha ekinyumba kya abhageni kinu ndeenda okurira mo ebhyakurya bhya epasaka hamwi na abheehigira bhaani?" ¹² Wonse araabhorokye ekinyumba ekinene munyumba ginu gikarireeni, muraanyoore mokira ekintu. Museemerye muyo." ¹³ Mbe, abheehigira bhayo, bhakagya, bhakanyoora gonsego kya ego Yesu abhakeererye. Bhakasemya ebhyakurya bhya epasaka. ¹⁴ Eribhaga rya okurya hanu ryaahika, Yesu akeekara okurya ebhyakurya hamwi na abhatumwa bhaaye. ¹⁵ Akabhakeerya ega, "Naaringa nhanjiri bhukong'u okurya ebhyakurya bhya epasaka hamwi na bheenyu, nkyari okunyankibhwa! ¹⁶ Bhoono, ndabhakeerya ega, ntakyaarya kweki ebhyakurya bhya epasaka mpaka ensonga ya epasaka hanu orinyo ora ebheeri mubhukama bhwa Waryubha." ¹⁷ Akagega ekikombe kya edivai, akamukumya Waryubha, akamara akabhakeerya ega, "Mugege, muguse bhonsego." ¹⁸ Ndabhakeerya ega, ndaamare okurya hanu, ntakyaanywa kweki edivai, mpaka obhukama bhwa Waryubha hanu bhuriija." ¹⁹ Akamara akagega omukaate, akamukumya Waryubha, akagusunura, akabhahana abhatumwa bhaaye, akabhakeerya ega, ('Gunu ngo omubhiri gwani guni gwakamwenswe ku orusumo rwenyu. Mukorenga ega, kwa okunhiituka oni!" ²⁰ Ego ego hanu bhaamara okurya ebhyakurya, akagega ekikombe. akagamba ega, "Edivai inu mukikombe ereemiririra emuma enhya inu Waryubha yakarye, kwa amanyinga gaani. Amanyinga ganu gakeetike ku orusumo rwenyu.) ²¹ "Nawe mumanye ega, unu yakankorere eniku, nikeeri nawe hamwi kumeja. ²² Oni, Omwana wa Adamu, nda gya okwitwa kya ego bhurya yaaringa eseemiibhwe. Nawe, arikirora ko omuntu unu yankankorere eniku!" ²³ Mbe, abhatumwa bhaaye bhakaamba okubhuuran'ya ega, niwi gati yaabho yakakore ering'ana riyo. ²⁴ Gikabha ho eging'aka gati ya abhantu mwa bha Yesu, ega, niwi gati yaabho ng'o areetegererwa okubha omukuru okukira abharikyaye. ²⁵ Eging'aka giyo, gikakora Yesu abha keerye ega, "Abhakama bha ebhyaro, bharabhandirirya abhantu bhaabho, enu bhareekumya ega, mubhaseren'ya. ²⁶ Nawe bheenyu mutige okubha ego. Gati yeenyu omukuru okukira abhandi, ng'o abhe omuke kubhonsego. Na kya ego aratunga, abhe muna ng'o mukori wa emirimu. ²⁷ Mbe! Niwi omukuru? unu areekara kumeja okurya ebhyakurya, kasi unu arareeta ebhyakurya? Ndamanya ng'o unu areekara okurya ebhyakurya. Nawe oni ndingi gati weenyu hanu kya omukori weenyu wa emirimu. ²⁸ "Bheenyu mbo mwaasaaga hamwi na oni munyanko yaani. ²⁹ Kya ego bhurya Tata yaangabhya obhukama, oni nonse ndabhagabhya obhukama. ³⁰ Murirya na okunywa kunyangi ya obhukama bhwani, na okwikara mubhitumbi bhya obhutungi, enu murajibhya amakabhira ekumi na gabhiri ga Israeli." ³¹ Yesu akagamba ega, "Simoni, itegerera! omanye ega, erisambwa ryeendanga okubhaahura kya omuntu unu areerura obhuro. ³² Nawe nkusabhiiri ku Waryubha, naho emimani yaaho etasuuha. Na hanu orinhindira, oteremye abhari kyaho." ³³ Simoni akamukyukya ega, "Omukuru wetu, hanu oranyoora ndingi hamwi na uuwe, ndatura okugya okubhohwa murigereja, kora okukwa hamwi na uuwe!" ³⁴ Yesu akakyukya ega, "Uuwe Simoni Petro! Ndakukeery ega, ensarigoko etakaragure reero, okyari okunyanga mara kasatu ega, otamanyiri." ³⁵ Yesu akabhuurya abheehigira bhaaye ega, "Hanu naabhatuma bira ensaho ya egimbirya kora ensakwa, na bhira eginkeeto, mwaasuuhirwa ekintu kiyo kyonsego?" Bhakakyukya ega, "Tutaasuuhirwa" ³⁶ Akabhakeerya ega, "Nawe okwambira bhoono,omuntu unu yaana ensaho ya egimbirya kasi ensakwa, abhigege. Na unu ataana empanga, agurye ekabhuti yaaye, agure empanga. ³⁷ Kwa okubha yaang'orwa ega, "Yaabharwa hamwi na bha obhusarya! Amang'ana ganu gaang'orwa eguru yaani. Ndabhakeerya ega, ereenderwa nkorerwe. ³⁸ Bhonse bhakamukeerya ega, "Omukuru wetu, rora! Hanu giriho egimpanga ebhiri." Wonse akabhakyukya ega, "Tutige gayo!" ³⁹ Nho, Yesu akarwa hayo, akagya munkuku ya emijeituni, kya ego yaaringa anariri. Abheehigira bhaaye bhakamuseeta. ⁴⁰ Hanu yaahika munkuku, akabhakeerya ega, "Musabhe Waryubha, naho mutaja okusoha mu masakyo." ⁴¹ Omwene akeeyahura hayo, akasuntara embere hake. Akeegama hansi, akasabha Waryubha ega, ⁴² "Tata! Nyoore oreenda, undusye mu nyanko ginu. Nawe, tiego ndeenda oni, naho ameega gaaho gakoreke!" ⁴³ (Rumwi ego, malaika okurwa murwire akamujira, akamwijurya eginguru. ⁴⁴ Wonse kwa bhurya yaaringa na obhururu bhwaaru, akakajana okusabha Waryubha. Ebhigeri bhyaye bhikabha bhiratonya hansi kya amatonyekera ga amanyinga) ⁴⁵ Hanu yaamara okusabha Waryubha, akeemirira, akabhahindira bhaye, akanyoora bheehiriibhwe, kwa okubha bhaaringa bhasurumberi. ⁴⁶ Akabhabhuurya ega, "Ndegwa mureeri? mubhuuke! musabhe Waryubha, mutaja okusoha mumasakyo." ⁴⁷ Mmbe, hanu yaaringa akayagamba gayo, akajirwa na abhantu abhaaru. Na urya yaabhirikirwanga Yuda, oumwi wa abheehigira bhaaye ekumi na bhabhiri, yaaringa embere ya abhantu bhayo. Yuda akamusuntarira, akamu humbata. ⁴⁸ Yesu akamubhuurya ega, "Uuwe Yuda! oramukorera eniku omwana wa Adamu kwa okumuhumbata!" ⁴⁹ Abheehigira bhaaye, hanu bhaarora ganu garaakoreke, bhakamubhuurya ega, "Omukuru wetu, tubhageeje na egimpanga?" ⁵⁰ Rumwi ego, oumwi waabho akamutema omukori wa emirimu wa omukuru wa abhasyengeri, akamung'asura okutwi kwa obhuryo. ⁵¹ Yesu akagamba ega, "Mutige! Ering'ana rinu rireesa!" Akakun'ya okutwi kwa omuntu uyo, akamuhwen'ya. ⁵² Gati ya bhanu bhaaja okumugwata, bhaaringa mo abhakuru bha abhasyengeri, na abharindi abhakuru bha erisyengerero erikuru rya Waryubha, hamwi na abhakuru bha Abhayahudi. Yesu akabhakeerya ega, "Bheenyu! Kwaki munseeteri na egimpanga na egindungu, muna mwoherye omwibhi? ⁵³ Ndegwa eginsiku gyonsego twaago soryanga hamwi murisyengerero erikuru rya Waryubha, mutaankun'ya. "Nawe bhoono, eribhaga ryenyu rya obhutungi bhwa abhasarya, ndyo rinu." ⁵⁴ Rumwi ego, abhaantu bhayo bhakamu hurumukira, bhakamugwata, bhakamuhira mpaka iika owa omukuru wa abhasyengeri. Petro akabharwa enyuma kwa hare. ⁵⁵ Hanu bhahika kubhoori bhwa enyumba, bhakaamba okukooma ekyoto, bhakeekara hamwi. Petro wonse, akeekara hamwi nabho. ⁵⁶ Omuhara umwi, omukori wa emirimu, akamurora yeekeri kubhurabhu bhwa omururo, akamwikomya, akagamba ega, "Omuntu unu, yaaringa hamwi nawe!" ⁵⁷ Nawe Petro akanga, "Uuwe omukari, oni ntamumanyiri!" ⁵⁸ Hake ego, omuntu oundi akamurora Petro, akamubhurya ega, "Uuwe wonse ng'o umwi waabho!" Nawe Petro akakyukya ega, "Mura uuwe! Ntaringi oni!" ⁵⁹ Eribhaga rikahika muna ensa imwi, omuntu ouundi akaomererya ega, "Mumaheene, omuntu unu yaaringa hamwi nawe, kwa okubha wonse mumugalilaya!" ⁶⁰ Nawe Petro akakyukya ega, "Mura uuwe! Gayo oragamba, oni ntagamanyiri!" Atarahikya omunwa guyo ego, ensarigoko ekaragura. ⁶¹ Omukuru Yesu akamwikyukirya, akamumaahirira Petro mumeeso. Rumwi ego, Petro akahiituka amang'ana ganu omukuru Yesu yaaringa amariri okumukeerya ega, "Ensarigoko etakaragure reero, okyari okunyanga mara kasatu ega, otamanyiri." ⁶² Kimwi, Petro akahuruka kibhara, akakuura bhukong'u ⁶³ Abhasaaja bhanu bhaaringa bharamwangarira Yesu, bhakabha bharamuja bhura na okumutema. ⁶⁴ Bhakamuribha ameso enu bhara mukeerya, "Nyoore uuwe mumurooti rengererya ega, "Niwi akutemeri?" ⁶⁵ Bhakagendererya okumtuka amatuki amaaru. ⁶⁶ Hanu bhwaakya, ekiikaro kya abha kuru bha Abhayahudi, hamwi na abhakuru bha abhasyengeri na abheehigirya bha amaragiriryo ga Waryubha, kikeekuman'ya hamwi. ⁶⁷ Bhakamuhira Yesu muribharaja ryabho, Bhakamubhuurya ega, "Nyoore uuwe nuwe Kristu, otukerye!" Yeesu akakyukya ega, "Kora nkabhakeerya, muteekirirye, ⁶⁸ na ndaabhabhuurye ering'ana mutaakyukye. ⁶⁹ Nawe okurwa bhoono, omwana wa Adamu aribha yeekeri orubhaara rwa obhuryo rwa Waryubha owa obhuturo." ⁷⁰ Bhonsego, bhakamubhuurya Yesu kweki ega, "Nko okugamba uuwe mumwana wa Waryubha?" Yesu akakyukya ega, "Mubheenyu muragamba ega noni." ⁷¹ Bhakagamba ega, "Mbe, Kweki tureenda abheemiririri abhandi? Ndegwa twigwiri bheetu abheene okurwa mumunwa gwaye."